Category: 第四季 (2024年度)

M：馬天娜

K：Kawai

M：歡迎返嚟《點止港同志》，我係主持馬天娜。呢一季裏面我哋係有啲新嘅嘗試，而呢一集我哋就係「喺度講喺度散」呢一個主題。同大家講聲唔好意思先，因為上一次因為我哋嘅「喺度講喺度散」呢個行程太豐富，都冇詳細去解釋下，噉今次就同大家喺開始之前同大家解釋下，「喺度講喺度散」係發生緊乜嘢事先。呢一個主題就係用差唔多一個鐘頭嘅時間，同大家用語音去講下同記錄下圈裏面比較少人講，但係其實好多人想聽嘅一啲題目嘅。噉講明係圈裏面少講，但係好多人想聽就好明顯係一啲，好明顯有爭議性，或者係可能係一啲政治唔正確嘅一啲觀察。噉講到明喺度講喺度散就係一啲有機會你聽完之後會有情緒，你聽完之後好想有回應嘅一啲嘅題目，你可能會覺得我哋邀請嘅嘉賓或者之後嘅內容係政治唔正確，噉但係呢個世界上面你講得政治正確，首先你就會有政治唔正確，噉呢個世界就係噉㗎啦。我哋無論係大眾又好小眾又好，走去呢個現實社會裏面，往往會經歷一啲好唔公平或者係你唔明點解係個世界噉操作嘅一啲事情嘅，噉呢一個主題就同大家去講下啲噉嘅題目啦。噉講到明第二次「喺度講喺度散」呢，就同第一次係有啲唔同嘅，第一次呢就係 Eunice 去問我關於女同志嘅東西啦，噉今次我就擔當住 Eunice 嗰個角色，就去問下我哋呢一位嘅客席主持，去請教下佢，同我去分享下佢喺呢一個圈子裏面嘅所見所聞嘅。事不宜遲，我介紹下我哋呢一次「喺度講喺度散」嘅嘉賓主持先，同大家 Say 個 Hi。

K：Hello 各位，我係家維，我係今集嘅客席主持。我係一位中年嘅男同志，我會噉樣形容自己。

M：中年嘅男同志，一開始已經係破咗條題目。講起中年呢，我就以中年呢一個字眼去連貫住我哋呢個節目。首先我想問下，中年…你係幾時 Realize 咗自己步入中年呢件事嘅呢？

K：發覺自己白頭髮多咗啦當然，亦都發覺自己有啲場合佢哋會講緊個「老」字，或者係講緊啲舊時係點樣嘅時候呢，就會不斷有啲比較年輕嘅同志或者年輕嘅圈內嘅朋友，就會嘅目光就會望一望我，或者係向我嗰度瞄一瞄。噉我就覺得，哦原來我喺人哋眼中係已經係達到嗰個級數嘞，只不過係我自己唔 Aware 啫，唔為意啫，噉樣囉。

M：我想喺呢度呢，落一個我自己覺得中年嘅一個回應啦。我相信每個人都係噉嘅，不分同不同志呢件事，你會發現自從你去到一個年紀，你就會發現你突然之間發現有一群人係比你嘅圈子年輕好多，跟住你就會因為嗰一班好後生嘅圈子，你就 Realize 咗自己老咗。

K：哦，係呀，人係突然之間老去㗎嘛，唔係慢慢老去㗎嘛，村上春樹話㗎嘛。

M：係，噉所以就係諗，我相信呢件事，老呢件事係人人都會經歷啦，之前嘅集數都有講過啦，今次係講男同志裏面，嘩，男同志嘅老係與別不同呀，噉等陣再同大家講多啲。頭先家維講到見到自己白頭髮啦，噉白頭髮對你嚟講有啲乜嘢好大嘅轉變呢？

K：首先多咗啦，第二就係你會見到個髮根嗰度開始白色，然之後髮端嗰度係黑色，即證明你而家見到，你目睹緊你衰老嗰個記錄啦。因為你係初時覺得仲係黑黑地嘅，然之後……首先我講一講我啲頭髮好長嘅，比一般男性長，我啲頭髮幾乎係到到…一定係及肩㗎嘞，所以我留咗頭髮已經係差唔多兩年幾啦，噉我可以目睹嗰個記錄，初時係全黑色，然之後慢慢變咗灰黑色，然之後而家完全係銀白色噉樣。當然唔係成頭都係噉，但係個數量多咗好多囉，噉你就會覺得原來自己老緊嘞。

M：你頭先講到個描述，好似啲人去睇年輪噉樣，你見到嗰個一圈一圈或者係嗰個顏色轉變，嘩，你真係冇辦法避開呢一個顏色嘅轉變。

K：係囉，一個物理上面嘅轉變，人係…You know，呃唔到自己。

M：係係係，噉所以由嗰一刻開始就會同自己講，我不論係身體話畀我聽，或者係其他嘅社交圈子話畀我聽，我好似被歸入呢個老嘅，或者中年嘅一群啦噉樣。噉頭先我都有講到賣咗個關子，就係話喺男同志圈裏面，「老」定義係唔同嘅。噉請問你：喺你嘅認知當中，過咗幾多歲就係老呢？

K：我覺得男同志係最唔襟老嘅，可能過咗30抆呀，或者已經係覺得係老嘞。可能過咗35、30中，然後38你仲可以講咩，我仲係30零啦，但係應該係一踏入40呢，就已經開始係算係所謂老嘞，喺好多男同志嘅眼中。

M：噉我掉返轉頭問，30歲之前嘅嗰啲點樣形容自己呀？

K：我真係唔知喎，但係前陣子有個節目叫咩《仔仔一堂》，噉但係我覺得，如果你30歲或者30零歲仲叫自己仔仔，我覺得好怪囉，好似仲當自己係中學生噉樣。但係如果你40歲就應該冇人會話你係仔仔嘞掛，都唔夠膽話畀人聽自己係仔仔啦，驚俾人笑呀。

M：係係係，噉呢個都明嘅，作為一個30歲嘅女同志嚟講，有啲自引係的確唔係好…唔能夠再用㗎嘞。其實我去到20幾歲嘅時候呢，當身邊嘅朋友開始結婚生仔啦，佢哋有小朋友嘅時候，當我去探佢哋嘅時候呢，我已經 Mentally prepared 我有晒心理準備，就係隨時俾人嗌做阿姨噉樣啦，喺女同志裏面呢，我諗姐姐呀、阿姨呀嗰啲都常發生嘅。噉聽完男同志講完老嘅定義，作為一個女同志呢，就快速去分享下呢個女同志。好似呢有兩個 Level 嘅，兩個 Level 嘅所謂嘅比較 Senior 啲嘅女同志嘅定義呢，就係首先會分「姐姐」啦，姐姐係一個好美妙嘅字嚟嘅，係嘞。喺女同志圈裏面呢都會有一個文化，就係想搵姐姐去拍拖嘅，噉我諗其實都係好現實嘅考量啦，姐姐一般嚟講都會覺得比較穩重啲，比較成熟啲，力量多啲，講嘅題目又會豐富啲，噉我諗好多嘅原因都會覺得呢件事，即係呢個對象或者呢個年齡嘅差異係美好㗎啦。噉去到第二個 Level 呢就係老嘞，噉老呢，我嘅認知就係似係…你嗰個女同志開始步入更年期，同呢個更年期以後呢個生理嘅階段好扣連，噉樣嘅定義，係嘞，噉先有呢個老嘅定義囉，噉所以同男同志嗰個好唔同。男同志講到話30歲，我頭先…同家維做呢個訪問嘅時候眼都凸埋，噉所以如果我係男同志，我就已經係一個老男同志嘞。

K：同埋呢我哋有另一個好男同志嘅標準嘅。我估大家都知道男同志好多呢啲場所，譬如桑拿噉啦，桑拿係喺入場…你要付費啦首先。噉得意㗎喎，我記得上次我見到呢個情況係一個尖沙咀一個地庫嘅桑拿，佢就每一個禮拜七日，有一兩日呢係譬如係某一個年份之前出生嘅人呢，就係免收費嘅，嗰年份之後即係越年輕呢就越會免收費啦，嗰年份之前呢就按年份收費啦，按你個年齡段收費啦。噉可能假設啦，2000年之後嘅就唔收錢，但係2000年到1997噉樣可能收100蚊入場費，1997到譬如1994或者1993噉樣可能收150蚊，噉93到到89呢就收可能200蚊，噉但係呢再某年份之前呢就拒絕入場嘞。

M：即係老過1994之後就完全唔使旨意入去嘞？

K：係嘞，老過1989噉啦，係嘞就已經講啦，啊你第二日先至嚟啦。佢有好多…點講呢，好多暗示，佢唔會直接同你講話你太老嘞，或者係你 Out 嘞或者係唔適合你嘞，佢會用啲好隱晦嘅行為或者係隱晦嘅潛規則噉樣，去講畀你聽你已經係開始唔受歡迎嘞。或者係客觀上…都唔係客觀上嘅，即係未必你唔好、唔靚，或者未必你睇落去個樣老，但係佢用一個好…點講呢，好武斷嘅一個方法，去講畀你聽你已經係老嘞。

M：以出生嘅年齡去做一個好大嘅門檻去一刀切，切開咗你，即係你就唔理你操到好 Fit 或者你整晒容整到好後生，但係你身份證上面個年齡係89年嘅，噉樣你就入唔到去。

K：係呀係呀，同埋就會……唔知可能佢有第二啲場係專係服侍啲比較年紀大啲嘅，但係呢個場我覺得係…我自己再搵原來呢個做法係比較常見嘅。

M：你講起呢個老嘅門檻嘅收費，我諗起主流嘅 Bar 呀或者夜場，都會有一啲所謂嘅 Ladies’ night 啦。即係之前曾經都有過一啲嘅網上討論，點解大家好似講緊話要呢個性別平權嘅同時，但係又會有 Ladies’ Night 呢啲噉嘅行銷嘅招數去招徠啲女仔去…即係吸引啲女仔去同一晚嘅場合啦。其實佢暗示緊一樣嘢，就係佢覺得女性喺嗰啲直人嘅場裡面可以吸引到男性去光顧呀嘛，所以就係用噉嘅招徠。同一個道理，如果係放返落頭先家維講嘅嗰個形容就係，佢覺得嗰晚嘅主題就係年輕嘅人就係更加有吸引力，噉因為年輕嘅有吸引力佢就變咗就係，你喜歡呢啲年輕嘅人，你就要去付出呢一個金錢嘅交換去入呢個場見到呢啲年輕嘅人。

K：同埋佢可能係個假設就係有一兩位比較嫩巧啲嘅，所謂小鮮肉，就已經可能吸引到譬如六七位比較成熟啲嘅客戶。噉其實諗太多嘅時候，你覺得好病態囉，係成個圈子都係…係點講呀，個定位都係比較年輕化。

M：嗯。講起呢個年輕化，亦提到同你頭先對於年輕呢個定義，會有好多嘅一啲假設，即係覺得年輕嘅人會靚啲，會正啲，吸引力大啲噉樣。講起呢啲嘅所謂嘅好外表或者好刻板印象嘅嘢呢，我都想分享講關於 Gay 去搵食，所謂搵食嘅意思係呢個交友市場裏面搵到自己嘅對象啦。Gay 去搵食呢，其實係前所未有地嚴苛，同埋一個好殘酷嘅。用啲乜嘢去證明呢樣嘢呢，就係坊間呢，我唔知喺香港嘅 Forum 有冇啦，但係喺臺灣嘅 Dcard 裏面係有分享過。有啲人嘅，即係朋友嘅分享啦，就係話有一個毒 JJ，即係本身係從頭到尾係冇拍過拖嘅，噉佢都真係最近想搵女性去同自己拍拖，噉都搵唔到對象。噉於是呢一個異性戀嘅男性，佢就即係開到聲就係話，我都溝唔到女㗎啦，不如算啦，溝唔到女咪溝下仔囉。噉樣就引起咗一堆嘅網友，就喺度炮轟佢就話，你真係自信過…你真係自我過分膨脹，真係自我感覺良好，你真係以為自己放喺個男同性戀圈子裏面真係會可以…因為男同性戀者就係鍾意男人嘅，所以你就可以理當成為佢哋喜歡嘅對象咩？你實在太自視過高嘞。從而去得知其實男同性戀係對於交友市場嘅條件之苛刻，係好多嘅，好多條件。你有冇分享下？

K：首先我覺得呢個睇法好奇怪嘅呢位朋友，呢位直男啦，佢已經係話搵唔到女，一個人口入面一半嘅人已經 Reject 咗你嘞，基本上因為女人係佔人口嘅一半呀嘛，女同志實唔會覺得佢吸引㗎啦，直女都唔覺得吸引啦，因為佢搵唔到女。一半人已經 Reject 咗佢，佢突然會覺得既然一半人 Reject 我，就代表係另一半就會接受佢，但係男同性戀你剛才噉講，係比較嚴苛㗎啦。首先你體型係好重要，我已經過咗中年啦，噉我而家都又開始返做 Gym，之前都有做運動嘅習慣，但係而家係直接係舉鐵。我活咗四十幾年第一次有個噉嘅衝動去做呢樣嘢，因為你見到啲嘢𢱕晒，或者係見到係開始鬆，有時真係接受唔到嘅。噉同埋個大環境都係淨係會 Present 啲好健碩，好運動型嘅…嘅宣傳同廣告，同埋啲交友 App 入面，幾乎你見唔到樣嘅，幾乎你一定係影個膊頭，直到個肚就嚟見到毛，就嚟見到個重要部位嘅時候，噉一定係個膊頭嘅比例呢，同埋個胸個比例係會闊啲係會橫啲，噉然之後個腰就好細。噉然之後下一幅呢就係個 Pat 啦，個 Pat pat 呢就要圓到好似真係個蜜桃噉樣，係嘞。噉然之後就影下對腳啦，腳呢就有啲人鍾意小腿噉樣就淨係影小腿，噉太瘦又唔得喎，但係太粗又唔得喎。好似你真係…係一個好特別嘅好尷尬嘅情況，就係你俾人睇到你係唔在意噉樣係一個完美嘅身材，但係你用好多努力先至可以塑造到呢個，睇落去好似係自然嘅，睇落去好似係唔需要去打針嘅一種一個身形囉。噉當然我哋唔知呢位直男係點樣啦，但係如果係噉樣嘅標準嚟講，佢覺得居然可以因為只係因為佢直男呢個身份，就會吸引到基佬呢，噉可能對自己自信心真係有少少過分嘅…Overestimate 咗啦。

