唔靠視覺，跨性別人士係點樣Feel到自己表達緊想要嘅性別氣質呢？
今次邀請盲人性別小眾同我哋聲音導航佢探索女性身分嘅心路歷程，從學化妝、遇到友善嘅服務店家同埋體驗衣服質地，Priscilla 帶領我哋了解用觸覺體驗生活。
Priscilla Facebookhttps://www.facebook.com/priscilla.wong.5851
Priscilla IG https://www.instagram.com/priscilla.wong.5851/
#MM｜20歲視障巴士迷
【專訪自己人】盲人性別小眾嘅心/聲 (Feat. Priscilla)
M：馬天娜
P：Priscilla
M：歡迎返嚟《點止港同志》，我係主持馬天娜。今集係一集多重身份嘅同志嘅一集。第二季嘅時候，我哋有訪問咗兩位聾人嘅同志，而呢一季我哋就搵嚟咗一位盲人嘅同志，等陣佢都可以介紹多少少自己嘅身份。
M：遇到呢位嘅朋友，其實都要多謝陳驚。佢嗰陣時出席一個活動，嗰陣時呢一位嘉賓，佢就係裏面嘅其中一個真人圖書館嘅圖書噉樣。輾轉之間就聯絡到佢，亦都希望收聽緊呢個節目嘅你，可以知道其實香港唔淨止可能係一啲出席大型活動、可能好嘉年華式嘅一啲團聚，可能有一啲其實自己有比較多多重身份嘅，甚至其實佢唔單止係自己嘅多重身份，可能係佢喺個社會上面都會有唔同嘅身份。當中裏面同志係點樣自處嘅呢？希望今次嘅嘉賓可以同我哋娓娓道來嘞！噉我哋介紹下呢位嘉賓先，可以講下自己。
P：大家好，我叫Priscilla。
M：Priscilla你好，頭先我一開始講盲人，噉我想問你會想用盲人呢個字眼，定用其他字眼去稱呼你呢？
P：其實冇問題㗎，我諗盲人又好，視障人士都好，視障朋友都好啦，其實就我冇乜太大嘅問題嘅。係囉，唔該你。
M：唔好客氣，噉多謝你話番畀我聽呢個稱呼。因為有啲人之前我哋有聾人嗰一集嘅時候，佢哋就會比較傾向用聾人呢個字眼。噉亦都希望同其他聽眾講，有陣時如果你新認識嘅朋友嘅時候，你唔係好認識點樣描述佢嘅情況呢，你就直接問對方就得㗎啦，唔使諗太多你直接去問，佢就會畀你一個好明確嘅答案。
M：講到你盲人嘅狀況呢，你可唔可以講多少少你盲嘅程度係大概點樣㗎？
P: 好呀，其實我而家嘅視力呢，我諗得返幾個百分比度㗎咋。噉我就係由細個開始啦噉一出世呢，大概係正常視力嘅四成左右啦。跟住一路年紀一路大一路大嘅時候呢，慢慢個視力就退化，而家就淨返幾個百分比啦。噉係咩狀況呢？其實我就睇唔到字㗎嘞，我淨係睇到光，睇到影，噉其他嘢都睇得唔清楚㗎嘞。大概嘅輪廓啦，就算有個人喺我面前都好啦，都認唔到佢咩樣㗎啦。
M: 所以你喺街上面，如果你要出去活動嘅話，我想像到你係咪需要嗰啲⋯⋯
P：我會用手杖囉，我會用嗰啲手杖去探路囉。係啦，無錯啦。
M：你呢個視力嘅狀況係，即係天生就係淨低四成啦。噉佢嗰個退化係預期嘅退化嚟嘅？
P：係預期嘅，預期嘅退化嚟嘅。因為細個成日我睇醫生呢，已經話咗畀我聽，你個視力係會慢慢，慢慢噉退落去㗎啦噉樣，噉所以都會有心理準備啦。噉都好幸運嘅，因為我有一段長嘅時間，去適應呢一個嘅情況啦。噉因為有啲病友呢，或者有啲盲人呢，用同一個嘅病嘅話呢，佢可能係一年啦，兩年啦，就已經去到我呢個狀況啦。噉所以佢哋可能係由完全睇到開始，然後兩年度就去到呢個習慣啦。
M：明白。噉所以嗰個轉折之間，你就可能會慢慢適應到，開始越嚟越睇唔到，噉你就要適應生活上面嘅轉變噉樣。頭先講到話，你係多重身份嘅性別小眾啦。可唔可以講多少少你係點樣嘅多重身份呢？
P：其實除咗我一個失明人之外啦，噉我係一個有性別認同嘅問題嘅人啦。變咗我雖然我唔係呢，好似一般嘅跨女噉樣呢，係原本生理嘅男性啦，然後用一個女性嘅身份生活啦。我唔係嘅，因為我絕大部分時間呢，其實都用返男性嘅身份去生活。噉但係我心裏面其實就好想成為一個女性啦。噉就係呢個噉嘅狀況啦。
M：可唔可以講一講，你係幾時有發現咗自己想成為女性嘅呢一個想法？
P：其實呢個想法呢就好細個已經開始有，當時就好對女性嘅服裝好好奇啦，覺得自己想做女仔啦。噉但係細個嘅時候呢因為社會嘅緣故啦，或者自己都對呢樣嘢唔認識呀。噉所以呢都覺得自己唔應該係噉呀。噉可能都同自己講，你對異性有好奇啫冇嘢嘅噉樣。噉一路一路大呢，噉都呢個嘅對女性嘅好奇或者，對性別呢個好奇冇停止過，直至去到幾年前啦，去一路其實都有接觸呢一啲關於Crossdressing呀，或者係Transgender呢啲噉嘅資訊。因為近十年到其實呢樣嘢好普遍。噉變咗呢，慢慢，慢慢自己就會諗啦，會唔會自己都去試一次呢？因為都畀自己試下啦，都有噉嘅好奇，咪去滿足下自己去試下啦。噉就試咗第一次嘅變裝。噉試咗第一次之後，就好似解咗鎖噉樣啦。就覺得呢一切都好自然啦，呢一切都好舒服啦。噉變咗就開始意識到自己係咪有呢個狀況呢。噉樣樣啦噉就強烈咗好多啦。
