Ep.52【喺度講喺度散】靈性出櫃，同你占占 (Feat. 棍兄@喱啲塔羅)

M：馬天娜

G：棍兄

M：歡迎返嚟《點止港同志》，我係主持人馬天娜。呢一集我要多謝我嘅 Podcast 嘅製作群，因為佢哋係 Wishlist 希望可以邀請到呢一位嘉賓上嚟做呢個訪問嘅。撳返去個 Instagram 先知原來我係時不時都會望到呢一位嘉賓嘅 Post 嘅，噉所以呢，今日都係抱住一個興奮嘅心情去同呢一位棍兄做一個身心靈加同志加 LGBT 啦啦啦嘅一個分享與討論噉樣啦。噉我哋歡迎棍兄@喱啲塔羅，同大家 Say 個 Hi 先。

G：Hello，大家好，我係棍兄，係嘞，噉平時有做開塔羅同埋占星嘅。噉我自己叫棍兄嘅原因係，冇啊純粹自嘲自己係神棍噉樣囉，係，即係講返我本身嗰個名喱啲塔羅，係想有一種貼地少少、搞笑輕鬆啲嘅方式去處理身心靈嘅東西噉樣囉。

M：因為有好多人都會覺得，講起呢身心靈一定係啲…成日都講啲離地嘢，成日講嗰啲形義上嘅嘢嘅，啲靈呀全部都係浮喺面嘅嗰啲東西。所以呢，係呀，所以可以搵到一個 Layman 一啲嘅塔羅呢，我真係正中我下懷，我都好想搵啲人同我去解釋下一個 Layman 嘅身心靈解讀噉樣。噉我自報家門先，噉我自己呢就讀性別研究啦，噉亦都適逢即係搵棍兄嘅一啲其他訪問時，都知道原來佢讀咗呢個文化研究嘅碩士嘅，即係有可能有啲多少少一啲相對下可能接觸到社會呀、文化呀、性別嘅一啲相關嘅認識噉樣，去做呢一個身心靈嘅解讀啦，可能會有多層嘅解讀。

G：我自己…我有個少少補充啦，因為呢其實呢，我讀文化研究嗰陣時，我個 Course 呢係都真係同  Gender Studies 有關嘅，噉而我篇 Essay 都係，講關於身心靈同埋呢個同 LGBT+ 呢個圈嘅之間嘅關係。

M：正呀！因為我利申，我係唔知道棍兄之前寫嘅論文係講咩，但係既然佢而家已經帶咗呢條題目，噉一定要就住呢條題目去問下先。噉我再補充少少自己嘅少少嘅經歷呢，就係我本身有俾人占過呢個塔羅牌，但我自己就冇幫人占嘅，而我就有接觸過呢個叫阿卡西紀錄嘅東西，噉就棍兄同我涉獵過嘅身心靈嘅嘢，就有啲唔同。噉但係都係算係…如果你係未接觸過呢個身心靈嘅層面嚟講，你就姑且暫時用一個…都係呢啲 wee won 嘢 （編按：wee won 沒有中文字，語境為中性，泛指形而上、怪力亂神事物），接觸過呢啲 wee won 嘢，噉我哋點樣落地呢？點樣將呢啲 wee won嘢落地呢？噉而家就正式開始傾下呢個…同志與身心靈嘅討論噉樣。好，首先想問下棍兄，你係點樣接觸到呢個占星同埋塔羅嘅呢？

G：其實呢，呢啲所謂 wee won嘢呢，我細個呢都幾驚下嘅，因為覺得嘩，即係啲…啲傻嘅先至喺度信埋呢啲噉嘅嘢噉樣啦。噉但係自從即係人越大，你遇到嘅困難，不論係人生呀，愛情呀，各樣嘅嘢都好，你有啲嘢好不解嘅，噉以至到你係真係需要一啲比較…即係好似唔係咁科學嘅嘢去解釋一下，去慰藉一下啦。噉於是嗰時候我就俾朋友得咗的咗去睇吓塔羅噉樣，去睇下啲星座嘢噉樣，跟住然後從中係得到一啲嘅答案同慰藉，噉因此而有啲興趣，然後就上咗呢條不歸路嘞。