M：哈哈，好明顯佢係啦。呢樣嘢其實，佢有噉樣嘅想法， 其實同有一啲坊間嘅刻板印象，就話當一個同性戀出櫃嘅時候，佢身邊就會有啲人就話唔好喜歡咗自己呀，如果係 Let’s say 啦例如我出櫃，噉我身邊如果可能有一啲唔熟悉同性戀嘅人，佢就會覺得：「你唔好鍾意我呀！你鍾意女人嘅話你就唔好鍾意我嘞，我都係女人嚟㗎嘛。」

K：係呀，係。呢啲聽到好似…以前我就會尷尬噉樣唔出聲，但而家…因為而家唔會人噉講啦。但係我頭先都話，我係出咗櫃差唔多成廿年㗎嘞，以前係真係會，譬如大學嘅時候真係會「哦噉你咪會鍾意我？」噉之類嘅說話。噉而家我會答佢：「你覺得你邊一忽係吸引呢？邊一部分吸引到人呢？」尤其係單身嘅話，噉你更加覺得好奇怪，點解你憑你單身呢一個身份，即係仲要係有啲…我唔知台灣人叫咩咩母胎呀？

M：哦母胎單身，即係A0，即係由你出世到而家都係單身嘅。

K：係呀，憑咩你出世到而家單身，突然之間會只係因為我係 Gay，之後覺得你會吸引呢？但係都係嗰句，你一半人已經拒絕咗你，噉唔係傻㗎啦。

M：係呀，所以佢好明顯係要擔心自己被呢個同性喜歡之前，先反省下自己，你做咗啲咩令到自己喺你嘅交友市場咁輸蝕？

K：即係統計學上面係冇乜可能㗎嘛，又唔 Make sense，因為部分講呢啲嘢嘅人……都唔可以話醜樣嘅，但係唔係太出眾個外貌。

M：我哋講起外貌啦，亦都我頭先又分享咗喺呢個男同志交友 App 入面，嗰啲不經意但係又好有線條，好有形狀，嗰啲咩倒三角形呀，跟住又個 Pat pat 好似個 Peach 噉，好似蜜桃形嘅嗰啲呢，我諗做過 Gym 或者考慮做 Gym，或者喺呢個 Gym 裏面浮浮沉沉，決定究竟一個禮拜要堅持幾多日嘅呢啲人，例如我呢，經常都會面對住就係嗰種面對自己身形上面唔係非常符合嗰種理想…所謂嘅理想嘅身形而有一啲嘅焦慮。而佢驅使咗你好似就要去進入做 Gym、舉鐵，做呢個嗰啲叫咩…Aerobic，有氧、帶氧運動嘅一堆嘅練功嘅一啲安排噉樣。我覺得呢一個 Loop 呢，好似特別係喺男同志圈，即係相比起女同志圈，係特別明顯嘅。我自己都有一啲…不論係台灣或香港嘅 Gay 嘅朋友啦，都係要 Show off 自己係喺健身室嘅模樣㗎。我成日見到佢哋打卡呢，都係喺個健身室嘅。所以對女同志嚟講，哈哈，唔好意思，女同志唔會成日自己影自己喺個 Gym 入面做嘢啦，除非佢係做健美㗎啦，但係好多時候都會係影下自己生活記事呀、講下傷春悲秋呀，講下貓呀，講下咖啡呀，就會變得好似突然之間見到個男同志嘅嗰個語言呀，係喺一幅相入面表露無遺噉樣。

K：我覺得係…會唔會係因為男性始終係一個視覺主導嘅一個群體，係嘞。我估直男同直女都有嘅，直女而家有啲所謂直女睇嘅色情商品係咪，係有故事又有演技呀，有編排呀，有場景呀乜乜乜。但係你睇緊啲直男嗰啲係只係有個女人訂咗 Pizza，送個 Pizza 嚟嘞，哎呀跌咗，哎呀我同你摸摸，摸一摸可能就上床，即係完全係現場係完全唔會發生嘅。噉當然我唔知女同志嘅色情嗰個…嗰啲片係點樣啦，但係我可以講畀你聽其實男同志嘅，睇嗰啲色情嘅片都係差唔多嘅，譬如整水喉噉樣攤喺度，突然間旁邊嗰個係攞對腳撩下你噉，之後就硬咗嘞，噉之後就擺埋一齊嘞，即係係好速食同埋係以呢個…我覺得係生理嘅接觸係為出發點囉。噉你生理接觸噉樣，你睇到你鍾意嘅，噉你先會去…係你嗰類嘅你先會去搵，先會去打開呢個話題，先去撩嗰個人傾偈。你覺得你身體上都唔鍾意或者係，唔係真係完全你嘅理想，噉你咪下一個噉樣，係一個好幼稚你可以噉講，同埋係一個好唔成熟嘅出發點囉。

M：喺我哋講呢個睇外表嘅呢個文化，內裏其實帶住一啲咩嘅訊息之前呢，頭先家維講咗個「類型」呢個字，噉我又想分享，作為一個外行人，就想分享下自己係有接觸啲咁多啲啲男同志嘅文化，知道 Gay 嘅文化係會將唔同體型嘅同性戀者，分開唔同嘅類型嘅。噉呢，我就大膽地將佢哋用一個字眼去統稱，就變咗做「人民禽畜化」。

K：係嘞，將人禽畜化。

M：係呀，將人禽畜化，係嘞，用唔同嘅動物嘅體型去比喻人嘅身形噉樣。噉常見有嘅字眼就係有熊啦，熊啤啤就係好多毛，然後又大…嗰啲叫咩，魁梧嘅身形嘅男士啦；跟住就有狼啦，狼就係瘦瘦、苗苗條條，然後係結實㗎啦；猴呢就係奀嫋鬼命，即係瘦蜢蜢噉㗎啦；跟住有豬啦，豬就係形容肥腫不分，或者係肌肉量好少，但係好大嚿、肥嘅，噉樣嘅，呢個豬就應該唔難想像嘅。跟住呢，頭先所拋書包嘅，就係呢啲陸地上面嘅生物啦，跟住仲有啲水上面嘅生物嘅。係呀，之前就係有聽過，有一個我覺得聽到就係好令人感覺心酸，但係好 Harsh 嘅一個字眼，就叫蝦啦。蝦呢，分享畀各位聽眾去聽下，就係如何食一隻蝦嘅一個動作就可以諗到，呢個字眼係有幾苛刻。就係你首先要夾住隻蝦，你要剝開佢個頭，跟住你仲要剝開佢身上，上面嗰啲殼，噉所以呢個就係嗰個進食蝦嘅過程啦，就係你要唔理佢個頭，唔好理佢個樣生成點，總之你係食佢個 Body，呢個就係蝦嘅描述。

K：係呀，所以係完全係以一個所謂生理嘅角度去睇一個人，係完全係以佢究竟引唔引到我自己嘅性慾呢？如果引唔到我性慾嘅話，噉就算啦，將自己不斷喺度畫細圈囉。你頭先話熊啦嘛，係咪？噉我想問你有冇聽過 Otter，即係「水獺」（嘉賓語誤）呢一個類型？

M：我完全冇聽過，我係好 Amazed 呢個…佢係水上生物嚟㗎嘛？呢個水上生物嘅新品種，新類型係點樣嘅呢？可唔可以解釋吓？

K：係，咁大家都知「熊」係比較健碩，但係唔係…點講呀，熊係大隻，係Four （four square）、大份，但係唔係屬於係線條美，或者都係有線條美嘅，唔係屬於係運動型嗰類啦，但係多毛呀。但係如果你水獺呢就係比較瘦削，或者係比較苗條，但你身上又係好多毛。噉你可以噉樣睇啦，肥嘅話就係熊，但係瘦嘅、瘦版嘅熊就係水獺，就係 Otter。有啲同類嘅就會搵返同類，但係有啲唔同類嘅就專係搵啲唔同類，噉樣囉。

譬如話，一啲熊淨係會 Date 熊嘅，但一啲熊就淨係鍾意 Date 小鮮肉嘅；有啲小鮮肉就淨係鍾意啲同佢自己差唔多 Type 嘅，但係有啲小鮮肉就鍾意啲老嘅。噉即係變咗係…即係好似變咗個 Buffet 噉囉，你變咗係將自己包裝成一個產品。噉當然啦，求偶都係個市場嚟啦，但係呢個就變咗一個好極端嘅一個市場囉，即係你如果…好似有啲人，好似我噉我 Fit 唔到某一個 Type 嘅話，噉就變咗好似有陣時係唔知自己係邊個啦首先，亦都唔知自己究竟係搵緊啲乜嘢囉。

M：家維噉樣講，我覺得道出咗一個好關鍵，即係可能對於男同志嚟講有多一層要發現自己嘅定位嘅一個階段。即係作為一個同志，我相信好多時候由你開始意識到自己喜歡同性嘅時候，已經有一個好大嘅關口要跨過，就係你點樣去 Define 自己喜歡同性呢一件事，跟住對於男同志嚟講，家維你又講到就係你仲要更加 Define 自己係要乜嘢嘅身形啦，或者乜嘢嘅形象去示人，或者出現喺呢個圈子裏面，我覺得係一個…係另外一個難度嚟嘅。

K：係呀，同埋你唔同年紀做某一類型，噉係 Appropriate 嘅，噉係合適嘅。但係你如果譬如過咗某個年紀或者過咗某個數字啦，唔一定係年紀，譬如體重都係，你想做嗰一類呢，唔單止係唔適合，有啲有陣時係會有啲好好……好冇禮貌或者係好傷害性嘅說話你會聽到嘅，「就憑你都係算係乜嘢？」頭先都話後生啦小鮮肉啦，我都有見過而家有興一個字叫薄肌，厚薄個薄肌肉嘅肌，專係形容啲好後生嘅男仔，但你會見到佢係有腹肌嘅，有胸肌嘅，但就好少腹肌，好少胸肌。其實佢唔係…佢係完全因為佢瘦所以啲肌肉現晒出嚟，唔係因為佢去 Gym 度去練出嚟，噉當然如果去 Gym 度練出嚟就係運動型陽光型，但係佢只不過係瘦到可能個體脂真係可能係單位數或者係低嘅雙位數噉樣。如果係十零歲或者十零廿歲薄肌，就 Make sense 啦，但譬如係我40+啦，唔講確實嘅年齡，我啱啱生日過咗添，係嘞40+嘅，噉就算我係噉樣嘅體型我可唔可以話自己係薄肌呢？可能個身係幾乎完全一樣，真係好瘦好瘦，瘦到啲肌肉現出嚟，噉但係你話畀人聽你係薄肌，會唔會係會俾人笑呢？因為大部分薄肌嘅都係後生嘅。

M：嗯嗯，所以淨係呢兩個字背後帶住嗰個都係一個年齡嘅限制嚟嘅。

K：冇錯嘞，冇錯嘞，唔單止係身形，仲要係年齡。係呀，譬如你大家都好多人都會知，可能有1號或者0號啦，有呢個分啦，噉我問下你嘞，你覺得如果話1號或者0號，邊一號個年紀係通常會大啲？邊一號個年紀通常會細啲呢？即係對一個 Impression 嚟講。

M：好呀，我行外人就覺得呢，年紀大嘅係做1嘅，係嘞，跟住年紀細嘅就做0嘅。因為做1嘅你要有技巧呀嘛，我繼續講埋嗰個0嘅部分先，因為呢，做0嗰個部分呢，一般嘅邏輯啦，佢真係瞓喺度嘅啫，跟住就比人篤啦。但係1你要用力，你要有技巧先可以做，所以就係年紀大啲嗰個囉。

K：係嘞，你冇錯，通常……唔係個個都噉諗啦，但係我有留意到嘅，通常係話一個個譬如 Daddy 啦，Daddy 通常係好少係會0嘅。即係而家又開始變化，就係 Daddy 有0，專係搵啲後生嘅1噉樣，係嘞，即係個 Porn 入面都有呢個分類。噉你可想而知，如果 Porn 有分類嘅話，即係證明呢個係一個特別嘅喜好？

M：係一個體裁唔同嘅喜好。

K：冇錯嘞，係一個特別嘅嘢，反襯出部分嘅人係會覺得年紀大就係1，年紀小就係0；經驗豐富就係1，經驗唔豐富就係0。噉當然好多中間係不分10㗎啦，自己鍾意嗰一刻想做邊個就做邊個，噉當然嗰個係最理想最完美嘅所謂身份啦。噉但係如果你到咗某個年紀，或者可能你生理上未必能夠可以做到1，即譬如係…唔係一定陽萎嘅，可能嗰一刻未必夠硬，噉你做唔到1，噉你係咪做0嘞？噉但係人哋已經將你設定咗係唯1嘅時候，你會覺得好尷尬，即係上落床嘅時候。或者可能你係年紀細，年紀細做1就冇問題嘅，因為嗰個年紀係你風一吹你都可以硬得到㗎嘛，我經過嗰個年紀，我自己都有噉嘅經驗，係嘞。噉但係譬如你年紀大，又係鍾意做0嘅，噉就會變咗好似……唔可以噉樣誹謗自己，但係好多人嘅眼中就，你又老又唔係乜嘢，同埋始終嗰個圈子係受主流影響，始終都覺得1號係陽光啲嘅，0號就比較陰柔啲，但係如果你係老又陰柔你會覺得好似有少少呢個焦慮產生咗出嚟，有啲歧視產生咗出嚟。

