同志形象除咗靠外表，其實都會受到政府對外嘅宣傳，
今次快快哋同大家分享一份報告，
比較80年代到依家政府對處理愛滋病 HIV 嘅宣傳策略上嘅轉變
點出男同志社群被妖魔化嘅其中一個原因，
進步唔可能幾日就達到，我哋要睇番歷史，先知道自己其實去咗幾遠。
Ref：
ICONOGRAPHY AND STIGMA: GRAPHIC STRATEGIES OF HIV/AIDS CAMPAIGNS WHICH TARGET MEN WHO HAVE SEX WITH MEN (MSM) IN HONG KONG
https://www.sd.polyu.edu.hk/iasdr/proceeding/papers/Iconography%20and%20Stigma_%20Graphic%20Strategies%20of%20HIV_AIDS%20Campaigns.pdf
壹同資料
https://www.info.gov.hk/gia/general/202402/02/P2024020200525.htm
二○二二至二七年應對愛滋病建議策略公布
https://www.aca.gov.hk/tc_chi/strategies/pdf/strategies22-27c.pdf
1999-2001應對愛滋病建議策略
https://www.aca.gov.hk/annrep/acarep01c.pdf
紅絲帶中心
https://www.rrc.gov.hk/chinese/target_msm.html
M：馬天娜
M：歡迎返嚟《點止港同志》，我係主持馬天娜。相信大家由細到大都唔多唔少會睇過一啲電視裏面嘅政府宣傳片。曝露自己嘅年紀，同大家分享下，我細個嘅時候會聽過「雞蛋兩隻，糖呢就兩茶匙，仲有啲橙皮添」，又或者係「你點知聽日會好天㗎？唔知㗎，希望在明天呀嘛」呢啲噉嘅宣傳片，大家應該至少有一啲嘅認識。但係你哋有冇聽過政府針對男同志嘅宣傳片呢？今日就同大家去分享下，到底男同志喺政府眼中嘅模樣係點樣嘅。而今日嘅題目緣起係來自一份其實已經隔咗一段時間，喺2007年出版嘅學術文章。當時兩位喺澳洲做開研究嘅學者，分別係 L. K. Chan 同埋 Raymond Donovan，佢哋係以社會學嘅角度入手，分析香港政府同埋其他嘅社區團體打擊HIV同埋愛滋病嘅宣傳手法嘅。
從兩種對立嘅論述之中，就嚟睇下香港政府點樣去睇呢一場所謂嘅公共衛生危機。今日嘅節目就等我同大家由古到今，去從80年代嘅愛滋病應對嘅宣傳，去到今時今日嘅服務，睇下中間有啲咩係進步咗，以及需要大家繼續反思嘅地方。
講返個研究先，研究就提到，啱啱踏入千禧年代嘅時候，政府就制定咗一個叫做《應對愛滋病建議策略》，指定咗六個需要緊急處理嘅社群。而家睇返嘅話，可能年紀較輕嘅聽眾聽到呢度會覺得奇怪，即係例如緊急處理嘅社群點解會包括「往來中港的旅客」呢？原來呢一個係同當時香港嘅工廠開始北移，搬咗上深圳一帶，於是帶起咗改變嘅性產業有關嘅。而當中被劃為最高危，就係男男性接觸者，英文叫做 MSM，MSM 嘅意思就係 Men who have sex with men。即使去到而家，現時最新嘅2022至27年嘅建議策略，MSM 嘅群體仍然榜上有名，繼續係被優先關顧。好可惜啦，其實當年嘅政府宣傳係好難有作用，因為當年1991年男男性行為先除罪化，而喺呢段同性戀仍然係禁忌嘅時期，又點會有人敢現身去理政府嘅呼籲呢？另一方面，政府用男男性接觸者呢啲好繑口，咩 MSM 呢啲字，本身就係同男同志嘅社群完全對唔上嘴。