M：你提及到變裝啦，Crossdressing嘅經驗啦，你可唔可以講多少少？你係點樣從你意識到你即係想成為一個女性，噉跟住接觸到Crossdressing呢個過程呀？
P：其實呢由細到大都對女性嘅服裝好好奇呀。因為其實做一個女仔噉樣，第一樣想做嘅或者被吸引嘅一定係女性嘅服裝啦。噉變咗我又一路都睇一啲相關嘅資料呀，故仔呀。成日都覺嗱嗰啲故仔裏面嘅主角，如果我係裏面嗰個主角噉樣有噉樣嘅經歷，可以試下做女仔噉就好啦。噉一路搵資料啦，噉跟住就喺網上偶然發現到呢。噉呢有啲地方就提供一啲Crossdressing嘅人像攝影嘅服務㗎嘛。我就抱住一個心態啦就係話噉演戲都有反轉啦，噉我咪諗住當去玩嘅心態噉咪去聯絡嗰邊嗰啲服務提供嗰啲朋友囉。噉其實都好大膽嘅因為作為一個盲人啦噉自己都去，自己去搵資料啦，自己聯絡佢哋啦，跟住自己買第一套嘅女裝啦，跟住做好多嘅嘢啦，噉然後去嘗試自己第一次的Crossdressing嘅攝影。
M：Crossdressing嘅攝影呢等陣呢我哋會提到你做過有一段有模特兒訓練，亦都呢一件事都有喺你嘅電子書裏面提到嘅。噉我哋等陣再講呀。噉你去到即係而家呢幾年以嚟又發現咗Crossdressing呢個方法啦。你係點樣，你有無將呢一個想法，呢一個好奇心，呢一個對於女性嘅身份呀，喺一啲故事書面嘅一個描述同你身邊嘅人，例如你嘅朋友或者你嘅屋企人提及過呢？
P：第一次去嘗試咗Crossdressing之後呢其實都無同人講嘅。噉唯一呢就係同，噉就會開咗一個女性版本嘅自己嘅facebook啦，跟住所有Crossdressing嘅相片喺上面啦。用一個女仔嘅名啦，然後用一個身份同其他人去互動啦。噉當時就刻意噉避開咗身邊嘅朋友，有我男仔身份嘅朋友呢係冇我呢個另外開嘅facebook嘅。噉跟住慢慢，慢慢都認識咗啲嘅朋友喺個網上面。發現呢原來有啲朋友係都會認識嘅。噉咪慢慢，慢慢去認識啦。噉然之後呢去到一個位慢慢去習慣咗，我用呢個身份同人去相處嘅時候呢，就開始嘗試呢搵到識得其他的朋友。跟住呢又好特別㗎喎，噉我用男仔嘅身份呢又識咗一班嘅朋友。噉呢一班嘅朋友呢，其實呢就對於性小眾呀，對於性別小眾呢個課題呢就好大嘅接受度，好有興趣嘅，即係跟開呢一啲課題嘅朋友嚟嘅。變咗呢我又有噉嘅機會呢我就將我自己呢一個嘅狀況呢就同佢哋分享，佢哋就好接受喎。我第一次喺一班人面前去展現我嘅女性嘅身份啦，著女裝啦去出現呢就係喺呢班朋友一次聚會嘅裏面囉。噉我就開始呢讓我身邊嘅人慢慢，慢慢認識我有呢一方面嘅狀況，噉但係當然去到最後呢屋企人就仲未知嘅。因為呢我而家每一次嘅變裝都係出面做啦，噉所以屋企裏面就唔會放女裝啦，噉而屋企人都未知嘅。噉簡單講下我嘅家庭背景啦噉樣。
P：噉作為男仔嘅我呢，噉其實我係屋企獨仔嚟嘅。噉跟住呢係我結咗婚嘅，我有太太，未有小朋友。但係呢其實係我結咗婚之後呢，我先至去第一次嘅變裝啦，第一次去感受到自己嗰個性別嘅認同嗰個嘅情況啦。噉所以就一切都係喺結婚之後發生，噉正因為噉呢所以我又唔想話俾太太聽啦，廢事佢知道之後唔知點諗啦，或者影響到錢銀關係啦，我都唔想嘅。
M：你會唔會覺得你嘅婚姻或者你同一位異性嘅親密相處同你而家呢一個Crossdressing或者對於女性嘅身份嘅好奇係有關係嘅呢？
P：要諗返轉頭呢，因為當我知道自己有性別認同嘅情況嘅時候，我都好常常搵人協助，跟住同啲可能係Counselor或者同啲朋友傾開嘅時候，都發覺自己一樣嘢就係呢，其實自己由細到大喺女仔堆嘅相處裏面呢其實係舒服啲㗎。其實我讀書嘅時候中學係讀男校啦，我冇辦法啦，噉但係去到大學嘅時候呢其實我讀書其實係比較舒服同一班女同學去相處。噉但係呢，當時可能對自己嘅諗法都係，你對異性好奇啫，你想搵對象啫，係咪呀？所以咪喺女仔堆裏面囉。但係變咗去到有呢個情況嘅時候，再回想番呢，其實我就如果你問我，我喜歡同女性相處多一啲，唔係因為我要搵對象，而係我覺得，我仲意係佢哋嘅圈子嘅一部分。我唔係想成為佢哋嘅伴侶，而係想成為佢哋嘅姊妹囉。
M：明白。 所以有一啲人可能係理解Costressing嘅人士當中嘅時候，往往都會有一個誤解。因為即係喺呢個跨性別或者性別非二元嘅圈子裏面，有啲人就會話，你係咪已經著緊一個異性嘅衫? 噉你係咪想完完全全嘅，所謂嘅跨性啊變性啊? 有啲人話要做埋手術啊。但係喺呢個喺個光譜當中，有啲人個個心態同埋佢嘅立場係唔一樣。噉今次Priscilla就分享咗，其實佢想，有Costressing呢一個好奇，呢一個嘗試嘅目的，並唔係要完全地成為咗女性，而係成為女性嘅姐妹們噉樣啦。好，係，請繼續。
P：不如喺呢度可唔可以有少少嘅補充呢?