M：我想問一個好 Harsh 嘅問題，我想挑戰，就係你喺外面嘅直人嘅圈子入面，成日都會討論男同女。通常佢哋嗰個市場都係嘅，直人嘅男性通常都係喜歡去搵年輕嘅女性，而佢哋搵年輕女性嘅其中一個刻板嘅印象就覺得年輕嘅女性就係吹彈可破，然後覺得佢哋好緊緻。噉我想問呢個男同志圈入面頭先講到話年老嘅人會被假設或者預設佢係1，然後年輕嘅就做0，噉1又要陽光又要大隻，跟住又好有氣魄，噉喺0眼中一個老嘅0會唔會……老嘅零係一定有一群人噉嘅存在㗎嘛，噉嗰群人會唔會係曾經會俾人聽過一啲話好鬆呀，即係好難聽嘅，總之身體上面嘅一啲同老年有關嘅一啲嘅批評？

K：有啦，一定有啦，即係用返一啲直人嘅字眼，即係話…可唔可以噉講，即係你後面都鬆到咩噉啦，或者係…唔係嗰個臀部呀，係嗰個窿太鬆。我心諗其實都唔會嘅，因為我自己覺得你，你後面鬆緊係睇你做多幾多次個 Kegels，嗰個咩？

M：海格爾運動。

K：係嘞嗰個運動，噉你做得多你唔會鬆㗎，因為除非你真係失禁嘅啫，或者可能你…有啲人可能有一個用藥嘅習慣，所以佢後面係會鬆馳啲又唔出奇。但係係囉，或者係佢哋會覺得係啦，會覺得0都唔緊要，但係0加埋呢個乸噉就好緊要嘞，噉就係最覺得好似個……我哋好鍾意將啲人分級㗎嘛，我包唔包括埋在內我就唔知啦，但係個圈子好鍾意將人分級，噉你係0已經係，有啲人係覺得次一級啦，噉你0仲要加埋你係乸，噉就會更加…又要加埋老喎，噉你就更加，即係越多形容詞，你個吸引力就會逐步下降噉樣囉。

M：噉你講起呢個分級制啦，噉你講起呢個，你都帶出咗呢個老年係喺呢個分級制入面，係有…即係處於弱勢啦。噉頭先我哋都有講起，呢個即係基裏面，1、0呀，或者係呢個插入、被插入方嘅呢啲嘅，嗰個權力嘅 Dynamic 啦。我有一個好奇，係人會唔會…即係基佬會唔會因為老嘞，即係自己年老嘞，噉就會影響咗自己喺呢個性行為嘅角色呢？即係會唔會可能 Let’s say 好似係，好似搵工噉樣，以前呢，我可能就可以做擔擔抬抬嘅，我可以做勞動性強啲嘅工作。但我人老嘞，我腰骨就唔掂啦，所以我就唔可以做呢啲以前做開嘅角色嘞，做開嘅職業，我就只可以做啲，即係係好靜態嘅嘢呀，或者係好服務性強啲嘅工作。同樣道理地去諗，會唔會因為喺個基圈裏面，會唔會因為年老嘅關係影響咗呢個性行為嘅角色呢？

K：我覺得係會有嘅，因為你，譬如頭先都講過啦，你硬度真係控制唔到㗎嘛，就算有啲人食藥，但係你冇可能係真係好似你十八九歲噉樣嗰個…嗰個勃起度呀，同埋嗰個硬度。噉有啲可能，所謂接受現實啦，就換一換個角色，但係佢哋可能偶爾都係會想做返佢哋自己鍾意做嗰個角色。我覺得角色唔係一個最大嘅問題，最大問題有時係一個假設，即係有啲人，就算我哋呢個圈子有啲人，佢覺得你係乸嘅，「你咁乸，你點可以做到1呢？」，或者係上咗床話「你咁陽光點解會俾人屌嘅呢？」好多呢啲假設呢，反而係仲更加難聽，仲更加傷害人，仲更加呢個唔恰當。

M：我想請教家維呢，點解會有噉樣嘅期待落差嘅？即係呢件事唔係可以喺交友嘅第一個步驟先自報家門㗎嘛，定係其實係有啲潛規則嘅呢？

K：有啲係噉嘅，但係譬如有時係去 Club 噉樣撞到，見到嗰啲呢，係埋臨門嗰陣時你先發覺我撞號呀唔啱，我都有聽過，我自己未有噉嘅經驗，我唔係好鍾意呢啲場合，咳咳…Sorry，我唔係好鍾意喺 Club 約人，因為太嘈。如果你用交友 App 嘅話，噉應該唔會有呢啲場面出現嘅。你可能係船P，或者係啲社交圈入面見到，出嚟食飯之後先發覺原來係，係同我嘅想像有分別喎噉樣。

M：我諗呢個狀況嘅狀況真係好難…好難輕易地去排除得到，當你講到一個剎那間你覺得係可以進入下一步嘅時候，先發現撞號呢件事真係非常之尷尬。我又諗緊如果你從頭先所講嘅夜店，或者夜蒲嘅嘢去衍生出，你去得嗰啲場合你明顯係用視覺行先，噉喺一個主流，由頭先一開頭我哋講起桑拿嘅收費模式啦，跟住又講起年齡上面對於身體機能、性別嘅氣質上面，有好多嘅假設啦，亦都會發展出一個好似金字塔嘅嗰個分類模式啦。我哋講咗好多係個金字塔嘅…個分類模式下面比較相對嚟講係比較冇咁吸引度咁高嘅，或者係所謂直接講係屬於劣勢一啲嘅人，我又想 Resume 上去呢個金字塔上面嗰個角色，即係所謂嘅最主流嘅、最健康嘅、最陽光嘅男同志嘅形象噉樣。我想問究竟一個，即係你同讀…我同埋同讀者去分享下，如果我呢個路人甲我要覺得自己，我係基呀我鍾意男人嘞，噉樣噉我要進入呢一個圈子裏面，我要點樣玩呢個 Game，我要點樣先做到呢個金字塔裏面嘅尖端，要有幾多個條件呢？

K：哦噉呀，你等等下我攞個我自己 IG 出嚟先，我自己係中晒嗰啲毒嘅人嚟嘅，噉我而家開一個 IG 畀你。

M：喺阿家維做緊呢個對照去分享嘅時候，我都想分享下就係，你諗下你去一個直人嘅交友市場裏面，啲人所謂個 Package 好好，噉你個 Package 都有一堆條件㗎嘛。個條件可能係有車有樓，跟住又讀書背景好好，跟住就有出過國然後有嗰啲歷練，跟住講嘅嗰啲公司嘅名又唔知乜嘢 A4 呀公司呀好勁呀噉樣，即係呢一啲全部都係講出嚟演出嚟嘅東西呀嘛。噉如果我呢個初入門、初入基圈嘅人，我要點樣去玩呢個遊戲規則，先唔講任何嘅嗰啲咩政治正確，其實咩 Body positive 嗰啲嘢，我最政治不正確嘅情況之下，我要點樣玩呢個規則我先可以做到呢個尖端嘅人。

K：嘩，好多喎！首先你係…唉好政治不正確呀，首先係要順生男啦，順生男係一個好大嘅條件啦，第二呢，就係後生啦，後生得嚟頭髮濃密，然後又要有個高度，我都唔明點解咁多人咁鍾意高度，一定要係170或者係175以上會鍾意嘅。噉當然又要闊膊啦，又要有胸肌啦，又要細腰啦，又要蜜桃臀啦，然後又要陽光啦，你見到啲 Instagram 又會出去踢下波啊，潛下水啊，或者滑下浪啊嗰啲。但你唔知佢哋做緊乜㗎喎，佢哋好多消費嘅活動，但係佢哋從來…你唔知佢哋係做邊行㗎喎，可以有咁多時間出嚟影 Instagram。一定會去健身囉，即係會見到好多健身嘅 Post 囉，同埋你見到係，就算係所謂上咗年紀嘅成熟型嘅 Model 或者係 Instagram 嘅人，都係睇落去個樣，個面係冇乜皺紋啊，冇乜黑斑啊，都係好多稜角啊，好多輪廓，同埋都係個身體係好健碩，永遠都係陽光嘅。你會反而見到好少呢，都可能會有嘅，但係相對嚟講少啲，譬如話係會將自己打扮到好斯文啊，或者係將自己扮到好似永遠唔會見到 Boy love 嗰啲好多腐女鍾意睇嗰啲形象出嚟嘅，永遠係極之陽光氣啊，極之運動型，極之係…又曬到黑晒啊，又要笑得好開心啊，一笑就對啲牙全部白色嘅，白到好炩好似牙膏嗰啲廣告噉樣，永遠都係嗰啲囉。

M：嗯嗯。我頭先聽到一連串嘅條件，已經諗到好多衍生出嚟嘅消費行為。你又要消費地去做運動啦，雖然唔知係咪真係做運動啦，跟住你又要冇皺紋啦，你又要皮膚緊緻，呢啲全部都係醫學美容要做嘅嘢啦，呢樣嘢係冇…不分國籍、不分年齡、不分種族，你一定係會揼嘅，皮膚一定揼嘅，只不過係揼幾快嘅啫。跟住你又講起外表啦，要陽光啊，跟住又牙齒要白啦…真係，我唔理佢係有冇食煙、有冇飲咖啡、有冇飲茶，但係你要維持你啲牙靚呢，你都係要有一啲錢錢嘅項目要扔落去經營嘅，即係好多都係要付費嘅東西。

K：反而其中一個最大嘅刻板印象係基佬好睇 Fashion 啦，或者好識打扮啦之類呢，反而其實我覺得比較少囉。你會見到唔著衫或者著好少衫，或者只係著泳褲嘅人喺 Instagram，多過係化妝呀或者係真係著到好 Stylish 嘅好有風格嘅人出嚟囉。頭先都講過啦，始終都係以生理嘅需要行先，你著到冚晒噉我點知入面係乜嘢呢？係完全係只係著件背心，然後波褲，同埋好得意，好鍾意白襪㗎，白襪呀然後波鞋，噉就已經可以打遍天下無敵手噉好似，好得意嘅一個現象嚟我覺得。

M：你頭先講呢個白襪，我就諗起以前學過一啲性別嘅研究嘅時候都會講起有一啲嘅物體，即係有啲所謂嘅拜物啦，即係 Fetishism。我諗其實頭先總括咗好多，不論用動物嘅外表呀，或者係打扮呀，衣著呀以及有一啲嘅符號，或者係一啲嘅物件，聽起上嚟喺呢個基佬嘅圈子裏面要玩呢個遊戲規則，都有好多 Fetish 嘅東西呀，好多視覺上嘅東西。

K：係呀，將一個有稜有角嘅人不斷將佢簡化同埋物化。即係譬如白襪運動型噉你，即係白襪就係運動啦……但係我又留意到好似個 Label 係黑絲襪，係啦係啦我都唔明點解，即係當然我唔……

M：你唔明唔緊要㗎，因為你唔係嗰個圈子呀嘛。

K：係嘞我唔係嗰個對象呀，係冇錯，我唔明係 Make sense 嘅我唔係嗰個對象。但係越嚟越係淨係單一嗰個物件係會令到，就會有一個點講…好似頭先所講，係會有一個吸引出嚟囉。

M：係呀，講起呢個黑絲襪呢我都補充下，我有朋友都係鍾意呢個類似係黑絲襪嘅或者係吊襪帶嘅男同志嘅。

K：啊係呀係呀，著西裝嗰啲。

M：係嘞係嘞係嘞，佢所謂嘅黑絲大家唔好認知錯誤呀吓，佢唔係著黑色吊帶女性嗰啲 Lace 絲襪，唔係，不是這樣，而係佢哋係著黑色嘅西裝絲襪，而係有以前嗰啲男仔用嘅嗰啲吊襪帶，佢係捆咗喺小腿上面唔係捆喺大腿上面，噉樣。係嘞，噉所以即係同女裝嘅嗰種絲襪嘅穿著模式係唔同㗎。噉呢，即係我從佢哋嘅嗰個相片分享裏面，就感覺到好似其實有好多物件，好多嘅拜物係喺裏面，好多嘅 Fetish 係喺入面。而絲襪可能係同緊身衣呀、軍裝呀，即係好緊緊縛住自己身體，然後突出嗰啲身形嘅線條嘅嗰一啲嘅表達模式，佢係有扣連嘅。

K：同埋始終腳掌呀、腳趾呀都係性感帶呀，唔係淨係 Gay 人係噉啦，即係好多好多人係鍾意睇腳㗎嘛，所謂腳控啦、腿控呀，可能係只不過係加多一樣嘢喺上面囉。

M：頭先家維講呢個關於絲襪嘅觀察嘅時候，都係講起咗佢係唔明，但係呢樣嘢係的確存在噉樣啦，噉我諗呢個亦都係反映得出就係，喺一個圈子裏面會有一啲，再有一個小圈子，佢衍生出嚟嘅行為呀或者想法，係並不係成個嗰一個圈子裏面能夠理解嘅。噉當然亦都反之亦然啦，即係佢哋做嘅呢一個，舉個例啦，係用呢個絲襪群組嘅呢個行為模式去，佢哋都有自己嘅一套說法嘅，噉呢一樣嘢未必係呢個男同志圈子裏面，更加大圈子裏面能夠輕易地理解。所以喺好多嘅一層一層嘅身份裏面，去定義返自己喜歡嘅嘢，或者係同你嘅嗰啲，即係同你嘅同儕呀，同等嘅喜好嘅人裏面，你點樣再定位自己嘅位置。我覺得都係好似聽起上嚟，聽咗咁耐嘅，喺個基呢個圈子裏面，係一層一層環環相扣嘅，大量嘅自我定位嘅程序嚟嘅喎。