M：噉其實你而家目前嚟講，你都係全職做塔羅同占星師㗎係咪呀？

G：冇錯冇錯。

M：噉你決定要真係做全職之前，你之前係咪有返過工，定係你讀完嗰啲 Course，噉你就做？

G：我冇…其實我冇話一個決定：「嗯，好啦，我而家要去做一個塔羅師，我要做占星師」噉樣。而係有少少…因為嗰陣時，即係我做咗呢一個行業都三年四年啦，嗰陣時係咁啱 COVID 嘅，而本身我係做緊 PR 工作，而我個老細就無啦啦有一日去同我講話，我嚟緊要放你去 No Pay Leave 喎。噉然後我就好無助，然後我就自己去嘗試學吓塔羅，學吓學吓，跟住然後我啲朋友又覺得好準，跟住然後又好 Random 噉樣去幫其他人，慢慢慢慢就儲咗一堆嘅客群，然後就好似…冇一個界線地變咗一個塔羅師噉樣囉。

M：如果用一個身心靈嘅說話嚟講，就係呢個係一個良好嘅時機：你嘅上司趕你走，噉你就可以正式去步入呢一條全職嘅身心靈嘅不歸路噉樣，哈哈！

G：冇錯，係呀。

M：OK，好呀。噉我自己都分享吓啦，我都有涉獵到少少 wee won嘢嘅，噉我涉獵嘅 wee won嘢呢，就唔係因為感情關口，但係係因為一個好大嘅疑團。噉就係因為我當時候嘅前度，即係我當時候嘅伴侶，而家係前度啦，某一年呢，佢就同我講話佢睇咗呢個阿卡西紀錄，然後就好似如夢初醒緊到，甚至受到神召一般噉樣嘅一個反應啦，然後同我講話佢要去搵呢啲即係相關嘅課程去學。噉學完一年課程之後呢，就成個人嗰個世界觀就唔同咗，然後，佢就即係同我講嘢嘅時候，嗰個論調都好唔同。跟住我就覺得好難接受呀，所以我就諗，即係如果我呢個目前嚟講係完全聽唔明佢講嗰啲咩 wee won嘢嘅人，去學呢一門…即係呢一樣嘢，噉我會點樣去解讀呢個世界呢？我會點樣去解讀，即係我會唔會同佢諗一樣嘅嘢呢？噉我就去學咗呢一樣嘢，從此就 Sort of 有少少接觸噉樣，但我而家係佛系去接收呢啲 Case嘅。

G：你係真係有 Run 有，即係用呢樣嘢去賺錢噉樣嘅？

M：錢係有嘅，但係我係完全佛系囉，因為我本身有正職嘅，係嘞。噉我因為我學咗，噉我又唔想好似即係廢咗武功噉，噉就即係當時學咗嘢就算啦，噉我就諗住噉如果有人，即係 wee won啲講句，即係有一個緣分要搵到我去睇呢，噉你就喺我 Weekend 嘅時候搵我睇。

G：係，我好相信呢，即係呢啲身心靈工作呢，冇乜一個必要係話我要好努力，跟住然後突然之間變到去一個唔知乜乜嘢噉樣。因為呢啲通常係去到某個關口，某個 Moment，可能好命運嘅安排，以至到你可以或者係你會吸引到好多人去同你做相關嘅東西。所以，回應返你本身嗰個問題，係話即係點樣去變咗個塔羅師嘅話，即係我好相信大多嘅身心靈工作者都冇一個好決意嗰一刻，佢就變咗做一個塔羅師噉樣。

M：我身邊…即係以前我有搵過人占過㗎嘛，噉我搵嘅嗰啲人呢，有一兩個都係我認識嘅朋友嚟嘅。佢哋都唔係好似搵工噉樣去做呢個塔羅師，即係佢哋好似係因為接觸咗然後有個 Feel，跟住就去更加了解塔羅師呢一樣嘢，甚至係呢個占星呀，其他嘅一啲身心靈嘅解讀呀噉樣，而家有好多唔同呀，五花八門噉樣。

G：我覺得呢個係有趣嘅位，即係同其他職業唔同呀。即係你要做設計嘅，你要好努力噉砌你嘅 Portfolio，你要讀法律嘅，噉又要係噉日夜噉刨書；噉但係身心靈，佢係一個奧妙嘅位係在於要好講求經驗同埋個人經歷呀應該噉講，所以你就算再努力都好啦，未係嗰個 Moment 嘅時候就真係未必會做得到，所以呢個係我覺得係比較有趣。

M：係呀，嘩，即刻成個嗰個 wee won Mode，感覺到即係個 Timing 嘅問題。我哋成日都好似講緊呢一樣嘢呢，我哋即係…點講呢，我知道有一派人係好鍾意睇人哋有冇證書嘅，即係目前我自己個人嘅理解嚟講，就係個人經歷會勝於一切啦。

