寫實現員心聲嘅時候我先醒起，其實喺好耐好耐之前我就見過PrideLab。
嗰時，我啱啱返香港，想認識多啲香港嘅無性戀社群，所以開始上網搵資料。就係嗰時我喺YouTube睇到一段用廣東話講無性戀嘅影片，正正就係PrideLab嘅片。輾輾轉轉，因為朋友嘅推薦，我參加咗PrideLab嘅桌遊聚會，之後去Chill傾，唔記得點解就成為咗實現員。
第一次喺PrideLab嘅工作，應該係睇電影嘅社群活動。作為一個慢熱又好驚喺人群面前講嘢嘅人，我都唔知做乜嘢會應承搞活動。應承咗、搞咗，又好似有啲好玩，就咁一直搞落去。
慢慢，做真人圖書，跟住去唔同機構做培訓，面對公眾擺攤位⋯⋯做咗好多以前從來冇想像過自己會做嘅事。有時會覺得攰，亦都會遇到唔見得愉快嘅事，但係過一陣子碌返相簿，睇返做咗嘅事，又會覺得依啲回憶幾有趣幾難得。
諗返起，我一開始留喺PrideLab係因為多元。PrideLab唔係一個專注單一小眾嘅組織。所以喺依度會遇到好多人，每個人嘅性／別身份都唔同，亦都好似唔係最為重要。咁樣嘅環境反而令我覺得自在，因為每個人都唔同，冇人會預期我要表現得似一個點樣嘅人。
之後係因為「實現員」依三個字。我問過，點解叫實現員而唔係義工。得到嘅答案係，因為實現員要去實現自己想實現嘅事。回顧返依一段時間，陳驚、Kate、家維、大大等等嘅各位畀咗好多機會、資源我，支持我去試吓做想做嘅事。
有啲事一個人做唔到，或者會做得辛苦好多，要有人一齊實現得到。成為實現員，我學到嘅其中一個技能係，記得要搵人幫手。雖然我仍然未好習慣開口叫人幫手，但係會叫多啲㗎啦，因為我知道我需要、我想要。每次都係多得大家，我嘅一啲小心願先可以漸漸被實現。
有一個畫面我一直記得：我拎住啲貼紙，邀請人同我一齊週街貼貼紙落路人身上、街上嘅路牌。依個行動冇乜「價值」，單純係因為我想好似大眾亂貼標籤落性／別小眾身上一樣，亂貼一啲嘢落社會大眾身上。估唔到一齊籌備活動嘅實現員冇否定我嘅諗法，隨便我亂嚟，而且一齊令件事成真。
喺PrideLab，一直會撞到一個問題——你想做啲咩？或者就係依個問題令我一直留喺度。無論係有關性／別身份，定係人生當中嘅其他事，要醒起問自己想做咩，去試吓搵答案，然後試吓實現佢，或者搵人幫手一齊實現佢。
ming，2022年參加PrideLab活動，逐漸加入成為實現員