K：同埋而家有個新嘅 Label 叫洗襪子，即洗襪嗰個呢就係0，除隻襪俾人洗嗰個呢就係1嘅。因為點講呢，尤其是白襪呀，即係你去運動完呀，對腳又臭嘞，運動就陽光啦，陽光就係1啦，噉你俾人叫做嘢嗰個就係，點講呀，就係比較係嘞，Submissive 啲啦，噉你就係0嘞。有好多呢一啲噉嘅以1同埋0去定位嘅一啲互動同埋身份喺度囉，係呀係好得意嘅，令到…假設你唔係完全同呢個定位吻合呢，就會產生到好多焦慮同埋產生咗好多呢啲壓力出嚟囉。噉我自己都有嘅，係譬如我頭先都講過，我會去做 Gym 啦，同埋除咗見到自己有白頭髮之外，你都見到皮膚係開始粗糙嘅啦，噉你會用多咗呢啲所謂嘅護膚品囉。同埋亦都…我未諗住去整容或者去做嗰啲所謂微創嘅手術呀，但係我都有諗過，如果我打嗰啲肉毒桿菌會係點樣呢噉樣，始終你個面頰嗰度係揼緊落嚟嘞，你見到呀嘛，同埋始終個黑斑係多咗，令到你自己好多問題……好多疑問呀唔係問題，好多疑問出嚟係對於自己，哦，呢度夠唔夠好呢？嗰度夠唔夠好呢？呢度可以點整呢？嗰度可以點整呢？就會產生咗無形壓力，就會變咗一個循環喺度。

M：嗯，呢一個循環呢個從焦慮衍生出嚟，要唔要做一連串嘅消費行為或者係對自己形象嘅行為，都係…從家維嘅角度入面，係會有佢哋對於1、0呀，陽光陰柔嘅衍生出嚟嘅考慮，即係究竟要唔要維持自己嘅緊緻度呀，或者係嗰個即係減斑呀、美白呀，呢啲嘢同自己嘅呢一個喺基圈嘅身份係有扣連啦。噉放返喺無論放諸喺女同志圈子又好，放返去直人圈子都好，都會有佢哋自己嘅嗰個規則或者嗰個架構，即係嗰個交友架構之下衍生出嚟嘅一啲增加自己吸引力嘅一啲嘅方法嚟嘅。即係唔係話哦，呢啲嘢就係得男同志先有嘅，男同志呀點點點點，女同志或者其他圈子都有。噉我哋今次聽到，就係家維從自己嘅角度去觀察去分享到，其實做一啲嘅呢啲嘅舉動呀，即係令到自己所謂變靚啲嘅舉動，唔係單純定係純粹我為咗變靚啲，而係變靚啲變好睇啲嘅過程，背後其實係有好多呢啲，呢啲叫做乜呀，階級，呢個交友市場階級。

K：係係，你點樣 Fit 入去呢個市場呢？你係邊一個呢？或者可能呢個身份同你自己睇自己係唔一樣嘅，噉你咪會變咗好大嘅壓力出咗嚟囉，噉呢度就係個焦慮出咗嚟囉。

M：嗯，係。噉呀，用呢一個家維嘅分享去做一個對於今次呢一個基佬嘅遊戲規則上面，規則係有一個即係現身嘅說法啦。噉當然即係去到…回顧返一開頭，一開頭呢個節目所講，「喺度講喺度散」呢個係一個用個人生活去觀察同埋理解去出發嘅一個節目啦，噉也許你見證、你經歷嘅嘢，你見到嘅嘢、你感受到嘅嘢呢，係同我哋兩個講嘅都唔一樣嘅。但係呢一個節目呢都係鼓勵更加多聽到…即係更加多聽緊呢個節目嘅人呢，係有更加多深一層嘅思考，喺你即係喺個圈子裏面生活，或者浮沉，或者係碰碰撞撞嘅情況之下呢，其實係有更加多嘅東西去畀你去仔細去諗，而唔使隨波逐流去即係漫無目的，噉樣去盲目跟從嘅。噉今次呢，亦都多謝家維，同我分享咗咁多自己嘅所見所聞，亦都將自己嘅經歷同呢個我哋嘅聽眾去分享。喺 Last but not least 呢，家維有冇啲乜嘢建議呀，少少嘅說話同我哋嘅聽眾分享呢？

K：想講其實好多嘢，當然你可以話每一個圈子都有自己嘅問題嘅，有自己嘅標準嘅，有自己呢個焦慮嘅。我首先想講基佬呢個圈子係比較極端嘅，係將呢樣嘢101%噉樣加咗嘅，點樣應付呢，我就想用我一位朋友嘅例子嚟做分享。佢話……佢係一位英國出世嘅香港人嚟嘅，佢40歲之前就完全喺英國生活，佢覺得佢喺英國嘅時候呢，係冇人鍾意嘅，除咗係有呢啲嘅身體焦慮之外，仲有種族歧視呀嘛，佢係對自己嘅自身形象好差嘅。但佢嚟到香港之後呢，佢就發覺原來可以唔使去理已經既定嘅標準嚟做人㗎喎，自己…即係佢可以係一個好乸嘅1又得，可以係嗰日佢鍾意做一個受嘅人又得，或者係如果你鍾意嘅話，真係享受肛交做0號嘅，噉你咪做0號囉。即係我嘅意思就係你重新去 Define 返你自己，根據可能你當下嗰個需要或者當下嗰個感想或者興趣去做返你該做嘅嘢，噉就…同埋睇少啲 Instagram 囉，就唔好好似我噉囉，睇少啲 Social media 噉就已經係對自己一個好大嘅幫助㗎嘞一定，係呀。

M：一個至理名言呀，睇少啲一啲已經打過 Filter，執過相嘅嗰啲 Instagram 呢，對自己嘅自身形象都係會有間接嘅作用嚟嘅，佢係唔會令到你自信增加，但係至少唔會令到你嘅自信減少。即係遠離 Instagram……

K：冇錯，你將嗰啲有毒嘅標準不斷內化，睇少啲就會好啲囉，睇少啲 Instagram。

M：好呀，多謝家維嘅分享。我相信你頭先最後分享關於你朋友嘅嗰個真實嘅例子，都可以令到啲人更加知道其實所謂嘅做自己唔係純粹得把口，唔係講嗰三個字咁簡單。而你係經歷過你嘅心路歷程，你有掙扎過，掙扎過之後你得出一個結論之後你先去走去實踐，我覺得呢個先係真係做自己嘅嗰個過程，個過程都唔係一個容易嘅事。噉多謝家維啦，多謝家維嘅朋友去做咗呢個分享畀我哋聽眾知道啦。噉每一集我哋都會有一個經典嘅 Ending 嘅，噉呢度就同大家做返一個 Round Up。《點止港同志》係一個以香港同志角度出發嘅 Podcast，希望可以將大家生活裏面嘅性別同同志嘅議題用廣東話嘅聲音同文字嘅方式保留同流傳。上我哋嘅 Podcast 專頁 pridelab.hk/podcast，或者上我哋 Instagram @pridelabhk 嘅 Bio 入面就可以見到。多謝你收聽呢個節目，多謝家維同我去做呢一集嘅節目，多謝你聽到呢度最後嘅，如果你想聽更加多呢一類嘅節目，除咗訂閱我哋之外，歡迎你喺 Description 入面嘅連結去留言嘅，或者喺 Apple Podcast 上面畀星星嘅回饋，你嘅支持同埋回饋係成為我哋默默耕耘嘅動力嚟嘅。今集就講到呢度，期待下次《點止港同志》。家維同大家講拜拜啦！

K：拜拜各位。

M：拜拜。

M：馬天娜

E：Eunice

E：咦係喎大師，你啱啱提到呢啲玩具呢，真係一個好深嘅領域嚟啊，即係已經我哋試下搵啲工具去輔助噉樣。噉我都知道呢，其實好似有啲女同志佢哋都好抗拒用玩具。甚至乎呢，我聽過有人同我講係話「如果俾嗰個震蛋取代咗我對手噉點算呀？」即係「唔得掂㗎喎，到時佢要個震蛋唔要我噉點算呀？」呢啲說法，大師你又點睇呢？

M：無論任何性傾向嘅客都會問我，好老老實實你隻手係唔識震嘅。部機同埋你隻手已經係喺本質上面、功能上面已經係有個唔同啦，噉喺呢個情況之下，其實你係冇比較之分嘅。點解噉講呢？你以為一個震動器可以取代咗你隻手，但係本身部震動器無論佢係識得發熱變暖，嗰個暖嘅嗰個溫度都唔係人體嗰個溫度嚟。即係你所謂坊間有啲好似有好多功能，又話可以模仿人體嘅乜乜乜乜，我話畀你聽你開著咗變暖模式呢，你就會想像好似將個暖蛋放咗入去噉，所以成個溫度係唔啱嘅。噉當然，如果你話我震動器係做一個輔助角色，噉佢可以震動其他身體部位，噉你就唔使咁忙囉。即係你又唔使隻手又要出出入入，跟住你另外一隻手要搵方法捉外面，跟住你又要摸下上面下面、左左右右。你隻手呀，即係你可以將你嘅資源、將你嘅 Body、將你嘅心神 Focus 喺你想 Focus 嘅位置度，然後將呢個震動器或者按摩器呀，當係你嘅隊友去幫助你去 Achieve 你其他部位。我同任何人都係噉講㗎嘞，無論你係買一支大嘅震動器，或者買啲細嘅震動嘅公仔都好，係個公仔就你而唔係你去就個公仔，最重要一樣嘢係你要望清楚個說明書係有啲點樣去 Function 啦。突然間醒起，同大家提點一樣嘢就係你買咗嗰樣嘢返去呢，唔好諗住嗰樣嘢係得個震字，請你留意下嗰部機有唔同嘅模式，點樣開點樣 Control，即係如果你唔識得 Control 呢，你係會弄巧反拙嘅。即係你到時就會出個好尷尬嘅狀況，就係我唔識熄呀，我唔知點解佢越按越大力呀，或者係點解佢越嚟越細力呀，噉我嘅 Timing 就會好禍㗎嘞。所以為咗要令到你嗰個震動器成為你嘅神隊友呢，麻煩你，買咗嗰樣嘢之後，學識點樣用，就好似你買咗部電話返屋企，唔該你學識點樣用佢一樣。

E：係呀，試機真係好緊要㗎。第一次見到一個震動器嘅時候，佢多過一粒掣㗎嘛，你應該撳邊粒掣去發生咩事呢啲，梗係要預早學識啦。冇理由去到一嚟到就攞出嚟即刻用嘅時候，噉你至少都要攞出嚟叉個電先，你叉完電之後又要試下佢，究竟佢個加加減減，佢最低係幾震，最高係幾震呢啲呢，都真係一定要試下㗎。噉當然啦，你真係唔需要同一個震動器去同你嘅手比較㗎嘛，因為你隻手點擢呀，你一定冇嗰個震動器咁震。噉但係，你嘅伴侶係咪淨係鍾意震動器嗰隻震法，而真係唔要你呢？噉呢一個都真係冇得比較嘅整件事。

M：仲有啊 Eunice，我都想同你分享呢，就係有好多人擔心，例如 Let’s say 可能去咗佢女朋友屋企，跟住發現佢女友朋友張床隔離擺咗個震動器，但係冇話畀自己知，佢好擔心呀。佢就會諗，你買咗個震動器，係咪我做錯咗啲乜嘢？係咪其實你好唔滿意我？跟住呢腦裏面呢就有好多小劇場呢，就係諗，死啦點算呀，佢又唔同我講我哋，係咪溝通上面有好多問題呀，下刪一萬字嘅擔憂。話畀大家聽，喺呢度， 你對方之所以買一個震動器呢，其實係未必同你嘅表現有直接嘅關係。你要想像，將呢個解決性慾，或者解決呢個生理需求，或者解決你心裏面想呢個高潮嘅呢個需求呢，就好似你想食飯嘅原理一樣。如果你想像每一日肚餓呢，你唔會每一日都會想食 Buffet，你唔會每一日都會想食米芝蓮三星級嘅餐，即係有呢個前菜啦，跟住 Main course 啦，跟住有甜品啦，跟住前面有好多 Service 噉樣嘅。你唔會每一日都希望噉做呀。相反你可能有時可能純粹係可能經過觀塘你會見到，好肚餓但我又唔好想食個 Lunch，噉我去附近買啲魚蛋燒賣呀，買個腸粉呀噉樣，即係食一食，噉你咪唔餓囉，唔餓你咪可以繼續返工囉，你咪可以繼續做你嘅嘢囉。唔需要將呢個二分法，分到有呢個震動器，或者有呢個性玩具就冇我，其實有陣時係互相協調嘅，可能對方純粹就係諗，我可能未必日日見到你，噉我咪用下囉。或者係，縱使你哋係同居嘅，噉我用嘅時候可能係因為大家返工，攰嘞，噉我冇理由日日搵你㗎嘛。即係會有一啲其實係有啲輔助嘅效果。噉當然如果你發現你真係買咗個震動器之後，然後完完全全唔想再同你玩嘞，唔想再同你有呢個做愛嘞，噉你又自己去諗下你同你嘅伴侶點溝通嘞。

E：係呀，呢個就係啱啱震動器嗰件事啦。噉一個呢係女同志之間呢都成日好大分歧嘅玩具呢，就係一啲穿戴式嘅假陽具噉樣。係啦，噉因為呢我哋都有好多觀眾呢就會問啦，其實我又好想試下去用呢個穿戴式，但係又好驚俾我嘅伴侶覺得係咪真係想要男人呀，定係唔想再要…唔想再同我呢個女仔一齊嘞噉樣。大師你又會點樣去教返呢啲嘅聽眾呢？

M：我想問 Eunice 呢，你之前有冇用過穿戴式嘅？

E：我自己嘅話呢我都試過嘅。噉呢個都係其實最初嘅時候你會同你嘅伴侶去傾偈啦，同埋都會諗，其實你每次做同一件事你都好悶㗎嘛，所以你就會諗啦，其實大家有啲咩新嘢係想試呀。或者你見到，例如我啱啱講嗰啲 Homemade 嘅 Video，佢哋都好似有呢啲嘅輔助工具，好似玩得好開心喎，噉你就會同你嘅伴侶去試下傾點樣去可以進步，用進步好似好奇怪噉，但係都會想有啲新嘢去試下噉樣，就可以試囉。