G：係呀，係係係，十分認同。

M：Yes！好，噉我返返去講到你嘅畢業論文啦，噉亦都講到即係你有接觸過一啲 LGBT 嘅人，噉先帶到落去你做呢個身心靈，或者係塔羅呢個議題做一個論文，噉就正式去問呢樣嘢嘞。你可唔可以講吓呢，即係由你大約三四年呢個工作，好，呢個塔羅師、占星師嘅經驗當中呢，認同自己或者同你講佢係 LGBT 嘅人嘅比例係大概有幾多？

G：哦 Ok，呢個真係幾有趣嘅。因為呢，我覺得大部分可能 Around 六至七成嘅，即係呢個 Queer 嘅群嘅成員入面呢，我諗…即係佢哋都係唔會好勇敢地，或者好自如地去表明自己嗰個性取向，或者係佢哋嘅 Preference。例如呢譬如可能佢哋會話，我嗰個 Partner 呢，即係其實你聽到呢啲位嘅時候呢，佢係有好多嘅懷疑同埋好似冇自信嘅感覺，即係縱使我都表明到，我係好 Open 呢件事噉樣，但係佢哋都係有一種…呃……嘅感覺囉，所以其實為數係唔少嘅，所以呢個我覺得係幾有趣嘅現象。

M：噉你講到話啲性別小眾，佢哋講係例如講係 Partner、另一半，呢啲用語好明顯就係唔係直人成日會用嘅形容詞啦。噉除此之外，你係咪會覺得嚟搵你嘅 Queer 嘅人，佢哋一般嚟講自己…例如講自己工作呀、愛情呀嗰啲，係會相對嚟講冇咁有自信？

G：如果係工作嘅話，我覺得嗰個影響冇咁大嘅，又或者就算我…佢哋講愛情都好啦，我諗呢方面嘅嘢唔會話點樣去影響到佢哋點樣去表達嘅。但係一旦講到佢哋自身、自信呢樣嘢呢，就可能會差噉啲囉。

M：例如佢會問到乜嘢嘅自信問題？「點解我咁冇自信？」噉樣？

G：唔係呀，而係譬如佢哋點樣去睇自己呀，又或者係，可能有啲人佢哋冇自信，係因為源自於覺得自己做唔到份工呀，或者係對方唔鍾意自己呀噉樣。噉但係啱啱提到嗰個自信，自身嘅自信問題係就係，佢哋本身去睇自己都好似覺得自己好多 Flaw 呀，好多缺陷呀，Ok，唔係講緊外界其他人點樣影響佢哋，而係佢哋自己睇自己都覺得好似差噉啲。而我相信，即係當然啦，呢個我都覺得係好關其他人去點樣去睇同志呀，或者其他性小眾嘅態度啦，佢哋可能大多都唔係話太過接受呀，又或者有好多問號嘅時候，就會令到啲性小眾係好唔知點樣講，跟住算啦收埋啦噉樣，就慣咗變到就係好多嘢都唔講咁多嘞。

M﹕嗯，所以你喺同你嘅客人傾嘅時候，你會發現即係 Queer 或者性別小眾嘅客人，佢哋有陣時講講吓，就講「算啦呢啲我哋唔講嘞」，就唔特別再詳細講落去。或者係會覺得佢可能其實喺外面生活嘅時候，好多遇到嘅一啲挑戰或者係奇異嘅目光，導致佢自己對自己都建立咗一個唔自信，覺得自己係有啲問題噉樣。

G：你歸納得好好，不過呢，我以我觀察呢，其實唔真係…唔 Exactly 係外界畀啲乜嘢歧視，可能外界有好多唔明白，但係性小眾嘅朋友呢，就可能會覺得人哋歧視佢哋囉。

M：哦，即係佢真係會同你分享，就係佢聽到某啲嘅行為或者某啲嘅互動，跟住佢又覺得呢件事佢俾人歧視？

G：係呀，或者最簡單嘅就係有好多嘅同志佢，喺職場上面唔敢講自己嘅性取向噉樣，永遠講起幾時拍拖呢，都應該係講話哈哈哈哈噉樣就帶過咗去嘅。我就問，點解你唔去表達一下，去同人哋傾下呢？跟住佢就話，唔知呀，我驚囉，我驚人哋唔接受囉。然後跟住我又會再追問，你係因為見到人哋平時，譬如佢哋可能有宗教嘅信仰，定係點樣以致到你唔敢講，即係佢哋唔止一個啦，佢哋都會話，唔知呀，我唔敢講囉。

