國際不再恐同日 今年主題「家庭」
爸爸支持女兒出櫃﹕唔使驚
【明報專訊】不少同性戀者仍憂慮如何向屋企人坦承自己嘅性傾向，而32歲嘅自由工作者陳驚（Kenn）可以話係非常幸運，陳爸爸唔單止主動問囡囡嘅性取向，仲同佢講：「睇你個樣都係帶女朋友仔返嚟喇。唔使驚，我支持你。」
星期三（5月17日）就係一年一度嘅「國際不再恐同日」，今年主題係「家庭（Families）」，希望屋企人可以同同志仔女多溝通。噚日有同志團體包括跨性別權益會同香港彩虹等，喺銅鑼灣東角道行人專用區設街站響應。同性戀者Kenn同爸爸一齊分享佢哋嘅「非常故事」。
母怕無孫抱 父：最緊要開心
陳爸爸話，Kenn細個鍾意玩較男性化嘅玩具，好似車同遊戲機，幼稚園後直頭抗拒著裙，嗰時已懷疑Kenn個性傾向同其他人唔同。到Kenn初中，陳爸爸直頭主動問！陳媽媽比較傳統，曾問陳爸爸﹕「係咪冇孫抱啦？」不過陳爸爸覺得開心同唔傷害人最緊要，仲開解老婆，話「就算異性戀都可能有問題，唔一定會開心」。
對於Kenn嚟講，好彩爸爸支持，佢亦都知自己情况喺性小眾入面「非常罕見」。不過，佢都話以前喺一間大公司做嘢時，因為知老細立場，唔敢坦白。Kenn覺得近年香港對性小眾接納多咗，但希望政府可以加快就反性傾向歧視立法，保障性小眾喺職場上等唔會受到歧視。
出席活動嘅立法會議員邵家臻話遲啲立法會檢討平機會工作， 但因為有其他議題排緊期，驚唔可以喺7月休會前傾到。