M：因為我點解會噉問 Eunice 呢，係我之前 Serve 過一個客，即係嗰個以前嚟舖頭買嘢嘅客。佢呢，我同佢嘅 Serve 客嘅過程之中，我係見證住佢換過一個伴侶嘅，所以呢我係見證住佢將成批玩具換過一次嘅。噉當然成批玩具換一次嘅過程，就當然換埋啲 Dildo 呀，換埋啲所有嘅 Strap on 呀，嗰啲穿戴式嘅嘢。噉所以我喺度問，亦都順便係想問下聽眾們呢，一個好關鍵嘅問題，就係當你買咗一支穿戴式嘅時候，嗰支穿戴式係跟邊個。我覺得呢個問題好好笑，因為呢唔同人係有唔同嘅反應㗎。我問咗好幾個人啦，亦都聽過 Podcast 嘅，即係其他節目有講過呢，有人就覺得呢因為支穿戴式呢係篤入其中一方嘅，噉所以係被篤嘅嗰一個擁有呢一支嘅，因為佢篤咗入去佢嘅身體入面。噉但係亦都有人會覺得呢，唔係呀因為篤人嗰個係著住嗰個㗎嘛，噉應該係買呢一支篤篤，買呢一支 Dildo 嘅人，篤人嗰個擁有呢一支 Dildo 嘅。噉你買呢個 Dildo 呢，買穿戴式嘅時候呢請分清楚呢個擁有權係邊一個。

係啦，即係呢一個呢個 Dildo 嘅擁有權誰屬我覺得係一個有趣嘅討論，你諗下即係純粹係諗呢個 Dildo 討論已經可以開咗一個少少嘅性嘅話題，其實有好多好細嘅東西可以同你嘅 Partner 傾嘅 Ok。頭先 Eunice 都係講咗一個好關鍵嘅問題，係咪穿戴式就等於假陽具？穿戴式呢並不等於假陽具嘅，原因係呢坊間其實有好多穿戴式呢，個樣呢都唔係一個陽具嘅模樣啦，即係唔會有嗰個龜頭樣啦，亦都唔係肉色啦，亦都會有一啲可能係好多好五顏六色嘅東西噉樣，噉佢係穿戴式嘅目的係真係有一支棒噉樣啦。如果你係即係嗰個理解係嚴格到係覺得只要係一支棒你就覺得係陽具嘅，Ok fine，噉呢個我哋唔使討論嘅，總之呢個概念式我哋唔使討論。如果你覺得你係想繼續用穿戴式去做，即係你嘅道具嘅話呢，我首先同大家講點解要做呢件事，即係點解女同志要有穿戴式。直人就可能會考慮到有男方啦，即係 Gay 嘅族群就更加唔使講啦，噉點解女同志要有呢樣嘢。唔係因為女同志冇……即係唔係有啲人呢會突然間跳咗個邏輯，佢就話女同志做愛呢冇嘢好做嘅，女同志呢全部都係即係冇嘢撞冇嘢囉，咪就係，即係你睇下你下身冇嘢㗎嘛。唔係唔係唔係，我哋分返清楚。就係女同志雖然係冇嗰個陽具，但係你可以用透過穿戴式去做一樣嘢，就係騰空你對手。呢個先係嗰個穿戴式嘅目的，唔係掉返轉頭話我冇呀，所以我要搵返個，No！呢個概念係錯嘅。

騰空對手係一個非常重要嘅關鍵嚟嘅，因為你想像你下身搖擺，你下身進出嘅時候你對手係騰空，可以做其他情趣嘅動作，包括可以摸頭、摸面、摸身體，摸你想摸嘅地方啦 Ok？你成個情趣嘅部分就唔使花咁多心神，好似挖礦噉呢，個頭就係埋喺人哋兩腿之間，你就可以至少你個身係同你個 Partner 同 Level，即係你 At least 個樣係望到你嘅 Partner，你可以有好多唔同嘅動作，唔同嘅講嘢，聽到對方嘅聲音，好多聲效嘅效果呀。而就係因為你著穿戴式你就可以做到呢啲方便。如果你講咗穿戴式可以繼續做嘞，噉你就去搵一個你啱心水、啱嘴型、啱口型、啱你嘅眼睛，你覺得個 Visually pleasant 你覺得望落去好四正嘅，唔會令到你感覺唔舒服嘅一支棒棒。買啱 Size，買啱個穿戴嘅褲呀皮帶呀乜都好，你搵個店員去話你應該點樣搭配你嘅棒棒，同埋你點樣著嗰支棒棒，噉你就繼續做囉，係呀就係噉。

E：好可惜呢個 Podcast 係錄唔到我個樣，你就會見到我個頭係隔離揈到，嘩真係係噉喺度點頭點頭。真係呢個經驗之談都要同大家分享返，真係當你發現咗騰空到自己對手出嚟嘅時候，係真係發現咗新大陸一樣咁高興。當你發現自己個頭終於可以同對方個頭平排，然後自己對手終於可以喺刺激緊下面嘅同時都可以刺激下其他部位嘅時候，因為人類都係有個所限就係得兩隻手嘅啫，噉你真係摸唔到咁多嘅地方嘅時候你就會發現其實騰空兩隻手出嚟真係好緊要，因為你就可以做好多其他同時嘅刺激，而係令到對方更加愉悅，噉 Which 係我自己都獲益良多嘅，所以我都鼓勵大家真係要去試下。同埋啱啱大師都有講啦，其實你喺呢個過程入面你都可以同對方講多啲，又可以帶佢去性商店嗰度一齊揀呢個陽具，其實都係一個情趣嚟嘅。

M：係呀，真心㗎，真係你唔需要太擔心呢個，即係帶佢去呢個性商店呢好 Chur 呀或者係好…好點講呀，即係會令到人哋難堪啦。有好多鋪頭呢其實望落去呢同一間 Select shop 係冇咩分別嘅，噉佢哋又唔會打開堵門就會一支支假陽具棟喺你面前嘅。噉所以你入到去嘅時候可以畀佢大概了解下個質地呀，或者係唔同嘅長度噉樣。即係揀支假陽具呢同你揀衫呢其實係差唔多概念，你唔需要想像一個非常複雜嘅概念，你想著咩顏色嘅衫，你想咩 Texture 嘅衫，你件衫有幾長，著嚟做乜嘅，即係種種嘅呢啲噉樣嘅東西。既然你買一件衫都要諗咁多嘢嘅時候呢，其實你都可以去間鋪頭拎起嗰啲 Sample，睇下佢實物係點。因為有一啲嘅，即係喺度都分享埋呢個穿戴式呢，有一啲當然係好模擬真，模擬個陽具嘅形狀，亦都有好多係比較，我認為叫做抽象型，即係一支棍噉樣。咁一支棍呢有矽膠型啦，有一啲，即係膠都有唔同嘅質地，有啲硬啲嘅，有啲軟啲嘅，亦都有一啲所謂叫做 Dual texture，即係雙質地，外面有一嚿矽膠，即係嗰塊膠，然後裏面係有金屬嘅，所以你係可以拗嗰支棒有個特定嘅角度，因為嗰支按摩棒唔係你身體一部分，噉你郁嘅時候呢，佢未必會完完全全順住你嗰個 Wave 去郁。佢有機會會晃呀，因為即係物理性嘅問題嚟㗎咋，佢會 Bell，如果你假設太腍嘅穿戴式呢，或者太腍嘅 Dildo 呢，佢就會晃得好犀利，佢就會失控㗎嘞。如果你覺得你平時擺動嘅幅度太大，你嗰支嘢係噉 Bell 嘅，Bell 到失控呢，請你去買一支比較硬淨啲嘅 Dildo，或者係買啲 Dual texture 嘅 Dildo，即係裏面可以 Fix 定一個角度嘅，噉你就所有嘢都係 Well controlled，你就可以確定嗰個角度，確定嗰個方位，噉你就長驅直進噉樣。

E：嘩，呢個部分，所以聽完之後，大家點會唔去呢個性玩具店睇下？有咁多嘅款，然後有咁多學問，即係你上到去試下嗰個嘢晃唔晃，都夠你玩半個鐘啦。噉揀玩具到底，有冇啲咩心得係需要同大家分享提醒下㗎呢？

M：多謝 Eunice 拋呢個波畀我。揀玩具呢，我即係…而家我哋兩個人啦，噉最有經驗就係我嘞，噉我同大家分享下啦。頭先我講到呢個 Dildo 就有呢個質地啦、顏色啦、形狀啦，噉呢啲好表面嘅東西嚟嘅啫。噉如果你真係想做足功課，好似 Eunice 噉樣，認真 Mode，好好地裝備自己，噉你可以做啲咩呢？嗱呢個時候真係要落筆記嘞。其實呢，頭先我哋講到買玩具好似買衫噉樣，即係你有好多 Spec，即係你有咩 Texture、咩質地、邊度做、咩牌子，噉呢啲基本嘅嘢你都可以去搵啦。例如你去搵質地，質地呢真係一個好大嘅學問嚟嘅。如果你買嘅，我用一個，純粹一個 Indicator，即係一個方法去教你點樣去搵一個好嘅膠嘅玩具呢，就係你摸上手嘅時候呢，佢係唔會完全黐黏，好似啫喱噉黐喺你隻手，聞落去唔會有浸好重嘅膠味，即係唔會攻鼻一浸膠味。如果你搵到嗰啲頭先我所講又黐又臭嘅膠呢，佢可能係平嘅膠嚟嘅，Ok？

Let’s say 如果你係諗住長期投資，你係諗住會用佢㗎嘞，你係唔會諗住用完即棄嘅，噉我會建議你買過一支貴啲，同埋冇咁重膠味，同埋摸落去冇咁黏手嘅玩具囉，Ok？噉掉返轉如果你係諗住純粹係快、速食嘅，噉我都會溫馨提示你，建議你為咗對方著想，你都係笠個套啦，既然你都係用後即棄嘅話，噉你就笠個套啦，Ok。牌子方面，我冇特別去 Preference 大家用咩牌子，但係因為其實好多牌子，即係不論你個牌子本身係外國牌子啦，最重要係乜嘢呢，係佢用乜嘢質地造。即係好似同你食零食呀、買嘢食一樣呢，你都要望一望個後面嘅包裝寫，佢嘅 Ingredient、佢嘅成份係啲乜嘢，同樣道理麻煩你望一望，你嗰嚿嘢，無論你係震蛋又好呀，震動器呀，或者係 Dildo 都好，先望下佢係乜嘢物質做嘅。跟住再講埋…嗱 Size 大家自己到時望佢就知啦，即係呢啲簡單嘢。防水，好多人都會問嘅，就係我點樣防法，佢係防濺水，好似電話噉防濺水定係真係真防水，即係可以將部機浸落水。呢一個呢都係要睇 Spec 嘅，同你睇電話一模一樣，同你買電器一模一樣，麻煩你望一望或者問個店員，呢部機防唔防水，聽清楚佢係講緊佢係防濺水定係防浸水。因為防浸水佢係會有個 IP 值，IP7、IP4，即係有個 IP 嘅 Level 去話畀你聽佢可以浸水浸幾耐，或者係啲水淋落去佢係可以 Last 幾耐，噉睇你場合啦，如果你係乾𢛵𢛵嘅，你喺床上面做嘅，噉你可以唔使買呢個咁高階嘅。但如果你可能考慮，可能係沖涼做嘅，浸浴做嘅，或者係嗰個人好多水嘅，即係噗噗聲嘅，噉你可能要搵一啲防濺水、防浸水嘅玩具，噉呢個就要問返個 Spec 嘞。叉電部分同埋 Last 幾耐嘅部分呢，因為每一部機佢哋都係會有唔同嘅叉電時間啦、叉電方法啦，同埋即係佢開機 Last 幾耐嘅部分啦，噉呢啲全部都係要問返嗰個店員去同你示範返。但係點解我而家好似自己好 Random 噉講呢啲問題呢，就係因為呢幾個元素呢，都係好多初階買 Toy 嘅人唔醒起會問嘅。所以呢喺度都同大家講，而家再重複多一次，總結多一次，你買嘅質地啦，你買咩牌子啦，防水嘅程度啦，佢本身嘅 Size 啦，點樣叉電啦，一部機叉完可以開幾耐，以及嘈唔嘈，佢郁嘅嗰啲部件會唔會好嘈。呢啲都會建議你直接去間舖頭度問，因為呢啲係上網係唔會知，一嘈呢就真係好鬼死嘈，奉勸大家寫完呢個筆記之後，去買呢個 Toy 之前都可以去考慮得到。除咗頭先我講啲好極端嘅狀況之外，香港地少人多啦，頭先我都有講過，就係嘈唔嘈都係同每個人嘅生活空間有關係，呢部機太嘈呢，縱使隔住堵門呢都會有啲奇怪嘅聲音出現嘅。你可能會話我冚住張被，冚兩張被，跟住開著佢，應該冇問題嘅，但係呢有啲機係真係零舍嘈啲嘅，尤其係嗰啲吸啜型嘅玩具，吸啜型嘅玩具佢本身嘅用途係好嘅，功能係非常有效嘅，但係佢係有一個……相比起震動器會有一個 Package 上面有個落差，就係佢會零舍嘈一啲。噉兩睇啦，你睇你想做咩囉，如果你係功能為先嘅，你唔理有幾嘈嘅，或者你自己會 Book 房嘅，Staycation 嘅，你咪買囉。但係如果你唔係嘅，你話唔係嘅，我連買個玩具都要收埋收埋再收埋，唔可以俾人聽到，唔可以俾人見到，噉麻煩你去同個店員講你要買一啲好安靜嘅，或者只要嗰個玩具離開咗身體，佢就唔會郁，佢就唔會 Function 嘅，唔會震，唔會吸噉樣嘅。有啲噉嘅玩具嘅，都係可以好詳細噉同啲店員去問。