M：嗯…所以嗰啲同你講話佢唔敢講，唔敢講咁多嘅嗰啲人通常係幾多歲呀？

G：都廿幾三十歲。

M：即係出咗社會返工嘅嗰啲年輕人。

G：係嘞，冇錯冇錯。

M：噉我順帶問下，你 Serve 客嘅年齡層大約有幾闊呀？

G：如果話幾闊嘅話，係 DSE 畢業去到四十尾都有嘅。但係比較多呢，就係29…即係 Around 30呢啲歲數。

M：嗯，三十而立，呢個歲數真係人生其中一個一大關卡。

G：冇錯。

M：當啲直人成日講話30歲要結婚嘅時候，可能好多性別小眾，有啲 Queer 嘅人，喺30歲嘅時候仍然都係有好多內心嘅嗰啲叫咩…虢礫緙嘞嘅東西未梳理得到。

G：呢個都係一個好有趣嘅位啦，即係我哋中國都講緊話係三十而立啦，噉但係呢喺占星角度嚟睇呢，土星回歸呀，即係去到29、30歲呢個 Moment 嘅時候，人生係會有一定嘅反思，去諗返究竟我係一個點樣嘅人呢？所以呢一個就…不論你男女老幼，攣直點樣都好，30歲真係一個關頭嚟嘅。

M：係喎，你講土星回歸，我聽到呢個 Term，我諗起之前接觸過人哋幫我睇人類圖呢，佢都有幫我去睇下我30歲至40歲，即係土星回歸嘅呢段時間，我係要有啲乜嘢嘅挑戰，跟住有啲乜嘢特殊嘅嘢要面對。即係除咗要考慮你人生要走到咩階段，你所謂嘅乜嘢有車有樓、結婚、生仔，乜乜乜嘅 Target list 之外，其實係睇自己嘅個人……嘩，突然間飆咗啲好身心靈嘅嘢，啲課題上面嘅嘢呢，其實都開始浮現咗出嚟噉樣。

G：係呀，係，冇錯。

M：好，既然你講起話呢個性別小眾嘅客，佢哋好多時候都覺得呢個社會未必會完完全全畀佢暢所欲言啦，噉亦都，頭先你都講起個例子，講到佢哋拍拖嘅時候，佢哋就唔係好敢去講噉樣，噉我又想知佢哋通常嚟搵你，佢哋係會問乜嘢範疇嘅問題呢？

G：其實冇特定嘅，但係如果你要講排序嘅話，最多係愛情，第二就係事業，第三就係移民噉樣。

M：即係目前嚟講，香港嘅酷兒們都係會考慮移民呢件事嘅，噉都正常嘅。

G：係，我諗嚟緊又會再有多啲人問。

M：我自己好奇問，因為我人其實而家就唔係香港住嘅噉樣，噉佢哋問移民呢，通常係點樣問嘅，即係我 Go or no go 噉樣？定係佢會畀三個選擇，即係呢個例如臺灣、英國、加拿大，噉你幫我揀一個噉樣，即係佢會點樣問嘅呢？

G：呢個就好視乎佢本身係諗緊啲乜嘢。我答佢哋嘅方法係講，如果你揀咗呢個 Option 嘅話，會有啲咩咩咩嘅狀況，你唔揀嘅話又會有啲咩嘅狀況，跟住然後畀佢哋諗去做咩決定，而唔係我幫佢哋決定。

M：呢個就應該係抽牌嘅時候，就可以畀佢反映到，即係如果佢係 ABC 嘅 Option，就會有啲咩事情發生噉樣。

G：係嘞係嘞。

M：講起塔羅啦，跟住又講埋占星嘞，我想分享我自己嗰個近排嘅經歷先。其實我本身就唔係一個每一年都會去占嗰啲流年運程嘅人嚟嘅，噉但係今年呢，我又總之兜兜轉轉啦，唔知…我自己都唔係好記得我當時搵咗啲咩，總之我就搵咗一個，用五行幫我占流年嘅人啦。占咗之後，傾偈之後先知，原來對方係一個 Gay 嘅男同志嘅，唔知叫咩…五行師傅噉樣。噉佢就同我講話，我同一個同性結咗婚，跟住我就點樣發展，所以佢成件事係聽得好明白嘅，即係佢唔會突然之間講話，咩咩傳統五行呀，咩中國人思維，其實就覺得咩同性乜乜乜。即係佢自己係用另外一個 Level，另外一個解讀方法去解讀五行，即係咩嘢係配合我嘅五行，我應該做啲咩行，做邊行之類之類。噉對於你嚟講，你用占星，即係你做占星啦，會唔會係因為你對於文化研究性別嘅認知，你會有多一個解讀嘅呢？即係會有個所謂嘅傳統解讀定係有個新嘅解讀？

