頭條日報 – 18區街頭彩虹噴畫悼哥哥「我有我本色」

 

頭條日報 – 第一次上報
發覺做嘅嘢終於有人會睇到!

下周一(四月一日愚人節),係哥哥張國榮逝世十周年紀念,Kelly同好多人一樣,好懷念呢位超級巨星。Kelly留意到近期街頭多咗好多張國榮彩虹噴畫頭像,中環、尖東、旺角都見到佢個嘜頭,仲有佢金曲「我」嘅兩句歌詞。有唱片店就話,每逢四月哥哥死忌,有關佢嘅唱片影碟特別好賣,今年十周年,預計銷量會更好喎。

Kelly噚日路過尖沙咀紅隧入口附近,見到路邊電箱同天橋底,有多個張國榮頭像,有啲用彩虹色,有啲就一排六個,分別噴上紅橙黃綠藍紫。頭像下有哥哥其中一首金曲「我」的兩句歌詞「不用閃躲,為我喜歡的生活而活」,為街頭增添唔少藝術氣息。

除咗尖東,當年哥哥墮樓身亡嘅文華東方旁嘅行人隧道,以及彌敦道,都見到佢蹤影。據Kelly所知,呢批噴畫,係爭取同志平權人士創作,仲有人將各區彩虹畫像照片,上載到facebook專頁。

今年是哥哥逝世十周年,好多歌迷影迷都用唔同方式紀念佢,除咗演唱會、首辦公仔,唱片影碟專輯更係榮迷必掃紀念品。唱片店HMV表示,今年十周年,喺店內闢設專區,擺放張國榮受歡迎的唱片影碟,例如霸王別姬、阿飛正傳等;今年則新推出三碟DVD裝《集體回憶張國榮》,收錄佢由八十年代至○二年期間,為港台拍攝嘅電視及電影作品,銷量亦不錯。

Leave a Reply

Your email address will not be published.