雖然 MSM 呢個字喺澳洲或者係英美等地係好常用嘅，主要係想包含埋一啲自己唔認為係同性或者係雙性戀，但係會同男性發生性行為嘅男性。但係放返去香港嘅脈絡，兩位學者 LK 同 Raymond 就認為有啲奇怪嘞，因為喺當時嘅香港，男同性戀者之間多數都係用同志、Member 呢啲噉嘅身份去相認，但個咩「男男性接觸者 MSM」，佢哋又點會突然覺得政府係講緊自己呢？轉個角度噉講，如果我哋睇返民間團體嘅宣傳，你就會睇到有另一個畫面。研究裏面都提到「關懷愛滋」呢個機構，喺1998年「同志健康周」嘅海報裏面，喺入面就已經會用到同志、Member 等嘅身份字詞，去希望令到受眾，即係男同志係會睬下佢哋。同時，因為呢啲組織都會針對性地去男同志出沒比較多嘅地方，直接會派下安全套呀，做下宣傳教育噉，所以佢哋都會好直接會用多啲比較情色啲、Erotic 啲，有性吸引力、性暗示嘅畫面同標題，再加埋中英對照噉樣，去引一眾男同志去做愛滋病病毒抗體快速測試，拮手指呀嗰啲等等 HIV 嘅預防服務。例如2006年嘅一張海報呢，個標題就係寫住「篤一篤，15分鐘就出！」，聽都聽得出佢哋係玩緊男男性行為食字啦。
噉我哋返返嚟去睇返當年政府嘅宣傳，就好明顯地弄巧反拙嘞，本質上面因為佢哋嘅宣傳多數都係只係利用電視廣告呢一類面對公眾嘅渠道去播放，而呢啲嘅訊息其實係直接塑造緊大眾對男同志嘅睇法。當時喺80年代尾，主要就有兩條政府宣傳片，一條叫做《預防愛滋病（高危群）酒吧篇》，影住一個男性喺酒吧入面同另一位男性咬耳仔、眉來眼去。然後旁白就話：「用避孕套雖然係安全，但係最好嘅預防方法都係唔好性濫交。」另外一條片就更加恐怖，片入面就拍住兩個男性相遇準備前後腳離開一個地方，旁白就話：「一次性接觸便能染上愛滋病，何必冒生命危險。」講完呢一句，其中一個男嘅角色就「呯」一聲閂咗對方嘅車門，拒絕唔上車。大家聽、諗個畫面都可以想像得到，佢哋嘅宣傳唔係喺度教男同志，教啲 Member 如何降低性行為帶嚟嘅愛滋病風險，而係直接妖魔化男男性行為本身，又將男同志、性濫交呢啲字扣連埋一齊，結果就加深咗大眾對於男同志嘅污名囉。
噉好在80年代呢啲宣傳片，經過咁多年唔同組織嘅努力之下，政府嘅取態係有改變到。最直接就係自2006年開始，政府會同其他民間嘅團體合作，去發展一堆嘗試將愛滋病同男同志身份脫勾嘅宣傳。最經典就莫過於2005年嘅 Dom dom 歌廣告，唔知你又冇印象。除咗有呢個「Dom dom dom dom」，跟住有個廣告裏面就有男同志、男男嘅一 Pair，跟住就會有異性戀、酒吧嘅場景、年長夫婦，甚至連女女——應該係想表達女同志嘅角色都出現埋。雖然當時睇到呢個畫面嘅時候都唔好明女同志用男性用嘅安全套係有咩關係，不過唔緊要，但論述上面佢會用「愛自己、愛別人，要有一套」去做主題。後尾又搵唔同嘅明星去拍宣傳片喎，例如做過護士嘅楊千嬅係有出過場，係一齊同大家唱 Dom dom 歌，種種事跡都可以睇得出嗰個時期嘅政府已經轉咗用一個比較正面啲嘅方法去提示大家記住要安全地發生性行為，而唔係好似過往噉一味靠嚇，話畀你聽只要你有性行為就會有愛滋病，呢啲咁恐怖嘅邏輯嘞。再加上政府嘗試走出去大眾媒體，去同「香港同志電影節」合作，希望透過一個相對比較多同志會參加嘅場合去宣傳安全性行為，提下男同志社群要定期做 HIV 測試。到而家2024年(口誤)，我哋仲會見到衛生處轄下嘅紅絲帶中心，會有專為男同志設立嘅測試愛滋熱線，仲會有 YouTube Channel、Facebook 專頁等等，寫到明係畀 Member 了解多啲安全性行為，同埋定期自我測試嘅資訊嘅。