G：哦，即係對於性小眾呢樣嘢……首先我本身都係 Gay 嘅，噉所以變相我對於呢樣嘢嗰個文化係，係成件事…嗰個圈係點樣玩法呢，都略知一二嘅。噉而我去讀文化研究呢，嗰個幫助係在於能夠用一個鳥瞰嘅方式去觀看呢個社會囉，因為即係譬如可能我哋當…唔好講話一啲性小眾嘅新聞，可能我哋當一啲八卦新聞娛樂新聞噉樣，噉你好容易就俾啲標題或者係一啲好局限嘅資訊去影響到自己觀感嘅。噉而我覺得我去讀文化研究對我嚟講最大嘅幫助就係，可以好抽離地去望返遠少少成件事，去分析…即係客觀地去分析多少少，以至到，即譬如我當用噉嘅角度去分析返一啲性小眾嘅一啲嘅疑問嘅時候，我都唔會咁 Personal 去睇呢件事囉。

M：可唔可以舉個例，就係當你學咗嗰啲塔羅或者係占星嘅時候，佢可能有一個說法，但係喺你眼中你係有另外一個解讀嘅，即係有冇舉到一啲類似嘅例子？

G：哦，首先即係我都幾相信呢，身心靈嘅不論係占星又好，人類圖又好，紫微斗數都好啦，所有嘢都係建基於當下嘅文化嘅。即係唔能夠係因為話，可能唔知幾多年前有呢個噉嘅學說，所以我哋就跟返嗰一套。噉所以變相呢，係身心靈嘅東西係真係要與時並進嘅，以至到其實你啱啱提到嗰啲甚麼五行嘅嘢呢，占星都有類似嘅，即係我哋講風火水土四個元素。噉而我會話，譬如我當係水，呢個你個人缺水，其實某程度上講緊話你對於感受嗰個 Sensitivity 唔夠高噉樣。噉而呢個位呢，我會話…就未必同我讀文化研究有關嘅，我反而會話，文化研究幫到我嘅東西係點樣可以唔好太過 Personal 噉樣去 Judge 一件事。因為我哋去做身心靈嘅嘢呢，係好需要去畀 Advice 㗎嘛，噉如果你太過有個人嘅情緒、個人嘅觀感嘅話呢，噉就好難去畀到一個叫做客觀嘅意見噉樣所囉。

M：所以就可以用…即係喺你講你嘅意見，講你嘅解讀嘅時候，就會有多一重…即係多幾重嘅思考去諗下你而家畀嗰個意見係咪太 Personal，太主觀嘅意見。

G：嗯，係嘞。譬如我舉一個例子啦，即係譬如我當可能有個人面對一個恐同嘅人噉樣，噉可能一般人就係話嗰個恐同嘅人點解可以咁冇禮貌㗎嗶哩叭啦噉樣啦。但係可能當你讀咗文化研究或者 Gender Studies 嘅時候，你就會可能用另一個角度去分析嘅嗰個恐同嘅人，其實係因為父權社會底下去影響到，以至到佢有噉樣嘅反射動作噉樣啦，即係成件事好似好抽離，好學說噉樣。而但係成件事係會解構到，即係件事嗰個來龍去脈，更加令到件事嘅來龍去脈更加清晰，而唔係純粹就係話佢呢個人……

M：咁衰㗎！

G：即係恐同喎，係囉，噉樣。

M：我明我明我明。有陣時有一啲嘅好心嘅 Ally，其實真係一股好心嘅，噉但係佢想安慰一啲可能嗰一刻真係受到唔公平對待嘅酷兒們嘅時候，佢哋就會純粹講，「佢咁衰嘅唔好理佢！」其實係好弱嘅呢個噉樣嘅安慰嘅說話，因為你要諗下，其實嗰個 Queer 唔會就係…唔係一朝一夕去接觸呢一啲噉樣嘅言論，佢一定係好多時候無論係嚴重性強與弱都好，都會有受到噉嘅情況。之後你就純粹講話你唔好理佢，噉唔通我唔理全世界嘅人咩！我身邊咁多人，可能佢其實暗啞底純粹可能係問你一個「噉你會唔會帶你男女朋友嚟」嘅時候，你就已經覺得好難解釋清楚畀你聽添，噉已經係一個難處啦，即係唔通我唔理我同事咩，哈哈！係嘞，噉講到用呢個 Bird eye view，用呢個鳥瞰去再解剖一件事或者解剖一個現象啦，講起現象，你會唔會發現喺你自己嘅工作經驗裏面，會唔會發現到多咗同志去接觸身心靈呢？

G：如果你講話係咪純粹同志多咗呢，我覺得未必係，而係成個社會都係趨向係呢啲比較 wee won嘅嘢去研究多啲囉。真係不論咩年齡又好，定係你嘅性取向係點樣都好，其實係成個世界都向緊呢方面去行，所以我會覺得反而呢個位就無分，即係喺性別嗰方面個影響我諗唔係話太大。