M：係！請講。
P：如果對我嚟講呢，我會噉講嘅，你問我，如果可以所有嘢到頭重嚟一次，喺我未結婚嘅時候，我已經知道呢件事，噉我會唔會想變成一個女性，想去食藥，做手術，然後呢，換埋個身份證，以一個女性嘅身份去過我餘下生活呢? 坦白講我係想嘅，我係想嘅。但係呢，現實嘅狀況令到我其實唔係好可以去做呢件事。噉因為，噉我有太太啦，噉我有其他嘅事情啦，我其他嘅身份啦。噉當然咩身份就唔方便喺呢度講啦，但係呢啲嘅身份其實會令到我呢，如果我要立定心志去成為一個女性，我要去食藥，我要去做手術嘅話呢，其實呢係會變成一個好大嘅負擔，好大嘅衝擊。噉變咗對我嚟講，家庭啦，呢啲身份啦，各種各樣嘅嘢就令到我唔會喺呢一刻就去諗，我一定要去成為一個女性，去做曬手術呀，食曬藥噉樣。因為喺而家對我嚟講，我能夠有機會用女性嘅身份去同人去交往呀，噉其實喺呢一刻對我嚟講都已經唔係一個好差嘅一個狀態嚟㗎囉。
M：所以目前嚟講，因為呢啲實際嘅環境啦，圈子啦，同埋你有多重嘅身份之下，你覺得呢個狀態係還可以嘅，而家呢個變裝嘅狀態就可以接受噉樣。
P：係呀，因為基本上我大部份都用男性嘅身份去生活，噉有時有機會變裝，噉其實已經係我可以叫所謂可控範圍啦，裏面我做到最多，盡力做可以做到最多嘅東西。
M：感謝你話畀我聽，喺呢個情況之下，因為有一啲人佢就會覺得我我要做，噉就要即刻而家要盡快要做。但係你嘅例子你係話畀我哋聽，其實的確係有一啲人可能，佢有唔同嘅身份，佢有唔同嘅職位，喺噉嘅情況之下佢會有所取捨囉。我覺得呢個係一個好活生生嘅一個證明嚟㗎。
P：所以我都會話呢啲係，唔係話邊一條路先至啱，但係喺每一個情況之下，我諗每一個人都有佢背後嘅故仔或者佢嘅難處，佢嘅考慮。冇話邊樣嘢啱，邊樣嘢錯。最緊要係就算圈子以內嘅人都可以互相尊重，互相去理解大家嘅情況，噉以至到大家彼此尊重包容呢，條路會容易啲行嘅我覺得。因為坦白講呀，性小眾，性別小眾嘅路，本身已經唔易行啦。所以我期望嘅就係大家都喺呢個圈子裏面都能夠彼此嘅尊重呀，包容呀，體諒對方嘅考慮同埋難處囉。
M：呢個宣言我覺得係對於跨性別嘅圈子同性別小眾嘅圈子尤其重要。接住落嚟呢，會問一啲關於你Crossdressing中間嘅一啲，我會形容為關卡啦，或者可能我會問一啲比較實際啲技術啲嘅問題。首先呢就係講到叫Pass嘅文化，或者一個Pass嘅概念。我喺一啲跨性別圈子裏面，或者係Crossdressing嘅圈子裏面，經常會見到有啲人提及Pass呢個字，我Pass唔Pass呀噉樣。佢哋會希望從社會裏面嘅陌生人嘅口中或者嘅行為裏面知道自己當時嘅外表係咪符合自己想表達嘅性別氣質。簡單啲嚟講，我想舉一個台灣嘅例子，喺台灣呢有一啲跨性別嘅男士，即跨仔，佢哋會希望呢有一個我簡稱叫做星巴克，即Starbucks嘅測試噉樣。點樣叫星巴克嘅測試呢就係，可能喺香港都會經歴過，印象好似都有噉樣做過，就係當你嗌咗杯咖啡嘅時候，佢會問你點稱呼。噉喺香港可能你會畀一個英文名，我叫Peter噉樣，噉你就好明顯嗌我，我叫Peter嘅Espresso啦噉樣。但係台灣通常就會講個姓氏，我姓李嘅噉樣。噉佢就會期待究竟最後攞到咖啡嗰一刻，佢係被嗌李小姐定被嗌李先生。噉所以對於跨性別人士嚟講，好似經常都會想像Pass唔Pass呢一個問題噉樣。噉而喺你嘅電子書裏面都有提及過，即係你喺街上面曾經有聽過有人用姐姐去形容你。可唔可以講一講對於你嚟講Pass唔Pass呢件事係有幾重要呢？
P：對我嚟講我諗都重要嘅，點解呢？呢個係象徵住，對方去認同你自己想成為嗰個性別，佢都照諗你真係喺佢心目中係呢一個性別。係一個噉樣嘅狀況。因為，其實呢，很多時好多人呢，都包括我呢，都唔會去到噉，個心去到噉大呢，佢噉強大就係話，你有你諗啦，我話我係女人，噉我咪係女人囉。但係對我嚟講唔係呀，因為你喺個社會裏面去生活嘅時候呢，你話你係女人，噉都要人哋都覺得你係女人先得㗎嘛。如果唔係佢會彈開㗎，係咪？變咗一個問題就係，如果你話你係女人，但對方彈開嘅時候，噉你話你係女人又有咩意思呢？因為我覺得係呢個社會係要同人去接觸，係同人有交集。噉所以點解要處理Pass嘅問題，或者咁樣講啦，唔會怕人先啦，係咪，即係好多原生女，我同好多原生女交朋友的時候，有時問開佢哋都會講，就算都係原生女呀，只要佢生得比較男仔頭一啲或者佢男性化一啲嘅時候，其實都會覺得有少少Hesitation。噉所以嗰個情況就係，當我要爭取人哋，去認同我係一個女性嘅時候，噉我就要Somehow做一啲嘢，So that對方會一望埋去起碼第一個印象，你唔係奇怪，你唔係有一啲令我唔舒服或者噉嘅狀況。甚至乎呢，有啲人會諗嘅嘛，你明明係男仔，你扮成一個女仔，博取我認同嘅時候，其實你咪為想，或者你又扮到不倫不類噉樣。噉你係咪其實想有啲乜嘢嘅企圖？呢啲噉樣嘅嘢，當然我哋唔鼓勵，我哋都唔認同有啲噉嘅想法，但係當啲想法存在嘅時候，其實我諗對我哋，我哋可以做嘅就係，盡力做好少少，so that對方嘅戒心會低啲，令到彼此間嗰個溝通或者接納會好少少噉樣。
