《真我定影》影片放映分享會全記錄

《真我定影》影片放映分享會
Pride Lab主辦
新婦女協進會協辦

今次嘅活動, 係PrideLab2016年一個計劃嘅延續。

2016年初,我地推出一本影像故事書 – 《真我顯影》,訪問咗9位跨性別朋友分享佢地嘅尋找真我嘅過程。做書過程,我哋同書中嘅跨性別朋友做咗朋友,知道當中有3位朋友先後喺2016年完成性別重置手術。

過去嘅一年經歷,PrideLab亦有以攝錄留下影像,希望透過今次活動,回顧佢哋發生過嘅各大小事之餘。 透過嘉賓分享佢哋手術前後當中有甘有甜有笑有淚嘅生活點滴, 都令大家了解更多跨性別人士活出新身份嘅心路歷程。

有跨性別人士以「化蝶」形容手術,意義好比脫繭重生。 然而,手術唔係魔法,一把手術刀係唔可能將生活不好嘅部份就好似割腫瘤咁就無事。 活出真我,係一條靠堅定信念,排除困難走一生嘅路。