E：呢個位真係再分享多兩個實例畀大家知道。呢個嘈唔嘈嗰個位，我係會謹慎到買咗返屋企之後，係會試下開著佢，然後擺喺自己間房度，然後就開始閂門同埋出去聽下有冇聲㗎嘞。真係好緊要嘅，因為當你真係得一間自己嘅房嘅時候，你一定要仔細檢查清楚，到底隔離房嘅人會唔會聽到，或者係對面去緊廁所嘅人聽唔聽到呢，即係畀大家小提示可以去試下。另一樣嘢都特別想提呢，就係嗰個叉電嘅問題。即係充電呢其實而家啲玩具都仲有分係究竟係呢個直接 USB 電線叉電啦，噉亦都有另一款呢係入電芯㗎。噉我好記得有一次呢，係用一隻入電芯嘅玩具啦，然後玩到一半冇電，噉電芯呢家嘢呢就尷尬嘞，因為真係唔知大家屋企而家會唔會長期有啲唔同 Size 嘅電芯，有啲係有2A電，有啲係3A電，有啲係唔知咩電。呢個時候呢即係如果大家屋企唔係特別多電芯嘅存貨嘅話呢，大家都係揀返一啲即係 USB 簡單叉電就算啦，因為呢玩到一半冇電呢真係好尷尬，同埋呢即係卡住一半，去到一半唔知點做嘅時候呢，又真係比較大家都唔舒服就唔好嘞。

M：啱嘞。講起電呢，同大家分享埋呢個好關鍵嘅，即係如果你用玩具嘅話，你有一個好關鍵嘅 Point。你哋都知道有叉電式嘅玩具啦，亦都有頭先阿 Eunice 所講用電芯式嘅玩具。電芯式嘅玩具呢係方便你帶出去，即係好便攜，你唔需要抽住一抽二掕，然後拎住一拃線好累贅嘅，即係好輕盈嘅。但係佢嘅唔好處呢就係佢嘅電量呢會同嗰個你裏面放嘅電芯呢係正比嘅，即係嚿電越嚟越冇電呢佢就嗚～噉樣走，就收皮㗎嘞。而呢個叉電式嘅玩具呢同你電話一樣嘅，即係佢係會努力地工作，努力地奮鬥，然後直接去到零電，噉佢就會瓜柴噉樣。咁所以佢嗰個 Lasting 嘅電量呢會耐啲，但係你會感受到佢會去到最後一刻佢冇電就係會冇電囉。如果你係高階人士，你已經非常之 Pro 㗎嘞，而你係覺得兩三個鐘，叉電用嗰兩三個鐘，太短啦，你要用好長時間，真係要有大量嘅 Intermission，然後一日要做六個鐘嘅ok，噉麻煩你用插電式嘅，即係你直情係插交流電，你直接插埋個插頭呀，噉你就插住電用啦，你就唔好煩嗰啲乜嘢叉電呀剩剩剩嗰啲嘞，乜嘢又叉電，然後又要搵個磁吸吸住佢，或者唔知用乜 USB 咩咩咩噉叉住佢，唔好搞呢個嘢，你就直接插電啦。

E：大家記得 Mark 住哂嘞，真係值得投資呀，可以話畀大家聽。去到我哋最尾呢就一定要攞返呢個萬年問題出嚟講啦，亦都係我哋一話收投稿嘅時候，就係最多聽眾衝埋嚟擺低嘅兩個字：死床。我自己就暫時 Touchwood，未遇過嘅，唔知大師你有冇遇過一啲客或者朋友同你講過呢件事呢？

M：有呀，呢一樣嘢我諗係不分國界㗎嘞，香港、臺灣呀，其他地方都會有嘅。甚至我睇 Instagram，我想出 Story 嘅時候，我去搵 Bed death，死床英文，竟然係會夠膽死同我出一個 Lesbian bed death。好似講到呢個 Bed death，死床係女同志專屬啦。以前呢，返工嘅時候呢，我係有真係好認真學術 Mode 噉去搵一啲文章：究竟死床係咪即係女同志專屬嘅呢？答案就梗係唔係啦，噉但係點解死床會經常同女同志綁埋一齊呢？噉就係往往因為女同志嘅生活形態同其他同志唔同，即係同志族群唔同，例如係男同志會唔同嘅。因為男同志畀人嘅印象，或者係通常佢哋傾起嘅話題，好多時候都會同埋身肉搏呀、同性呀，之前同盧妤嗰一集 Podcast 都有講，呢個 Gay 嘅情慾故事好多時候都濕濕𣲷𣲷嘅，好多體液嘅。女同志嘅情慾嘅描述都好乾𢛴𢛴嘅，即係冇咁濕嘅。

相比男同志，女同志嘅生活形態比較少會郁啲就講性嘅。噉所以噉樣累積落嚟呢，由一開始我哋聽眾嗰個問題就係我哋唔知點做啦，跟住慢慢去探索啦，跟住真係去做啦，然後又要事後檢討呀，跟住又要買架撐呀，跟住又要去試下架撐呀……即係呢啲咁多方方面面嘅嘢都會係一個小小嘅門檻去令到啲人唔係好覺得要咁面對性，咁面對扑嘢呢件事去做咁多嘅研究，噉因而可能有啲人就覺得生活壓力忙呀、壓力大呀、攰呀，種種好現實嘅因素呢，就會令到女同志，可能佢哋住埋一齊之後呢，做呢個情趣或者係性嘅部分就顯得非常之低嘅 Priority 嘞。我而家嘅回應先撇除無性戀同半無性戀嘅部分，我哋先假設而家聽緊嘅人都係有性嘅，佢哋係要做嘅。女仔同女仔之間又好似相對嚟講唔係好知點樣搵一個主動嘅人，主動嘅角色去開啟呢一個性嘅對話。有啲直女好多時候就會將成個即係佢哋嘅性生活歸功畀呢一個男方，兩方性慾正常，佢哋有性需要就好正常，性慾多過我係正常…之類非常傳統嘅想法啦。或者掉返轉，總之係要有一個人擔當起「我好有性慾」嘅嗰個角色，先可以維繫到呢個性嘅生活。而女同女生活呢，就好難 Book 起咗一個人擔當起呢個角色，要去做一個好有性嘅呢一個身份。噉所以我覺得呢啲種種嘅因素係會導致死床嘅嗰個比例會高啲？噉但係我身邊嘅朋友冇特別 Mention 畀我啦，但係我自己都可以同大家好坦白去分享一件事，嗱唔好聽到呢度就話「吓馬天娜死床呀！」，唔係，係我近排呢，同我嘅伴侶，即係同我嘅配偶都有講起呢一個，即係我哋嘅情趣生活嘅部分。我都好坦白同我嘅聽眾們分享，我呢段時間的確係比較淡靜一啲嘅，但係我自己就唔會話我唔喜歡佢，唔喜歡我嘅配偶，或者係我唔享受個過程。我係好透徹知道我自己想要啲乜嘢，所以我就好清楚同我個伴侶講話，因為我依家返嘅工係點點點，而我嘅生活形態有啲轉變，跟住可能處理好多事情上面，我放空嘅時間都冇。我放空時間都冇嘅時候，如果你係想同我有呢個親密嘅接觸嘅時候，你就可能搵個假，放個假，噉我哋可以再從長計議，但係呢段時間我要確立，我要畀佢知道一件嘢就係冇呢個情趣嘅頻率，或者係減少個頻率，並不代表你唔喜歡對方。呢個性與愛嘅關聯，其實唔係綁到咁緊㗎。當然唔係話我哋要性愛分家，而係當你一步一步更加踏進你性關係同埋肉慾嘅需求嘅時候，其實可以更加透徹知道你幾時需要呢啲嘢。而你唔需要用一個好硬性嘅 Schedule，或者係好硬性嘅習慣去綁住對方，你一定要一個月同我做四次，如果我做唔夠四次，你就唔鍾意我，即係你唔好做啲噉嘅嘢。因為人性就係噉嘅，你叫佢越需要做，越迫佢做，佢係有機會越唔想做；噉掉轉亦都係，越唔想佢做，佢又會好犯賤，佢又想做下先。噉所以喺度總結一件事就係，我講咁多都係希望大家更加正面面對自己嘅需要、自己嘅想法，同埋你當刻感受到嘅開心唔開心、想要唔想要，都係透過好多溝通同你嘅伴侶，或者你嘅對手去講。

E：係呀冇錯，其實死床呢件事，好似正話大師所講，會同生活上面有好多嘅壓力，嗰陣時嘅狀態，甚至乎可能好直接就係，呢期嚟M，冇得話做就做㗎嘛。噉所以都係返到去最後，其實都係講緊兩個人一定要好好溝通。同埋都有研究，溝通都係可以增加高潮同歡愉嘅比率。雖然呢啲就唔使特別研究，大家都明白㗎嘞，但係都喺度呼籲大家，其實有啲性嘅事都可以攤出嚟同你嘅伴侶去講。其實喺講嘅過程入面，你又可以了解對方究竟係鍾意邊個模式多啲，或者最近嘅狀態係點樣，甚至乎可能大家會發現，一齊 Take 一個長 Break 去旅行，或者出去出走，或者去開下房，都係一個唔錯嘅選擇。都係可以大家令到雙方都開心，同埋建立關係嘅渠道嚟嘅。

M：可能喺坊間成日聽到啲人話溝通溝通啦，儘管係老生常談，但係真係唔係廢嘅，溝通係有分好多唔同嘅層次。頭先都有講你點樣去開啟講性嘅對話，或者點樣去開始，其實有好多唔同細嘅議題，好多細嘅話題係可以開啟到。你開啟咗之後又要好坦誠地去問大家你喜唔喜歡，你喜歡嘅程度係點，你唔喜歡嘅原因係啲乜嘢。可能有啲人會覺得溝通係要知情同意，係噉問得唔得、喜唔喜歡、我係咪好正、我係咪好勁…唔係！即係其實我哋唔使將嗰個對話或者嗰啲對白拉到咁高，唔使拉到咁高嘅層面，我哋可以拉低啲個層面。我哋可以喺日常入面，傾下了解下大家，其實已經係一個好好嘅情趣嘅建立嚟㗎嘞。

E：都好緊要呢就係呢個安全性行為嘞，因為都知道好似女同志之間都唔會話特別有啲點樣嘅病，可能大家都會有呢個誤解嘅，但係其實都會需要有啲衛生、安全嘅部分要注意下喎。大師，你有冇啲咩提醒可以畀到我哋嘅聽眾呢？

M：作為一個負責任嘅 Podcast，亦都感謝 Eunice 去提醒安全性行為呢件事。安全性行為正如佢所講，經常都係俾女同志忽略嘅，即係撇除懷孕，有好多直人覺得安全性行為嘅目的只有一個，就係唔想生小朋友，生唔到小朋友，總之唔好生小朋友就得㗎嘞。但係其實唔係嘅，安全性行為係要隔除體液，隔除性病兼懷孕嘅。噉女同志唔會直接有懷孕嘅考量啦，如何隔除體液嘅接觸從而達到安全性行為呢？有好多唔同嘅方法嘅，有用指險套啦，指險套可以減少指縫裏面嘅污糟嘢，或者有啲人隻手特別摻嘅，你都可以減少摻親人嘅。跟住亦都可以有口交膜啦，坊間口交膜嘅使用係少之少之少之又少嘅，但係喺度都同大家分享，口交膜你想像一張好似Tempo size 嘅一塊膠，嗰塊膠係一塊可以拉、可以延伸嘅膠，一般嚟講嗰塊膜就鋪咗喺你要舐或者你要操作嘅位置上面，例如可能你嘅外陰部啦，或者係要遮埋肛門嗰個位，總之就要隔除雙方接觸嗰個地方嘅體液交流。有好多唔同嘅用途嘅，隔體液呀，隔血又好，隔你啲分泌物又好，隔味都好呀，乜乜乜都好總之隔哂啲嘢啦。但我自己有一個少少嘅個人嘅都算係安全性行為嘅分享，因為我嗰陣時就生唇瘡，唇瘡係帶狀皰疹，佢係有傳染嘅風險嘅。雖然呢一種嘅帶狀皰疹同你下面所謂生嘅椰菜花係唔同種嚟嘅，你都唔會希望自己嘅唇瘡揩咗落人哋度㗎嘛。好老實講，用口交膜用途呢，安全性行為嘅用途係大於一切嘅，情趣成份係小於一切嘅，哈哈！但係因為嗰一刻係想用，想隔除嗰個風險，所以都係有用到嗰塊膠嘅。噉我覺得呢一啲噉嘅情況，你係可以好放心地去繼續操作，繼續你埋頭喺兩腿之間嘅操作啦。噉但係各有取向啦，有啲人可能下面味道特別濃啲，可能有啲人係就嚟嚟完M，佢差少少啫，噉可能佢都可以用嚟隔開。即係總之你有你自己嘅用途啦，一句講晒你買嗰個 Product，係個 Product 就你而唔係你去就個 Product 啦。噉安全性行為仲有另外一樣嘢嘅，嚴格嚟講佢唔係真係同嗰啲 Condom 呀、口交膜嗰啲有關，同衛生習慣有關：唔好用酒精噴玩具。講三次，唔好用酒精噴玩具，唔好用酒精噴玩具，點解呢？因為我哋已經過咗 COVID 嘞，過咗 COVID 之後我哋遺留嘅後遺症就係，我哋全部嘢都係噴酒精嘅。點解唔好用酒精噴玩具呢，就係因為有好多嘅膠呢，尤其係矽膠係唔受得酒精嘅，如果長期噴酒精抹佢，佢係會令到本身，如果係靚嘅膠啦，靚嘅膠佢就會有一啲膜，即係佢嗰個膜，防塵嘅膜會甩咗，繼而就會有一啲細細睇唔到，肉眼睇唔到嘅窿窿，係會藏菌啦。如果唔靚嘅膠就更加嚴重，你可能會令到嗰個膠變窒，長期下去會積咗好多菌落嗰碌嘢度，或者嗰啲東西、嗰個玩具度，你係縱使洗咗都係冇辦法完全地乾淨。我嘅個人經驗就係你用玩具，無論係咩形狀都好，當然你要確保佢係洗得，即係佢係防水嘅。如果係一個可以防水嘅玩具，請你一係用清水洗佢，然後再加你自己用，即係自己洗身體嘅沐浴露，係噉意捽一捽佢，成支嘢洗吓佢噉啦，或者係用舖頭會賣嘅嗰啲清潔泡泡、清潔噴霧。有啲人會覺得，清潔泡泡可能又係嗰啲好多化學劑，Ok fine，噉你唔鍾意咁多化學劑，噉你自己水洗啦。總之係話畀你聽，我係點做呢，噉都係分享畀你聽，你哋可以點做。