M：中間其實你都提及過一啲，關於可能現時嘅我哋叫做TERF或者係，簡單啲嚟講，原生性別，自我認同女性嘅人對於跨性別，尤其以跨女，跨女族群嘅一個好大嘅辯論，而家個現象越嚟越熱烈。某種程度上我會覺得，視覺上面嘅Passing係一個因素嚟嘅。呢個詳細我會再講，但係目前嚟講，係一個好現實嘅情況之下，Pass唔Pass係非常影響跨性別人士，或者Crossdresser，當刻佢受到嘅待遇。噉所以，亦都感謝你講到畀我聽嗰個心態係點樣，而我非常之同意頭先你所講話，有原生性別係女性，自我認同女性嘅人，其實喺一啲外表上面只係要有一啲轉變，佢就好容易會被社會視為唔係女性。其實好多嘅，有時你睇一啲新聞，你話我操到好大隻嘅女仔，跟住畀人話係男人婆，唔似女人，操到噉壯做乜嘢，或者頭髮短啲，可能短到上條頸，佢位置又會問你做乜搞到男仔頭噉，係唔係受到啲乜嘢刺激。往往其實我想表達嘅嘢係，Passing嘅文化也許不在所謂嘅順性別圈子裏面經常去講，我自己作為一個出身性別被判定為女性，我自己覺得自己係女性嘅人，我都其實唔會經常性同身邊嘅同事們，朋友們，女性朋友們話我Pass唔Pass噉樣，但係其實我活在嗰個生活裏面，我穿著嘅嘢，我穿著嘅衣服，我嘅外表，我嘅頭髮長度，我嘅聲線，其實呢啲都係個社會裏面允許Pass嘅規範嚟嘅，只不過我哋係好似好順利成章噉活喺呢個Pass嘅定義裏面。所以喺呢個，Priscilla今次嘅分享之中，我亦都好心深同感受，其實好多時候呢個所謂嘅Pass都係一個你依刻身在嗰個社會裏面允許一個男性或者女性該有嘅模樣嘅過程。規範噉樣。
P：其實係呀，就exactly就係噉樣囉。即係點解要追求Pass嘅原因就係話，因為你本身，你已經冇天然嘅一個女性嘅特徵嘅時候，你需要人哋去接受你嘅時候，唯一嘅可行嘅方法就係你盡力去做一啲嘢出，令到人哋睇一眼覺得唔好唔舒服先，ok嘅。噉樣，然後先可以慢慢去做。但係當然我會噉樣講嘅。所以Pass唔Pass呢，喺我嘅尺度裏面呢…其實唔係淨係外表嘅，即係有時呢，嗰種嘅舉止、談吐、態度，即係你會唔會都可以其實放低咗你原本以男性嘅身份去生活嘅時候，一啲嘅特徵啦，一啲嘅狀況啦噉樣。舉個例子，即係如果有冒犯到有啲跨性別嘅朋友噉樣都抱歉先，舉個例，你戴晒假髮、化晒妝、做咗啲條裙出街，但係呢，你行路行到掗下掗下噉樣。噉點呢，大家都會覺得有啲突兀嘅，噉呢種突兀，有時佢覺得突兀嘅時候，佢會覺得唔係好舒服，或者覺得唔係好自在。跟住呢，你就會覺得你係咪歧視我呀？你係咪覺得我唔Pass呀？噉我心諗嘅就係，嗰個唔Pass唔係你嘅外表呀。嗰個Pass唔Pass，另一個因素就係你嘅言行舉止，係唔係大家覺得大部分女性都會係噉嘅狀態呢？大概就係噉啦，我諗順性別嘅女仔都會係嘅。例如有啲粗枝大葉啲嘅，比較不拘小節啲嘅女仔都會比人話，你做法噉唔似女仔，你係女仔啲啦。就算順性別嘅女仔都會比人噉講，係咪？
M：無錯，我非常同意，其實幾得意呀，因為你噉樣講。我有個想起，女同志圈子裡面其實我地所謂TB，其實好多時候都會比人噉樣講㗎。即係佢做嘅行為就係短頭髮囉，著褲囉，跟住可能佢最鍾意做運動，或者佢鍾意，佢身邊比較熟嘅朋友，反而有可能係男性居多嘅時候，佢就會比個社會去問，咦，點解噉嘅，點解唔係女仔啲嘅，噉樣。所以我覺得今次個討論好有趣，我哋可以完全地知道，其實嗰個Passing文化唔係純粹係跨性別獨有，而係只不過係一個順性別嘅世界裏面，嗰個Passing就係噉隱藏，噉不成文，但係存在嘅狀況。對我嚟講係一個警醒嚟嘅。個社會就係噉樣去看待所謂嘅男或者女，或者係一種性別非男非女非二元嘅情況之下，我哋會點樣喺嗰個Pass唔Pass嘅規範裏面掙扎，點樣去抗衡。
P：其實係㗎。