M：有人聽到呢度可能就會企出嚟就話，挑！馬天娜成Q日都係將啲嘢扣落同志度，好似好鬼特殊，同志總係有啲咩唔一樣，我就想同大家解釋下點解我會問呢條問題先。就話說呢，喺我嘅女同志圈子裏面，係會有一派嘅人特別去用身心靈嘅嘢去解說佢嘅感情之路，跟住又講下佢鍾意邊一類嘅人，佢淨係同邊一類人嘅人家拍拖。噉呢，所以喺我認識嘅女同志圈子裏面，成日都圍繞住星座嘅。而我發現我認識嘅男同志圈子，佢除咗會講星座之外，仲會講水晶啦，仲會講譚崔呀，跟住有好多身與心靈嘅東西都會涉獵得到，仲要係喺呢段一兩年嘅時間裏面。所以我就會好奇，喺呢個業內人士嘅角度嚟講，有冇增加咗呢樣嘢，所以就有呢個問題。

G：我會有少少補充嘅，一路以嚟即係譬如我當講星座，都俾人哋覺得，啊，呢啲女仔嘢啦噉樣嘅，即係男仔講呢啲好女人呀噉樣啦。噉其實係講緊話我哋每個人都始終有一定程度嘅陽光同埋陰柔嘅氣質，噉而的而且確，譬如可能喺男同志圈度，噉比起啲直男嘅話，嗰個陰柔嘅特質係應該重少少㗎嘛。噉而陰柔性質比較強嘅人呢，係會偏向去用感受，用直覺去一啲…去 Feel 嘢多少少嘅，噉而身心靈呢，就係偏向呢方面嘅嘢，所以就似乎好似多啲囉。

M：同意，即係以我自己嗰個小小嘅圈內觀察呢，接觸身心靈嘅，好似都係偏陰柔氣質比較重嘅 Gay 佬嘅。噉我又我…即係掉返轉頭我又諗緊，即係呢樣嘢唔係陰柔嘅人先專屬嘅，即係只不過係因為陽光嘅氣質嘅人呢，成日都好鬼死鍾意強調人呢要硬朗，即係啲嘢好似係命中注定噉樣嘅，你就認命啦，你就唔好諗咁多嘞。

G：唔好講咁多，係呀，哈哈！

M：所以就，即係佢哋唔會特別去諗嗰啲感受嘅東西噉樣。

G：嗯，係。但係呢個大趨勢呢，其實不論係咩性取向，男定女、老定幼都好啦，係一定會講更加多囉。

M：同意嘅同時呢，我都想攞棍兄嘅其中一篇 IG 嘅 Post 去講下，就係叫做靈性出櫃呀。噉呢，一開頭我都有講起話我接觸…有少少接觸呢個身心靈嘅圈子噉樣，其實我都好耐之前接觸，好似大約零…14、15年去學呢一樣嘢啦，呢個阿卡西紀錄。喺嗰陣時到而家，無論喺香港同台灣都多咗好多呢啲噉嘅課程，即係可以話其實有求就有供（口誤）㗎啦，所以呢一樣嘢都反映得出係多咗啲人去想學身心靈相關嘅一啲學問，即係阿卡西紀錄只不過係一個…一個例子，仲有其他唔同嘅嘢。我相信棍兄，佢嘅…即係佢嘅用字，或者我哋兩個溝通嘅感受，我自己主觀地判斷啦，我哋兩個應該係差唔多年紀嘅人。我覺得喺而家步入廿零三十歲嘅人呢，開始去意識得到自己可能遇過嘅一啲心靈嘅創傷，即係成長嘅時候遇到嘅一啲嘅創傷或者係一啲困惑，而佢哋開始真係想鑽研自己嘅創傷嘅時候，佢哋往往都開始想用身心靈嘅方法去做一個療癒、解讀、說法、解套，噉樣都有，都係我覺得都好正常。

G：即係因為尤其係而家呢，物質係唔缺㗎嘞某程度上。噉去到噉嘅位嘅時候，你就一定要搵一個更高嘅，即係需求去滿足自己嘅…而身心靈就係一個出路囉。

M：嗯，物質，物質係的確而家係非常之豐裕嘅，即係，啊，而家望到啲比我年輕嘅小朋友們，佢哋啲拎住嘅嘢都比我更加豐富嘅時候，即係感覺到好似成個世界，嗰個世界觀好唔同。即係由以前啲人，佢哋嘅道德觀係一套，而家啲人就好似覺得只要你包裝得唔夠多，你就唔可以立足，有好多內心，內心好空虛、內心好寂寞嘅嘢，好似講唔出嚟。即係縱使你而家呢，我有陣時都有同朋友講嘅，縱使我哋而家有好多 Social media，可以有好多途徑去 Show off 自己嘅東西，但係一到頭嚟，返返去你熄咗部電話之後，剩低就係得你自己，所以嗰個落差感之大，會令到好多人係越嚟越寂寞嘅。