E：今集真係含金量十足呀，所以大家如果聽完一次之後發現，好似聽漏咗嘢喎，大家都可以再聽多次個節目嘅。噉我哋節目好似嚟到尾聲嘞喎？

M：係呀，頭先 Eunice 有講到話，可以聽完再聽再聽，同埋去返一開頭我咪有啲 Friend 會問，女同志係點做愛、女同志係點扑嘢，究竟女同志搞嘢搞啲乜嘢呢，好，麻煩你，呢個咁重資訊量嘅 Podcast，你可以成個 Podcast 扔畀佢，噉你就唔使同佢講咁多嘢嘞。好嘞，每一集收尾嘅時候都會有個經典嘅收結嘅。「點止港同志」係一個以香港同志角度出發嘅 Podcast，希望可以將大家生活裏面嘅同志同性別嘅議題，用廣東話嘅聲音同文字嘅方式保留同流傳。上我哋 Podcast 專頁 pridelab.hk/podcast，或者上我哋 Instagram Pridelabhk 嘅 Blog 入面就會見到。多謝你收聽呢個節目，亦都聽到嚟最後，亦都多謝 Eunice 同我一齊做呢個節目。如果你想聽更多呢類嘅節目，除咗訂閱我哋之外，亦都可以歡迎你喺 Description 下面個連結去留言，Comment 畀我哋，或者喺你哋嘅平臺，或者喺 Apple Podcast 裏面畀星星嘅回饋。你哋嘅支持同鼓勵係我哋默默耕耘嘅動力嚟嘅。今集就講到呢度，期待下次同你「點止港同志」。Eunice 同大家講 Byebye。

E：Bye bye。

開放PrideLab follower投稿第一集！
邀請女同志代表同我一齊傾下年經問題「女同志點做」
你呢個問題問得真係好啊！
我哋都好樂意解答你呢個問題！
一連兩集，「由淺入深」解決你嘅迷思

M：馬天娜

E：Eunice

M：歡迎大家返嚟「點止港同志」，我係主持人馬天娜。今集嘅節目係有一把新嘅聲嘅，但係佢又唔係嘉賓喎，不如我交畀佢自己介紹下自己先。

E：大家好，我係鍾意食包、飲啡、睇 Netflix 嘅典型 Lesbian 小夥伴 Eunice 呀！

M：喺度都要感謝我嘅 Podcast 小團隊，呢條題目係喺我哋面對面見面嘅時候傾出嚟嘅，所以呢，將呢個 Idea credit 歸返我嘅團隊先。另一個要捉埋你嘅原因，就係睇中你係呢個所謂資深女同志嘅身份。做咗咁耐女同志，你有冇試過一啲好奇怪嘅情況，就係你第一次同新嘅朋友講起你係女同志，Come out 嘅時候，佢哋會問你一啲問題你係招架唔住嘅呢？

E：通常一 Come out 嘅時候，就係拍緊拖嗰啲時候，所以佢哋都好快就會問，到底你點樣識你 Partner 㗎之類。

M：噉你真係好好彩，我係想分享我當時有一次人生有一次真係完全招架唔住。我有一次同一啲傾 Podcast 嘅朋友分享啦，分享我當時喺臺灣係 Run 一個女同志嘅平臺，跟住佢都知道我同隔離嗰個女仔都係女同志，噉兩個直女嘅 Podcaster 就傾下傾下就同我講，喂其實女同志係點樣搞嘢㗎？

E：睇嚟呢一個都唔淨止係外人、直女嘅問題喎，噉其實女同志之間都係成日問嘅一條萬年問題嚟嘅。今日就同大家傾下，到底女同志搞嘢係搞乜嘢㗎呢？話說我哋早前喺 PrideLab 嘅 IG 就出咗 Story，邀請大家問吓對於女同志嘅性事有冇乜嘢疑問呢？利申返先啦，我呢就係以前成日問問題嗰啲人嚟嘅，而家唔問都應該只係而家未有呢個需要住，所以呢，今日就要同聽眾一齊請教大師你嘞。

M：唔敢當唔敢當，真係老實講，雖然頭先講阿 Eunice 係資深女同志，噉我又唔係資資深深女同志嘅，只不過係因為以前係喺呢個性商店嗰度做過嘢，亦都係寫過下少少關於女同志床事嘅文章，所以就可以分享下自己嘅觀察同埋少少心得。

E：第一條嘅問題亦都係最重要嘅一件事嚟嘅，就係我哋唔識點樣開始呀。我哋有位聽眾就問嘞，同伴侶你眼望我眼，到底點樣先可以開始嘅呢大師？

M：我相信呢個問題其實唔係女同志專用嘅，亦都唔係只會有女同志去面對呢個問題。但係呢，如果你比較其他族群嚟講，好似女同志係比較時常出現呢一種尷尬嘅狀況。我個人經驗就係當你有嗰個衝動你要去做嘅時候，其實你望完嗰兩眼嘅眼神交流之後，你就會開始㗎嘞，所以你自己係會有一個衝動去做嘅。不過，當然你講起自己衝動嘅同時你都可能會諗唔係啦，我真係好驚我表錯情。噉如果你怕你表錯情呢，我可以直接同大家講，其實你唔使怕羞，你可以有啲暗示先嘅。嗰啲暗示你唔使冚冚聲企出嚟，然後做曬動作去做㗎嘛。

你可以有啲暗示，即係可能係會有製造一啲二人嘅空間，一啲私人嘅空間，甚或係轉咗個場，即係可能係去旅行，去 Staycation，或者係去一啲冇乜人會睇到你哋會有一啲私密嘅小行為嘅場合，可能例如戲院噉。唔係叫你喺戲院度做，只不過戲院裏面可以鋪墊咗一啲輕輕嘅身體嘅接觸，噉你就知道嗰個人會唔想掂咗你先。你如果已經完成咗第一步，你係確認咗，跟住你先再慢慢去嘗試試探下對方嘅想法，即係佢會唔會想同你有二人空間？噉你二人空間嘅時候要唔要再接近啲，身體上會唔會再容易接近啲？即係如果你去到一個二人空間，原來唔係嘅，佢成個嘅嗰個姿態係我哋沖咖啡吖，我哋面對面坐住，然後隔住勁遠嘅成張枱，噉先同你有呢個身體接觸嘅話，噉好明顯就嗰一刻唔係一個好嘅 Timing。

E：唔係喎，你啱啱講有啲衝動，噉但係衝動完之後又要鋪墊好似好難噉喎。

M：係呀，所以呢，好老實講喺而家，即係年輕人都會聽起講呢個 Consent 嘅年代，呢個知情同意嘅年代。知情同意呢個 Term 呢，係時常掛喺腦裏面同埋掛喺口邊嘅。噉唔係要你，即係係唔係都要問佢，你要唔要而家去做呀，或者係我可唔可以邀請你去做，而係我哋將呢個概念融入喺我哋嘅不明言嘅一個行動當中，將我哋嘅拍拖呀或者係互相見面嘅時間慢慢推展到去我哋可以有私密空間，減少你嘅伴侶，或者你嘅拍拖嘅對象，喺外面嘅地方受到其他人嘅目光，或者係唔知道自己如何將嗰個最私密嘅嗰一面展露畀你眼前。噉開始推進咗之後呢，你就可以直接真係攞出嗰啲好 Consent 嘅問題，即係「可唔可以呀？」「要唔要呀？」「繼續唔繼續呀？」At least 例如可唔可以錫你呀？噉樣就一步一步去，去確認對方同埋繼續去做你想做嘅嘢。

E：呢個一步一步呢，其實我都幾乖嘅。不過有時呢，可能我覺得釋出咗一啲所謂暗示，但係對方呢又好似真係好 Get 唔到呀。即係我帶佢去睇戲，佢真係同我好認真噉樣睇完一套戲嘅時候呢，好似會反而轉變成一啲失望喎。

M：我中間係 Skip 咗好多部分嘅，Skip 咗個部分呢就係 Trial and error。係會有機會失望嘅。失望唔代表係你失敗啦，或者係你做錯咗啲乜嘢。有陣時係可能係我唔知呀，有啲人佢係表達呢一個即係都想要嘅嗰個心態呢，係要慢慢堆砌嘅。噉每個人堆砌嘅時間係唔同嘅，有啲人呢係可能比我想像中快嘅，可能係二話不說今晚就做㗎嘞，亦都有啲人可能係慢慢堆砌，堆砌兩三個月噉樣。所以呢，呢個時間線呢好老實講，一個 Podcast 係唔能夠同你講即係你點樣可以做到呢個 Timing 嘅，但係你係可以慢慢估計到你嘅 Timing 同佢嘅 Timing 相差幾遠，同埋可以點樣嘗試拉近啲嘅方法。拉近嘅方法就係透過你嘅身體語言，同埋好多嘅密密嘅詢問噉樣。

E：所以大師就提我，即係如果今次唔得呢就下次再嚟。噉然後呢，不斷不斷去試下提出噉樣呢，都好似終有一日會成功噉樣係咪呢？

M：可以噉講嘅，噉但係呢個時候亦都可能會有聽眾就話，噉我咪好似嗰啲恐怖情人，係噉進擊係噉進擊，即係人哋唔理我我又繼續，係噉進擊係咪即係會好 Chur 呢噉樣？我嘅想法呢就係你想表達你嘅即係要再有進一步嘅接觸嘅時候，其實你做咗一個舉動對方已經知嘅。當然唔係話你一號約佢，然後你表達咗你嘅意思，然後你十號約佢然後繼續表達意思，然後一路二十號、三十號，每隔十日都要噉問佢。而係當你知道有呢個想法嘅時候，你知道對方嗰一刻嘅反應，可能你隔一陣，你可能見到一篇文章，或者你而家聽嘅時候你覺得呢個 Podcast 幫到你，你就 Share 呢個 Podcast 畀佢，將一啲同性或者同一啲私密關係，但係未去到 Porn 未去到 AV 嘅內容分享畀佢嘅時候，佢大概都會知道你係想同佢講下呢一啲題目。噉你去講下呢啲題目之後再慢慢可能講下，例如佢可能有前度嘅噉樣，噉你可以問下你同你前度之前係點樣㗎？或者係你曾經有冇探索過啲乜嘢呀？我以前喺性商店工作嘅時候，分享畀大家知道其實我見證住唔少 Couple 係一齊行去鋪頭，我覺得其實係一個拍拖嘅一個橋段嚟㗎，如果你係想噉做嘅話，你都可以帶你嘅 Partner 上嚟行下一啲，而家香港都有好多性商店嘅，你都可以去 Show 下一啲嘢畀佢睇下，睇下佢嘅感覺。如果佢係連去都唔敢去嘅，然後講好多唔同嘅說話畀你聽嘅，噉你就先唞下先啦，哈哈！

E：呢個位呢我都可以分享少少，我好記得之前都試過帶我嘅伴侶去性商店嗰度行下，噉呢個呢我哋後尾溝通返之後呢，其實原來我哋咁直接嘅一個舉動，係會大家都好 Turn on 嘅。噉所以就都同啲內向嘅朋友都分享返，都不妨試下做多啲呢啲嘅暗示，帶下對方去唔同嘅性商店又好，或者係類似一啲嘅資訊去分享都好呢，好似係會 Turn on 過你直接問佢「喂我哋今晚搞唔搞嘢」噉嘅。

M：係呀，因為真係我都知道香港地小人多，即係唔係一定每一個、每一對 Couple 都係一齊住嘅，所以你有好多呢啲嘅對話嘅 Opener 呢，其實都係透過你 Show 一啲返工都可以睇嘅嗰個層次、嗰個 Level 嘅性嘅內容。噉其實有好多嘅，即係你純粹係睇，你 Share 一篇新聞啦，你 Share 一篇學術文章啦，即係如果你係學術型嘅話，你亦都可以 Share 一啲討論區嘅文章噉樣，即係睇下佢想法係點，或者係佢睇到嗰條 Link 之後佢畀你咩反應，慢慢去試探，我覺得其實唔係咁困難嘅。只不過你可能一開始想像嗰個開始嘅嗰個門檻太高，你可以喺呢個門檻咁高之前，起啲小樓梯畀自己，慢慢去累積呢個階段同埋呢個試探呢。

E：相信大家都學到嘢嘞，噉但係呢，再落下面呢其實就更加大鑊。我哋收到有位聽眾就話啦，我呢就係 Bi 嘅，但係呢一直呢都真係唔敢同女仔去發生性關係，噉係因為呢根本唔知可以點樣或者係有咩好做。大師你又點樣解答呢位苦主呢？

M：有咩可以做？其實老實講，人類呢之所以會，即係有建立文明，都係因為透過前人嘅行為去慢慢去學習，然後去改進嘅。既然係噉呢，我哋學咗咁多嘢，我哋又學識用電腦學識用電話，冇理由係唔識學點樣去同一個人發生關係嘅，發生性關係噉樣。所以即係好明顯第一個答案就係，你要去搵你嘅資源啦，呢個係非常正路，網上咁多網站咁多嘢睇，噉你要搵正確嘅性教育，你搵一啲 Instagram 去教你點樣有親密嘅行為，我覺得係絕對唔難到你嘅。噉如果你擔心，佢嗰啲會唔會係太戲劇化，會唔會係純粹演出嚟，你好擔心自己太過戲劇化噉樣，你可以上網搜尋一啲 Homemade videos 嘅。呢個部分呢，如果你聽緊呢一集嘅人，你係 Under 18，Under 香港合法年齡，我會建議你遲啲先去做嘅，呢個 Disclaimer 我要落定先。噉如果你係 Over 18，你係過咗18歲，噉你可以繼續做。你去搵一啲片，噉有一啲片呢，就唔係專業演員去做嘅，可能係一啲自己素人嘅演員去做，嗰啲就好明顯就係可能佢哋將自己生活嘅紀錄，同埋佢哋嗰個，即係做愛嘅紀錄去拍低噉樣。噉呢成件事呢，就會冇咁 Dramatic 嘞，亦都唔會見到一啲好戲劇性，好違反人體工學嘅動作噉樣。如果你係覺得呢啲太 Simple，我哋想搵一啲有即係秀色可餐，我係睇到令到我眼睛都好舒服嘅一啲影片，你係可以去搵一啲專業嘅女優嘅影片嘅。噉呀，印象喺臺灣同香港出名嘅，就係短頭髮嗰個椎名空，係啦。噉我本人啦，即係馬天娜本人呢，比較少睇片嘅，噉但係呢，你都可以上網跟住嗰個同一個女優，即係同一個女優下面，會有啲 Suggestion videos 你又去望下啦。噉如果你自己已經有自己嘅推介，有一啲女優嘅名，歡迎留言或者 DM 畀我哋知道嘅。