M：接住落嚟會問一啲技術啲嘅問題，技術啲嘅原因係因為，我要講就係因為我係一個睇得到東西嘅人士，噉我睇到，即係跨性別或者Crossdresser，喺我嘅社交媒體裏面嘅畫面，佢哋嘅外表。噉我就會好清楚知道佢係著緊啲咩衫，佢係咩色嘅衫，頭髮係點樣，但係我會希望可以俾到聽眾去知道，作為一個睇唔到嘢嘅人，佢係點樣去享受自己Crossdress嘅時候呢，佢係點樣執行呢一件事。噉我又問一啲所謂技術性嘅問題，你喺個電子書裏面有提到，你係透過觸覺去享受自己女性嘅生活。你可唔可以大概描述下，所謂點樣見過或者係feel過自己係女裝嘅模樣？
P：我第一次嘅變裝嘅時候，我可以好舒服噉坐喺張凳度，讓化妝師幫我化妝，我冇任何覺得唔舒服嗰一瞬間嘅地方，就容讓佢個化妝掃喺我嘅面上面，畫呢度，畫嗰度。我覺得好舒服，我覺得好享受，化妝掃畫過我每一個地方嘅時候，粉撲喺我面上經過嘅時候，嗰種嘅感受，我開始會變成我女裝嘅模樣，或者係攞起一條裙，要著上，攞起可能係胸圍絲襪去著上嘅時候，我唔係話被嗰啲嘢去吸引。但係當我慢慢，慢慢，一件一件去加上自己身體嘅時候呢，用個手可能會feel到，我有嘅曲線，唔同嘅衣物嗰種嘅質感，佢上面一啲嘅pattern，一條裙係長定係短，去到邊一度。我就會問一問身邊嘅人，啊，呢個係咩色啊，呢個係咩款式啊？因為有時有啲款式都摸到㗎嘛，例如喱士嘅咪摸到囉，可以摸到佢嘅質感，問下佢，啊，係咩顏色啊，咩花紋啊？你會瞭解著上身係點樣，跟住著上身之後，你都會摸到你自己，貼唔貼身啊，個figure大概係點樣啊？用一個觸覺去享受自己做，係一個女性打扮一個嘅狀態囉。
M：我睇得到嘅人嘅感覺當中係，你講咗一啲字眼係，我基本上係唔會特別去強調，係好神奇嘅。就係所謂我覺得好神奇係，原來一個粉撲，一個可能係嗰啲叫做粉底掃嘅掃過嘅感覺會令到你有如此嘅感覺。呢個角度係，係我唔會，我唔會輕易諗得到。係啊，所以好感謝你，你講到描述到嗰個過程，嗰個衣著嘅過程對你嚟講係一個如何嘅一個心路歷程，噉跟住我又會想問。你講到話，你可以摸得到衣服嘅質感啦，喱士嘅質感啦。你有冇習慣去點樣去搵適合自己變裝嘅衣服呢？同埋我又想問，你好唔可以描述一下，喺你日常生活中，你嘅男裝，你嘅男性打扮，同你女裝嘅打扮嘅時候，你摸上去嘅一個感覺，比你嘅感覺嘅差異係點樣嘅？
P：第一個先講我點樣揀衫先啦，因為而家要買衫呢，通常都係網購㗎嘛。噉變咗呢，你要搵啱你嘅衫呢，其實都唔容易㗎，因為我有番噉上下高度呀，我有番噉上下嘅身形，噉變咗呢，唔係噉容易出去買到啱嘅衫。噉你唔會自己出去買女裝㗎嘛？你係咪用男生嘅身份出去嘅時候，你唔會噉易去買到女裝，買都試唔到啦，係咪？
M：係。
P：好amazing㗎，都因為呢，其中一個我遇到嘅呢，就係一個賣女裝嘅一個嘅樓上鋪嘅鋪頭。個老闆好好呀，佢呢，有時我真係上到去呢，佢真係噉嗰間鋪，因為樓上鋪唔係成日有人㗎嘛。噉佢咪同我講囉，你呢啲衫呢，我介紹畀你啦，你可以摸下，你可以去試下。噉試完之後佢仲要話你出嚟畀我睇下噉樣嘅。噉有機會呢，我就可以自己揀自己嘅衫，都有機會試過幾次噉樣。噉呢個感覺係好好㗎，噉有人有傾有講啦。所以最緊要呢，係都要有朋友喺身邊或者有幫手喺身邊。形容畀我聽個pattern係咩啦，個顏色係咩啦，因為我只係摸到個質感咋嘛，係咪？噉所以就好多時都要靠朋友去幫手，去揀呀，去畀意見呀，噉樣咯。噉你講到男裝同女裝嘅質感有咩分別？女裝嘅質料啦，或者佢嘅pattern啦，佢嘅剪裁啦，可以有唔同嘅變化。佢變化多好多，佢嘅配搭可以多好多，就算係一條裙都好啦。噉變咗佢可以有唔同嘅剪裁呀，唔同嘅質料呀，唔同嘅長短呀，唔同嘅裝飾呀。噉呢啲其實係嗰個變化部好多囉，嗰個diversity多好多囉。噉變咗可以試嘅都多好多囉。
M：你頭先有講到話你遇到一個樓上鋪嘅，即係賣衫嘅店主。噉佢就非常之友善噉樣去幫你去，可能搭配嘅衫呀，請你出嚟，試完之後出嚟畀啲matching嘅建議呀噉樣。所以我喺度都會好想強調一個點，就係其實千祈唔好覺得，周邊嘅人就係賣衫就賣衫囉，噉樣。其實有做多一個步驟去俾性小眾，或者係多重身份嘅性小眾去做到呢一個嘗試，其實係非常之重要。頭先你都有講到話其實網購，其實我自己網購，我都係只能夠靠佢嘅描述，然後靠佢個所謂嗰啲咩model，咩相，咩身材搭著咩size嘅衫，我就只係冒住一個某種程度嘅風險，就噉樣就係噉落單㗎啦。所以我都好明白所謂嘅，即使而家網購好方便啦，但係其實去返一個我哋需要質感我哋需要體驗嘅時候，其實都係爭噉啲。所以我都身同感受，我去返服務同埋你嘅消費嘅一個過程。你有沒有曾經遇過被拒絕嘅狀況？