G：係啦，噉而因為實在太多嘅資訊，其實可能某程度上大家都冇一個 Practice 去點樣去面對自己，噉所以變相就有好多人更加會唔開心。而如果想開心嘅話呢，都真係要去喺身心靈嗰方面去有多啲嘅 Practice 同埋去了解多啲，噉先至可能會搵到答案同埋搵到自己內心嘅平靜。

M：好，講起嘅話如果我哋要去回返…又嚟啲身心靈字眼，返返去自己嘅內在，去睇返自己嘅身心靈嘅時候，噉我去代我嘅聽眾去問下，如果有人係對於呢啲身心靈有興趣，無論係棍兄嘅占星塔羅，或者係可能你本身都知道或者接觸到嘅一啲身心靈嘅時候，一般嘅人，即係 Layman，佢哋係點樣踏出佢嘅第一步呢？佢哋未必好似你噉會有一個朋友拉你去睇呢個身心靈，噉你會有啲咩小小嘅建議？

G：冇啊，就係勇敢啲去約第一次 Consultation 囉，即係不論係人類圖又好、紫微斗數又好、定係 Akashic Records 又好。因為尤其是身心靈實在太闊，即係有十億個工具，究竟邊一個先係啱？邊一個有興趣呢？係要試㗎嘞。噉而你試完之後你會覺得好似幾有用喎，又或者係我甚至乎想學喎，噉就係要透過試先知，而唔係喺網上嘅一啲嘅介紹跟住就覺得啱唔啱噉樣。所以簡單嚟講，勇敢啲去約。

M：講起約嘅時候，我又會想問下你自己嗰個，即係工作嘅經驗呢，你嘅客會唔會係因為你喺你個 Instagram 裏面，會寫自己係 LGBT 友善嘅，佢哋有冇反映畀你聽，佢係因為你噉樣寫所以嚟搵你㗎呢？

G：呃…又好似冇人噉講過囉。係嘞，我大概會反而係覺得，或者反轉噉講，都冇乜機會會無啦啦噉樣去講，我係因為啲咩原因而搵你㗎喎，噉囉。

M：我唔知身心靈喎，但係有一啲嘅行業呢，可能呢樣嘢會係一個賣點嚟嘅，即係舉個例，例如婚紗攝影，噉可能都會係一個賣點。

G：我去擺呢樣嘢出嚟嘅原因，係因為我都真係知道有好多人…應該噉講，好多人 DM 我去預約嘅時候，就成日都會問：「但係我鍾意同性喎，噉我會唔會有分別呀？」噉樣。即係呢樣嘢呢，我係會好相信有好多性小眾嘅朋友，正如我哋一開始所睇到啦，真係會先否定咗自己啲嘢係唔得先嘅，噉所以變相我去擺呢嚿嘢出嚟，就希望令到佢哋安心，其實呢啲嘢係冇乜分別，可以問㗎，噉樣囉。

M：就係因為知道有好多嘅性別小眾嘅人，總之內化咗呢啲嘅情緒，然後就好多嘢先講咗自己唔好先，就好似自己總係爭噉啲嘢，所以呢搵人都冇咁容易，搵呢個身心靈都冇咁容易嘅時候，其實係需要多一啲嘅人，或者多一啲嘅服務提供者去肯定畀你知道，我哋知道你嘅生活係點樣㗎，但係我都可以幫到你，我都可以畀到一個解答，畀到一個解答嘅方案畀你。

G：冇錯冇錯。

M：呢一樣嘢我自己都，即係點講呢，我係好佛系嘅，我做呢一個身心靈嘅嘢我就真係隨緣啦。噉但係我自己作為，即係近排有影過婚紗相呀，做過一啲，仍然都係好多異性戀主流嘅一啲嘅服務行業嘅時候呢，我總係都係覺得，如果我係一個客，我見到嗰個服務提供者佢係有寫同志友善呢，總係會有多一個嘅肯定同埋信任嘅。

