跨性別並沒有想像中咁少

為響應2021年3月31日跨性別現身日,我哋喺社交媒體發佈文章《跨性別並沒有想像中咁少》。
同時邀請插畫師Jovis為文章創作插畫。

創作過程我哋互相交流,細心設計不同細節。最後決定運用俄羅斯套娃作元素。
表達每一個人可以自主擁有「性別表達」和「性別認同」,「出生被指引嘅性別身份」則用嬰兒裝表達。

《跨性別並沒有想像中咁少》

喺主流嘅理解中,跨性別就等於變性,但如果只係噉,人數真係好少。(呢篇科普文唔追求政治正確,有興趣可以指出唔啱嘅地方)我哋確實冇實質研究數據引述,但做過幾次社區教育,若將男女二元選擇改成從1至10光譜分數,發現多數人都會認同自己係比較中間嘅性別,呢個「中間性別」人數遠比變性人嘅人數多。

?定義
不如倒過來問,「咩人唔係跨性別」,出生紙係男,大咗覺得自己係男人,應該就唔會係跨性別喇?呢個情況,我哋會叫「順性別 Cisgender」。所以,「跨性別 Transgender」嘅定義就係,出生時被指定嘅性別,與心理性別認同有落差,就係跨性別。

?變性人最廣為人知嘅原因
男女係主流最容易理解嘅性別概念,而變性人係由「男變女」或「女變男」,兩處嘅起點同終點都容易明。呢類變性人意願強烈,通常都十分排斥原生性別,所以多數喺某個年歲就忍受唔住走出嚟承認身份,並尋找轉變方法,包括荷爾蒙藥物以及外科手術,而唔係沉寂喺主流之中偽裝。(當然變完之後係另一件事)
對傳媒嚟講,「靈魂與身體錯配」作為賣慘故事係好用易寫,經過十幾年獵奇炒作,加上網上資訊流通,自然令知道嘅人更多。

?️‍?性別同性傾向從來唔係同一課題
「變性人係其中一種同性戀」呢種說法錯誤程度大概等於「看色情物品嘅人係其中一種男性」、「有性經驗嘅人是其中一種已婚人士」。上述說法當講笑就算,真心認同嘅話就係蠢。
性別係「我係咩人」,性傾向係「我鍾意咩人」。搞錯咗嘅人或者係誤會咗男性嘅其中一個特質係鍾意女人,女性嘅其中一個特質係鍾意男人,噉我想問,同性戀係咩呢?雙性戀又係咩?唔通雙性戀就等於雙性人嗎?
舉個朋友做例子,佢係男跨女,然後鍾意女仔,所以佢就係女同性戀。

?認識跨性別有咩好處
大概就等於「認識辦公室政治」、「認識公民權利」、「認識出Pool技巧」差不多。都係一種冇必要,唔學唔會死,但幾貼身嘅課題。
認識「跨性別」,令你明白生理結構係與生俱來,但性別氣質係文化建構出嚟,係我哋由細喺生活各種細節學習返嚟。唔少人誤會咗呢啲潛移默化學返嚟嘅對性別嘅想法都係與生俱來,例如認為男子漢天生應該有勇氣、頂天立地、流血不流淚;女人天生細心有耐性,懂得照顧家庭,生兒育女。
花啲時間搞清楚,好好認識探索自己,精準投放時間同資源做個更理想嘅自己,就係好處。

撰文:天風
插畫:Jovis