P：其實我都好開心嘅就係，我都冇試過話被拒絕。因為通常我用女裝嘅身份，去搵一啲舖頭或者服務嘅時候，我都會先同佢講咗我有呢個狀況，先至去做或者都係朋友去介紹，有朋友帶去，我就話你講清楚，我係噉樣嘅情況喎。佢係o唔ok㗎？ok咗之後我先會上去。變咗就呢一個係一個好嘅經驗，通常佢哋都會明白，佢知道，就好少話好尷尬你上到去，三唔識七，然後就被拒絕。通常都唔會撞咗呢個情況。反而我另一個經驗好得意嘅，就係我係會去做美容嘅，去做facial嘅。我用男仔嘅身份都已經開始做facial。噉我就有啲美容店，可能嘅消費好多年，我係長期顧客。一路一路會同裏面啲美容師嗰啲舖頭熟。如果嗰間店屋呢，啲人轉得少，啲人都做得耐，噉其實識得耐嘅時候，有啲我直程會同佢講，我有一個噉樣嘅狀況，其實我係心裡想做女仔。我會Crossdress影相呀，因為可能美容院呢，佢哋見得呢啲人多，所以佢哋都不以為然，佢哋反而都會諗，畀啲相嚟睇下，靚唔靚呀。佢哋會comment下，幾靚呀。反而會係噉樣。漸漸呢一啲相熟嘅美容院，甚至乎已經去到一個地步，就係佢唔再當我係男仔客，佢就當我係個女仔客噉去serve。噉呢個對我嚟講係一個Crossdressing，Transgender上面，呢一條路上面，其中一個都幾正面嘅一個嘅經驗嚟㗎。係囉。
M：好開心呀，好開心你分享到話你遇到噉願意同你分享，願意同你交流嘅一個服務嘅店主。因為好多時候有陣時我聽到一啲跨性別嘅朋友，可能佢比較年輕啦，佢哋會成日都覺得我遇到一啲狀況呀，對方唔係好理解我發生緊啲乜嘢事，但係我好憤怒噉樣。即係經常都會聽到一啲比較負面嘅描述，就係嗰個服務嘅機構佢一路以嚟我同佢講話要改，要改點樣處理我嘅狀況佢都冇改到噉樣嘅，就好憤怒。
P：因為其實呢，我諗呢種憤怒呢有兩樣嘢嘅：第一，你究竟係咩行業，有啲嘢，即係好簡單，你係銀行噉先算啦。噉你個身份證係乜，佢就係乜㗎啦。即係有時呢，你有一啲服務行業呢，佢嘅性別意識冇噉高呀。噉變咗佢咪對住個存摺簿，對住個電腦嘅資料，你係噉，咪係噉囉。佢唔會話望一望你，然後就…跟住佢即刻去調教點樣稱呼你。識得噉做嘅人其實唔多。噉呢一類嘅服務行業，或者好多嘅服務行業，變咗佢唔理解呀，佢唔即刻理解。噉會出現呢個狀況。噉佢哋嬲呢，其實我覺得都好正常。但係你問我，我頭先遇過嘅一個狀況，有啲唔一樣嘅就係，我係先同佢哋即係所謂建立咗關係啦。噉佢就瞭解曬發生緊咩事啦。佢願意提供服務啦，噉先至呢，去執行嗰個服務。噉成件事呢，嚟得會順暢啲。你坦白講就算我噉啦，你打扮曬噉樣，跟住進入去一個你唔識嘅服務嘅地方噉樣。跟住佢睇得出可能有喉核，可能你有其他性別嘅徵狀，或者你把聲嘅問題。佢都會仍然稱呼返你做你原生嘅性別噉樣。噉呢個係咪佢錯呢？會令你唔開心囉，呢個係真嘅。但係有啲人係真係會噉，佢嘅意識係唔夠。噉都即係有時都冇乜辦法。呢個第一種，第二種嘅狀況，有啲人就係佢覺得我係話我係女仔咪係女仔囉。總之我話我係女仔，你就要叫我做小姐㗎啦。但係呢佢自己表達出嚟嗰個性別表達性別氣質，讓人呢就覺得有啲困惑有啲confuse嘅時候。你再要求人哋噉做呢，人哋做起上嚟佢會有啲唔知點解嘅怪嘅感覺。然後當佢唔係噉樣做嘅時候呢，你就會complain佢啦，跟住你會投訴佢啦，你會覺得佢好錯啦。通常個衝突就起嘅時候呢，就大家都唔開心，變咗可能有時嘅情況會係噉樣囉。
M：性別小眾有一個心路歷程，呢個關卡係需要特別嘅處理。就係你點樣同人哋講你嘅狀況先，先至能夠比到對方無論係新認識嘅朋友又好，或者係即係單純地係用固定嘅模式去serve你嘅服務性行業都好，你都係需要知道比佢好清晰知道究竟佢要點樣處理你。例如我簡單啲嚟講可能係講話我唔食得某啲食物嘅，我食物過敏嘅。你要講清楚，你都講到係點樣嘅情況，佢再因而去制定一個方式去所謂嘅配合你。當然佢肯唔肯配合你，佢嘅立場係點，呢個係後話。但係至少前面嘅步驟就係你要比佢知道你需要乜嘢。我覺得係可能係比較多嘅性別非二元嘅圈子裏面都會經常遇到噉嘅關卡。我再落去一個，我自己少少其實自己係有啲好奇嘅問題，就係你有喺個電子書裏面提到話你有去學化妝。呢個我好奇嘅位係其實對你嚟講係睇唔到嘅情況之下你係點樣去學化妝。