G：係。你會見到全世界有好多唔同嘅大嘅企業呢，即係會喺美國嗰個 Pride Month 度，即刻衝出嚟話自己係 Gay friendly 嘅。嗯，係啦，但係你會見到，即如果你係明眼人嘅話你會見到幾多公司係會為咗個商機而去講呢件事，有幾多真係真心去關注性小眾嘅問題而去講呢件事。即呢個我覺得大家都可以去觀察多少少囉，而唔係見到佢係寫住自己係呢個同志友善嘅喎，性別友善嘅喎，噉就衝咗過去幫襯囉。

M：哦，同意呀，之前我哋都有…好似第一季嘅時候都已經講過呢個 Pride Month 嘅商機，呢個粉紅錢錢前途無限呀嘛。

G：係呀。

M：你只會見到越嚟越多呢一啲嘅大嘅企業為咗想攬呢一班嘅 LGBT 嘅人去，即係喺特定嘅時候做特定嘅嘢，而佢哋就覺得，哦，六月總之你整啲彩虹嘢就一定有人買，噉樣。但係大家都知道自己嘅錢錢同大家嘅錢都係辛苦賺返嚟嘅，唔好就噉見到呢個彩色就抌落去，係呀，都係可以望下佢哋誠意有幾多，即係會唔會去唔講下一啲關於同志嘅嘢，關注下同志嘅新聞呀，噉樣就唔係純粹六月就做六月嘅嘢咁簡單。去到節目嘅差唔多嘅尾聲啦，我自己呢就係有一啲，點講呢，少少嘅好奇都係想問下棍兄嘅。 目前嚟講，你覺得2024年呢，我係咩星座嘅人，或者係咩星座嘅人係會過得比較順利一啲嘅呢？

G：哦，OK，呢個你畀少少時間我去望一望先。呢個唔能夠好深入去分析啦，但係如果你話比較好運嘅，應該係金牛座嘅。即係好粗略噉去講啦，我哋喺占星去睇嘅時候呢，木星係我哋最幸運嘅星啦，噉而呢一年呢木星係落咗金牛座度嘅，噉所以變相任何人如果星盤呢，有金牛嘅時候呢，其實都應該會有啲好運噉樣囉。

M：嗯，即係有啲好運 In 一啲唔同嘅層面啦，總之係有啲好運。

G：冇錯，即係應該噉講，最好運嘅應該係金牛座。

M：嗯，明白。好啦唔係我自己嘅星座，哈哈哈！但係都唔緊要，我自己就睇得好開嘅，即係我覺得星座呀，或者係呢個塔羅，甚至乎阿卡西紀錄呢，都係一啲輔助嘅工具，去令到你即係有多一個解讀或者多一個意見去為你將來嘅決策去做一個協助嘅。噉即係我自己嘅認知就係冇一樣嘢係話死嘅，即係唔會話因為而家阿棍兄講金牛座好運啲，其他嗰十一個星座都唔好運噉樣。係呀都係成事在人啦，你都係…其他身心靈嘅嘢，都係回返去自己嘅內心，然後再由自己去實踐出嚟，我覺得作為一個 Layman 作為一個凡人嚟講，就一定係要經歷嘅嘢㗎啦嘛，如果你唔使經歷呢啲嘢你就唔係凡人啦。

G：冇錯冇錯，純粹有一套…即係比較畀我叫做…苦口婆心地講一句嘅就係，唔好純粹沉溺咗喺啲唔 Happy 嘅東西度，反而你要喺嗰啲嘢度搵到呢啲存在嘅意義，即係點解你唔開心，為啲乜嘢。

M：好啊，多謝棍兄嘅心靈雞湯，噉亦都成為咗我哋今集呢個訪問嘅收結嘅內容。噉呢，喺我哋每一集收結之前呢，都會有一個經典嘅對白嘅，容許我都係讀埋呢一段落嚟啦。《點止港同志》係一個以香港同志角度出發嘅 Podcast，希望可以將大家生活裏面嘅性別同同志嘅議題，用廣東話嘅聲音同文字嘅方式保留同流傳嘅。上我哋嘅 Podcast 專頁 pridelab.hk/podcast，或者上我哋嘅 Instagram @pridelabhk 嘅 Bio 裏面就可以見到㗎嘞。多謝收聽呢個節目，而且聽到嚟最後，如果你想聽更加多呢一類嘅節目，除咗訂閱我哋之外，亦都歡迎你喺自己收聽嘅平台上面留言，或者係畀星星嘅回饋嘅，如果你有留言，我係應該會睇得到嘅，而且有機會上節目嘅。噉今集講到呢度先，感謝棍兄同我做咗呢一集嘅節目，我都自己有一種濃濃嘅窩心，就係難得遇到呢一個身心靈嘅同好。噉期待下次同你《點止港同志》，棍兄同大家講拜拜。

G：好啦，再見嘞各位，拜拜。