E：係呀我都好想知道。噉因為有時上網搵好多資源睇嗰啲片， 其實都真係有時睇到好尷尬，真係好似睇到唔係好真實嗰啲噉，所以我都好 Buy homemade video 嗰個嘅做法嘅。

M：嗯，因為呢 Homemade video 呢，佢哋…即 Homemade 聽上嚟好似好……有啲人會覺得會唔會好土炮嘅。我話畀你聽，有陣時嗰啲專業起上嚟呢 Set 哂啲架撐 Set 哂啲 Cam，係 Pro 過我哋個 Podcast 呀我話畀你哋聽。即係嗰啲人呢，佢哋係自己喜歡噉樣做，而因為佢哋自知到係會俾到其他人睇，佢哋係真係落足心機做嘅。所以呢，即係總之佢哋唔係叫做女優，但係其實佢哋本身嘅成個嘅拍攝嘅手法，係可以做參考嘅。

E：係呀，我記得試過睇一啲片呢，佢係可以 Set 咗5個鏡頭，5個角度，然後佢會幫你剪返埋一齊，喺一樣時間嘅嘢分返5次去畀你睇嗰件事係點樣進行。噉我覺得除咗係一個畀你 Turn on 嘅一個工具之外，亦都係一條好好嘅教學短片嚟㗎。所以呢，我哋大家都開始明白有咩做喇喎﹐噉之後呢，做到一半嘅時候呢，就好似開始發現有更加多嘅問題嘞。有位觀眾就問，喂大女同志，大家都知道係用手指，用自己嘅身體去令到對方有歡愉㗎啦，究竟點樣去練好啲自己嘅臂力同埋指力呢？咦仲有位觀眾呢，就嫌埋自己條脷呀，佢覺得自己嘅舌頭嘅持久力都好緊要喎，因為呢都好想令到對方可以去到高潮㗎嘛。噉所以係嘞大師，呢一方面就交返畀你嘞。

M：呢個持久力嘅部分呢，老實講呢，我唔係健身教練，我就冇辦法話畀你聽你 Exactly 每一日做幾多個動作，做幾多 Set，然後舉幾重去做嘅。不過，如果我哋唔用 Gym 嘅角度去諗呢，其實係可以善用我哋周遭嘅資源去做嘅。首先你要諗下點解你隻手會咁攰呀，會唔會係可能係你嘅姿勢唔正確啦。你要諗下其實你隻手呢，即係我哋一般理解嘅手係會分兩節啦，Ok，會有一個上手臂同下手臂㗎嘛。如果你主攻所有嘅發力嘅地方都係喺下手臂呢，噉我可以好肯定話畀你聽你唔夠十分鐘你已經瓜柴，你已經可以休息，去做個中場休息十五分鐘，跟住再返返嚟嘅。但如果你兼顧埋你嘅上手臂，甚或你借力用你唔同嘅身體嗰個體位，或者係你嘅床嘅嗰個搖擺力呢，其實你可以成個人嘅身去善用嗰個力度去做嗰個進入嘅動作嘅。噉你就唔會淨係 Solo，淨係 Focus 喺你嘅左手或者右手，即係你應該得一隻手去操作啦，即係你唔會只 Focus 喺一隻手嘅力量，而係你可以用下你全身嘅力量去做。喺呢個情況之下呢，我其實覺得冇一啲嘅體型嘅人係會有少少優勢嘅。嗰個體型嘅人呢，就係大腿同埋屁股有 Muscle 嘅人，點解呢？就係當頭先我講緊你係個身體要郁，而唔係你隻手揈，即係我唔理你隻手練到幾大隻啦，如果你係想融合埋你嘅其他身體部位嘅話，其實你係可以用你嘅腰呀，你嘅臀部，因為臀部嘅肌肉好大塊，所以你係可以用臀部嘅肌肉推前呢，再擢埋張床或者擢埋嗰個平面啦。即係假設你嗰個平面可能係梳化呀、床呀，嗰啲呀，硬嘅我唔知呀我幫唔到你，如果係床嘅話呢， 其實你可以成個人噉樣擢呢，你就唔使下下、每一下都係用隻手，就可以慳啲力，呢個係手嘅部分啦。指力嘅部分呢，其實坊間係有一啲嘢可以鍛鍊你指力嘅，但係因為呢，手指呢仲有另外一個範疇係比較難改變嘅，就係你嘅手指嘅長度，你點練呢你隻手指係唔會變長嘅。噉所以如果你自問你手指，即係長度係 Ok，你純粹係想嗰個指力或者你嗰個發力係好啲，噉你可以用啲架撐去鍛鍊嘅。噉你搵嗰啲做 Gym 嘅架撐去鍛鍊嘅指力，因為抓舉力呢都係可以練返嚟嘅。我以前呢聽過有啲人嘅 Podcast 呢，佢哋係有分享，嗰啲叫咩……臺灣叫做抱石啦，攀石。攀石，即係呢你哋室內攀石呢， 其實你係非常之著重抓舉力嘅，噉所以你抓得多呢，你知道嗰個啲手指每一塊肌肉係點發力嘅時候呢，你就大概可以更加加強到。所以突然間我唔知會唔會聽完呢個 Podcast 之後，會有一大堆女同志走去攀石 Ok？噉跟住快快地講埋呢個舌頭持久力，我呢度呢因為呢個係一個語音嘅節目啦，我冇辦法用好詳細嘅方法去教你如何鍛鍊舌頭，但係呢坊間或者上網呢，係可以話到畀你聽如何令到你嘅舌頭嘅靈活度高啲啦，同埋你嘅嗰個舐嘅嗰個力度可以 Keep 住。噉老實講呢舌頭都係一片肌肉嚟嘅啫，你想像你身邊你而家用緊所有嘅部位、身上嘅部位呢都係肌肉嚟，所以相信自己。如果你係想鍛鍊自己嘅持久力耐啲，你唔使食藥，你去練就得㗎嘞。

E：嘩呢一集真係要寫 Notes 呀！又要練大腿力，又要練 Pat pat 嘅力，轉個頭仲要去報名攀石定抱石，跟住仲要練下自己嘅舌頭。其實諗諗下手指嗰個力呢， 其實擺到入對方嘅身體，應該又未需要去到要練到抱石咁大力，人哋嘅對方嘅裏面都係好柔軟嘅，所以我都唔建議大家係一味用嗰個死力，係噉喺度篤，因為其實最緊要都係對方舒服。有時唔係大力就等於舒服，有時亦都唔係等於手指長就係舒服，有時亦都唔係等於快就會舒服。噉所以速度上面，力上面大家都要搵個平衡。

M：係呀，非常正確。Eunice 呢，我相信佢噉講，應該暗暗地道出咗一啲過往真係不堪回首嘅經歷呀。呢個經歷係好嘅，原因係當你感受到唔舒服嘅力度嘅時候，你係要講嘅，千祈唔好下下你係好扮到覺得自己呢個女主角上身，下下中間好面目猙獰噉樣，就表示一堆嘅激情嘅樣，係冇意思嘅，因為你只會一下一下鋪墊緊你面向更唔舒服嘅一個性愛嘅狀態，因為你要…因為對方唔知嘅。正如我剛才所講，假如有個人聽完我講話，你又要去做 Gym，又要練大腿又要去練手，跟住就諗住自己成個筋肉人噉去做，就一定對方一定會好開心，係錯嘅。因為首先長度唔同，力度唔同，以及係你成個進入嘅過程之中嗰個階段，一開始係輕輕力，然後之後可能中間有啲人係想大力啲，或者有啲人係唔係好需要大力嘅，佢係純粹係需要有節奏，佢唔使大力，你只要有節奏地進入就得㗎嘞，所以每一個人嘅 Preference 都係唔一樣。力呢，只不過係，即而而家我講大家練力，練大隻呢係純粹係，如果有一啲人佢真係好冇力，即係好瘦嘅話，或者係佢本身唔係好知道點樣去持久啲，你可以用呢個方法去練。但係最重要最重要嘅係，你同你嘅對手，唔知你嘅對手係你嘅炮友，你一夜情嘅人，定係你嘅伴侶定係點呀，總之，如果你真係想增進你嘅技術，除咗你副偈可以改善之外，你都係需要寫下意見調查，係做一個事後討論嘅。噉你先知道究竟對方係咪真係 Enjoy 成個過程，而唔係同你一齊做戲，因為你哋要大家知道嗰個享受嘅方法，你先可以繼續持久地維繫到你哋嘅關係。

E：係呀，呢個呢真係好緊要。因為呢，我哋見到另外一位聽眾就會問，我都見對方咁攰啦，所以就唯有扮高潮畀佢睇，應唔應該同呢個伴侶講呀噉樣樣。所以呢，呢啲溝通嘅部分都好緊要。即係萬一你個伴侶，嘩一到嚟呢就上晒身噉樣，諗住嘩啲手指已經準備好嘞，然後就含含聲噉樣樣，出出入入出出入入，喂，其實你嘅伴侶未有 Feel 嘅時候，你自己都攰啦。噉所以呢，都真係好需要去互相溝通下啦，同埋呢，都睇下對方嗰個狀態，有時可能今日係想要快啲，或者另一日呢，又可能想要即係大力少少，專注喺某一個部分去多啲嘅感覺嘅，噉呢個呢其實都係每一次同埋每一次嘅身體狀況都係有分別嘅。

M：啱呀，嗱因為呢大力呢同埋頻率呢，其實都會同你嗰個場景，或者係你當時嗰個想要嘅嗰個 Mode 係有關嘅。即係 Let say 如果你哋係突然之間，我舉個例啦，你哋去 Cosplay 呢個霸道總裁 Mode 噉樣，噉你就會想像對方係可以偏霸道一啲，但係你唔係暴力，你唔係俾人綁架，但係你成件事就係你嗰個進入嘅嗰個侵入性可能強啲，你可能會有多啲即係從呢個氛圍同你哋 Cosplay 嘅嗰個關係，跟住到你嘅力度都可以全方位噉樣去調整。我覺得成件事就會均勻啲，就唔使好似你唔係好知道點樣控制自己噉樣囉。噉同埋經常性都會聽到有一件事就係，如果我又唔得閒做 Gym，我又冇時間去學攀石，副偈真係唔得喎，我唔係好持久喎，噉點算呀？唔通我真係噉樣一世咩？噉呢個世界係有一啲協助嘅東西，不論係郁唔郁、震唔震，都係可以幫助到你嘅。噉當然我而家就係，即係純粹開咗個頭，建議你去搵即係呢個性玩具協助啦。總括而言呢，就係玩具可以幫到你達成一啲你身體上面做唔到嘅嘢。

聽到呢度唔好走住，呢一集係有分上下集嘅，而家我哋就係講到玩玩具嘅部分啦，接住落嚟呢就會有非常之多資訊性嘅討論嘅環節啦，我哋點樣去同伴侶溝通玩玩具，以及係點樣去揀玩具，點樣去打理你嘅玩具，以及係其他一啲 Q&A 提到嘅問題，都會喺下集裏面講到嘅。完結上集之前，我都想回應有兩個 Follower 問我嘅同一個問題。就係講到女同女之間嘅床事，大家都會諗到有 Scissoring，即係一個鉸剪式嘅性愛嘅姿勢啦。啱啱講到我哋如何去鍛鍊自己嘅身體，鍛鍊自己嘅肌肉去令到自己更加持久，其實 Scissoring 係一個非常講求體力嘅一個姿勢，所以換句話去回答，呢兩個 Follower 嘅問題，就係其實女女之間嘅親密行為，如果次次都係用鉸剪式用 Scissoring，實在係太過不符合經濟成本，亦都係好嘥力嘅一個方法。手又要夠支撐得耐啦，然後你哋兩個嘅高度又要對應得到，再加上你哋要個柔軟度夠高先可以做到兩把鉸剪交疊嘅呢個姿勢。所謂嘅互相摩擦，所謂好多電影橋段都有呈現過呢一個嘅體位，都唔可以完全去呈現到女女之間嘅親密性愛嘅呢一個習慣。 同好多直人一樣，你呢個性愛嘅習慣，體位都有好多唔同嘅 Pose，而女同志都唔例外，所以鉸剪式、Scissoring，甚至一啲粗魯啲嘅描述，磨豆腐呀，呢啲噉嘅想法係經常放咗喺呢個女同志嘅刻板印象裏面。但係大家諗真啲，呢一個刻板印象係好……唉我諗到就攰呀。

總之噉講，講到呢度，我都想拋個磚，引個玉，就係如果你本身係做開 Gym，或者你本身有鍛鍊開身體，而你覺得鍛鍊咗身體之後，係有助於你呢個持久力同埋有助於你嘅親密關係嘅話，都非常歡迎你 DM 我哋，然後就同我哋分享你呢一個鍛鍊身體之後對你有幾大嘅幫助。 下一集就係我同 Eunice 會詳細講埋其他 Q&A 嘅內容，資訊性非常之高。如果你唔想錯失任何內容，建議你去聽下一集之前攞定本筆記簿，攞定支筆去 Mark 低啲 Point 嘞。噉我哋下集再同大家「點止港同志」。 Bye。

(more…)