P：其實我都初初都諗住做唔做到，但係成日幫我化妝嘅化妝師佢就話佢可以教我，我話點做呀。佢都好細心，佢就用方法就係話，你呢就用呢啲呢啲嘅方法，你用你嘅觸覺，你用你嘅手感去做，你可以噉樣做噉樣做，順著次序噉去做，噉就可以㗎啦。噉樣嘅，噉佢真係用嗰啲，佢真係用唔使睇嘅方法，佢話你記住呢個嘅力度，記住呢個嘅手感，你記住摸下呢個化妝掃，呢個做呢個嘅，用呢個用途嘅，或者呢一盒嘅唔同顏色嘅，可能係遮瑕膏或者係眼影，呢個唔同格數係咩顏色呀你記住喎。噉變咗佢用呢啲嘅方法，慢慢俾我去習慣，去嘗試嘅時候噉咪可以囉。你用隻手指旁住，例如畫眉啦，噉點畫得靚唔出界呢。你用隻手指旁住你條眉，然後由呢到連去嗰到，噉就ok㗎啦。記得要留意啲乜嘢嘢呀。噉佢係用咗一個好細心，好好嘅方法，另外用觸角都可以去化妝。當然我需要嘅有時呢，開頭學習嘅時候呢，去到而家其實都係嘅，最好有人幫幫眼，因為真係睇唔到嘅。有啲人就係做得好唔好呀，啱唔啱呀，噉可以問一問人幫幫眼，噉樣自己去確定咗，呢個手法呢個力度，可能攞化妝品嘅量啱唔啱呀。我相信就係慢慢慢慢練習呢，噉啲好基本好基本嘅，就已經可以做得到，即係佢例如係化咗妝出到街嘅一個狀況。噉對我而家就ok㗎啦，我唔使要化多個好靚好靚嘅妝，但係起碼化到個妝，遮咗一啲男性嘅特徵，以至到我可以出到去，變咗大家睇到佢囉，望落去都似一個女仔嘅。噉就已經係ok㗎啦。對我而家學化妝唔係為咗話，我要好靚好靚，而係話我要做到一個好基本嘅嘢，我出到街噉就ok啦。
M：嗯，用一個我近排睇到一個網媒嘅一個訪問去做一個回應。佢嗰個訪問就係訪問咗幾個，叫做俗稱巴膠，即係對於巴士有發燒友嘅，有興趣嘅人。噉樣，噉佢係幾個盲人嘅巴膠。佢哋係用，點講呢，佢用手機啦，影咗相，跟住將嗰個，即係可能嗰啲叫做，圖像辨識嘅方法呢去，即係講聲音俾自己聽到，嗰個係咩車，或者甚至係佢已經用咗聽覺去知道架車揸到乜嘢嘅距離，係幾多個聲音，即係有幾大聲嘅情況之下，影相嗰個角度係啱嘅，以及到係，甚至佢上車嘅時候隻手摸到個車頭，個玻璃膠，即係嗰啲玻璃膠，佢就可以摸得到，咦，嗰個玻璃係新定舊。噉啱喺呢段時間裏面準備呢一個訪問之前，我都睇到呢個訪問片嘅時候，我就會好深深地感受到係盲人佢哋去掌握一啲細節嘅位呢，同我啦，睇得到嘅人係，當然係唔同啦，但係其實佢哋嗰個掌握嘅位，唔係比我哋想像中嚟得噉困難。其實係可以透過說話，透過好多嘅說明去知道嗰個角度，份量。噉當然你，例如話佢最後，即係嗰幾位巴交，佢最後都可能會問一問我，喺座場嘅記者，咦，我個角度ok唔ok，但係通常個記者回應都，影得好好呀嗰個角度影得，影曬成架車噉樣。我覺得呢一個係，我會希望係一個傷健，即係喺一個喺個社會裏面互相協助同包容嘅一個過程。可能有啲位我自己，縱使我化完個妝，我都要比一個睇得到我樣嘅人，問我條頸同我塊面個色有冇差太遠，變咗會唔會變兩截色呀，或者可能係我額頭嗰個粉夠唔夠會唔會變一種，我根本都未上到個額頭頂，嗰啲髮線嗰個位我已經搽完呀。呢個過程我覺得係大家都會經歷過，只不過係操作嘅過程當中，當我哋以為係理所當然係噉做㗎啦，唔係噉抿就抿上去㗎啦，唔係噉搽就搽上去㗎，條線就噉樣畫上去㗎啦嘅時候，對於盲人嘅操作方法就會細緻好多，會有特定嘅角度，特定嘅力度。我哋睇到嘅嘢，注意嘅位係會唔同，亦都多謝Priscilla可以好仔細地同我哋描述到呢個過程。接著落嚟呢就有啲少少嘅，可能理解多啲香港嘅一啲問題。噉就係想問下，即係盲人圈子裏面嘅一啲狀況，想問下，其實你會覺得係盲人互助組織裏面，性小眾嘅部分多唔多嘅呢？
P；我會噉講嘅，有，但係唔多，而且都係好隱藏，因為其實呢，喺每一個弱勢群體裏面，無論係殘疾群體定係性小眾群體，我諗馬天娜你自己可能都會有噉樣嘅經歷嘅就係，係呢群體裏面，互相嘅差異或者所謂嘅是非，其實特別多嘅。噉唔知點解㗎喎，所以呢，當你係一個小眾群體裏面嘅另一個多元小眾嘅時候，其實你唔係好想畀人知㗎，因為你唔知道，人哋知道會有咩後果嘛。噉所以就，基本上係，呢個圈子除非真係好close嘅人，如果唔係呢，係唔會知道對方係一個性小眾，性別小眾。所以就，我知道係有，不過，其實為數並唔多。
M：調返轉頭我又好奇，頭先我講到係，視障人士，盲人組織裏面嘅性小眾，你會覺得你認識嘅盲人嘅朋友們佢哋會唔會多接觸同志嘅團體呢？呢個雙向嘅。
P：我諗唔會囉，因為呢，盲人嘅社會又同大社會一樣，好坦白，大社會係咪好多人接受同志，大家有冇講到，我諗對於視障群體一樣佢都係社會一員，佢喺呢方面嘅諗法同一般人嘅分佈唔會相差太遠。唔會因為盲人圈係一個都係一個弱勢群體，佢對於另一個所謂弱勢群體，例如性小眾。佢會多啲嘅包容，多啲興趣去接納。我先幾日先同一啲喺圈內服務嘅朋友講過，傾過計，佢哋都會話，視障群體嘅性取向或性傾向嘅意識，或者佢哋嘅性別意識唔係好高喎，都需要呢一啲嘅教育多少少，做多啲。變咗，所以佢同一般人其實，嗰個個分別並唔大嘅我覺得。