此外，因為早前猴痘 Monkeypox 喺男同志社群有出現比較多嘅病例，衛生處亦都因為呢個原因主動聯絡咗大大小小嘅同志組織，希望透過發放多啲資訊落同志社群入面，而更加有效去做好公共衛生嘅議題。最近，衛生處亦都宣布咗，為咗提供全面嘅預防愛滋病服務，就會喺現時嘅油麻地男性社會衛生科診所入面，開設一個以性小眾為服務對象嘅服務中心，叫做「壹同」。佢本身服務係需要經過轉介先可以用嘅，但係而家都特別開放咗畀同志組織去報名去望下，參觀下個服務，或者係幫手轉介有需要嘅人去輪候呢個服務。直到近幾年，政府宣傳亦都開始多咗去提及跨性別嘅人士，尤其係跨女嘅感染風險，希望就從防治入手，多方面去讓有需要嘅社群去接觸實用嘅資訊。
由80年代到而家，佢哋嘅轉變係有啲進步嘅。雖然講到有啲進步，但係我哋都要反思，係咪社會大眾就咁可以咁快撕甩晒一啲既定對於男同志嘅污名呢？我哋而家見到其實都有好多反同嘅團體，甚至連登呀、討論區都繼續會以肛交呀、濫交呢啲行為放大嚟睇，然後將愛滋病呀、男同志劃上等號，好似講到成為男同性戀者你就會濫啦，就會病啦噉樣，而選擇性去忽視其他嘅情感連結，甚至本末倒置將原先因為同志社群被社會邊緣化，而導致嗰種迴避大眾嘅文化，孤獨無路到只可以透過放縱自己，身心唔健康嘅行為去抒發自己嘅情緒。而呢啲嘢呢就本末倒置講到好似係，只要你做同志就會遇到噉樣嘅後果。
而另一方面呢，雖然政府而家都叫做針對性噉去宣傳，但係佢哋嘅目標呢，由頭到尾都係想從公共衛生嘅層面出發，似乎呢就係希望見到愛滋病感染嘅人數下降就得㗎嘞，而唔係社會意識上面或者係改變對於性傾向呀，或者係性別嘅刻板印象。但係你又諗下喎，如果你想個感染人數少啲，其實更加需要係從全面嘅性教育同埋減少歧視去入手呀。試諗下，如果你而家仍然都係對男同志有種種嘅偏見，然後同你講其實男同志呢，就同性濫交有關嘅，好容易有 HIV 嘅話，又有邊個會同你宣傳話，男同志可以去做檢查呢？如果唔從教育入手呢，去教而家嘅年輕人關於性傾向呀、安全性行為等等嘅知識，等到佢哋大個先再去推動，噉咪太遲囉。希望政府都唔係淨係睇住個數字嚟去處理個問題嘅，就正如個研究所講呀，其實社會文化呢都係會影響公共衛生議題嘅宣傳成效嘅。
噉今次呢個非常之快嘅一個學術小分享，就可以畀大家了解下由80年代到2000年代，我哋經歷過喺香港講關於愛滋病同埋公共衛生嘅宣傳上面，男同志喺政府廣告裏面形象上面嘅轉變啦。喺你嘅生活當中又有冇遇過一啲，又或者觀察過一啲同志社群嘅呈現呢？同志社群喺媒體上面嘅形象轉變你又點睇呢？歡迎你喺我哋嘅每一集 Description 裏面嘅連結去留言，或者係直接 DM 我哋 Pridelabhk。每一集嘅收結都會有一個經典嘅收結嘅。噉呢個就係《點止港同志》係一個以香港同志角度出發嘅 Podcast，希望可以將大家生活裏面嘅性別同同志議題用廣東話嘅聲音同文字嘅方式保留同流傳嘅。每一集嘅 Podcast 我哋都可以製造文字檔，噉會放喺我哋嘅專屬網頁裏面嘅。多謝你收聽呢個節目而且聽到嚟最後，想收到下一集嘅內容就訂閱我哋啦。假如你對呢個主題有共鳴或者你想分享其他嘅事情，或者其他學術嘅題目畀我哋知道嘅話，歡迎你 DM 我哋 Pridelabhk，亦都歡迎你喺 Description 裏面嘅嗰個連結去留言，或者係喺 Apple podcast 裏面畀星星嘅回饋。你嘅支持同埋鼓勵會係我哋默默耕耘嘅動力嘅。今集就講到呢度先，記得下次同你點止港同志，bye。