M：噉你覺得既然嗰個分別唔大嘅話，作為我哋睇到嘢或者係，會比較多用其他唔同嘅媒介，例如用社交媒體或者係用影片噉樣嘅我哋，有冇方法可以令到視障人士更加融入得到呢？
P：我諗個情況係呢，而家視障朋友用社交媒體啦，睇YouTube啦，睇唔同網上資訊其實都好方便，我諗個問題唔係資訊唔對稱嘅問題，要搵嘅一定搵得到，要睇嘅一定睇得到。只不過佢哋嘅mindset就係，大家會唔會好著意去瞭解呢一個佢哋個群體以外嘅另一啲群體，一啲嘅狀態。我諗視障朋友因為有時佢覺得自己生活，或者我哋我作為視障朋友有時都會係，我哋生活已經好多嘅挑戰，好多嘅issue需要去處理，但我哋仲冇噉多嘅精力，或者我哋嘅專注會放喺其他嘅弱勢群體裏面，唔好話性小眾啦，就算係殘疾群體嘅需要都唔係噉多視障朋友咁關注嘅。大家聽到呢度就會話其實，係多重嘅性小眾或者多重身份嘅人當中，其實佢有自己嘅比重，即係每一個無論係佢個人自己自我認同，以及到佢身邊嘅朋友家人朋友之間，以及到佢嘅狀況喺個社會裏面嘅待遇，其實有好多處理嘅比重。可能我今日我撥咗個時間去做一個訪問，可能其他人當中其實覺得冇乜大不了，亦都有可能會覺得呢樣嘢好重要。藉住Priscilla嘅嗰個回應，我會覺得，冇錯嘅，當我哋希望一邊希望可以促進到呢個共融嘅情況之下，我哋都同時要尊重其實多重身份嘅人，其實佢哋自己係點樣睇呀，佢嘅時間，以及佢嘅精力係花喺咩嘅地方。喺溝通同埋互相協調之間我哋需要達到一個平衡。噉頭先其實我就暗地就做咗好多不斷講呢個電子書嘅部分，你會唔會想講多少少關於自己嘅電子書，或者係一啲你想宣傳呀畀我哋知道嘅嘢。
P：我之前就做咗一本嘅電子書啦，噉其實就係一啲我自己寫，係一啲關於我作為一個Crossdresser，或者係一個跨性別嘅經歷嘅裏面呢，一啲嘅體會。噉亦都係有朋友邀請我成為一個Crossdressing嘅模特兒，一個嘅經歷啦。我寫咗十幾篇嘅文章，噉亦都裏面呢都插有一啲，我嘅女裝嘅唔同造型嘅照片噉樣。噉係一本電子書嚟嘅。噉當然啦需要啲嘅製作費用啦，噉所以呢如果大家有興趣嘅話呢，噉亦都可以同我聯繫啦。噉我可以呢將呢本嘅電子書啦，用一個收回成本嘅一個嘅模式，同大家去分享啦。噉以至到大家可以睇到我嘅故仔啦，噉樣囉。即係希望都同大家去用Priscilla身份呢，去做個朋友啦，去分享多啲有關於跨性別，有關於自己一啲嘅經歷或者故仔啦。我相信失明嘅跨性別者對大家來說呢，都係一個好特別嘅一個體驗嚟嘅。多謝馬天娜俾咗今次嘅機會我同大家分享啦。
M：多謝你，亦都多謝你嘅時間。有一個問題我要問清楚，如果人哋要買書嘅話點樣搵到你呀？
P：我可以將我嘅Facebook俾馬天娜嘅，噉你可以將佢放上去出街嘅時候，放上去你哋個平台啦，噉就可以做得到啦。你覺得有冇其他方法可以再方便大家？
M：好，收到，非常之感謝Priscilla今日嘅分享。噉頭先講到嘅電子書以及搵到Priscilla嘅方法，稍後我哋會再放番喺呢個節目裏面嘅description嗰度嘅。噉喺每一集嘅結束呢，我哋都會有一個總結嘅收結啦。噉我呢度呢就嚟講下啦，點知講同志係一個以香港同志角度出發嘅Podcast，希望可以將大家生活裏面嘅同志同埋性別嘅議題，用廣東話嘅聲音同文字嘅方式保留同流傳。每一集Podcast我哋都可以製作文字嘅檔案，噉專屬網頁。我相信去到你而家聽到嗰度呢，就應該on咗line㗎啦，係啦。噉就記住多啲留意同埋都可以多啲嘢分享啦。多謝你收聽呢個節目啦，而且聽到嚟呢到最後。噉你想收到下一集嘅內容就除咗訂閱我哋呢，即除咗subscribe我哋之外呢，你都可以多啲follow下我哋嘅Instagram。噉我哋都可能有啲討論啦，或者亦都希望你可以多啲share我哋嘅post，畀其他人知道。噉如果你對於呢個主題有共鳴，或者你想分享你嘅故事，或者你身邊嘅人嘅故事畀我哋知道嘅話呢，都歡迎你DM我哋Instagram: pridelabhk。噉喺你哋訂閱嘅平台上面留言。
或者畀星星嘅回饋，或者畀任何嘅feedback呢，都會係我哋默默交換嘅動力嚟嘅。噉今集就講到呢度啦，非常感謝Priscilla嘅時間，期待下一集同你點止講同志。嚟啦，Priscilla，我哋講拜拜。
P：拜拜。
M：好，Thank you，拜拜。