同好多實現員一樣，認識PrideLab都係因為陳驚。2018年認識PrideLab，當時無諗過同自己有關，頂多都係follow Facebook, IG…. 漸漸被PrideLab嘅創作吸引。
陳驚成日話PrideLab係蚊形組織，無水喉、無資源，但我睇到嘅係PrideLab擁有無限資源，包括一班忠實擁躉，組織要人就會有一班愛戴PrideLab嘅傻人出嚟，有啲目標明確，知道自己身分責任，亦有一班目標模糊，出咗嚟先算。在我眼中，PrideLab就是一個受人愛護、珍惜嘅一個組織。
有一年，陳驚搵我幫手帶team building，佢講咗一啲憂慮，覺得比唔到啲咩比實現員，但我見到嘅係PrideLab好有凝聚力同行動力，係少有組織、機構內見到，所以班實現員出心出力係因為PrideLab而唔係要求任何回報。
2022年中，陳驚話想社群搞多啲活動，於是搵我傾，傾下傾下就傾咗個「Chill傾月聚」出嚟。諗返起當時度每個月主題，都幾頭痕，自問性/別意識、知識薄弱，PrideLab實現員個個都有返咁上下經驗，我可以搞咩吸引佢地呢？隨時比人覺得低級無聊，無人參加點算。
最後，我抱住一種「學生」嘅心態，每個月都諗個我想學嘅主題出嚟，真係比我學到好多，與其話我搞活動比社群，不如話我喺社群中學習、認識自己，而且賺到一班朋友，雖然只係月聚，但係每次見面大家都有講唔完嘅話題。好開心遇到呢班實現員，豐富咗我嘅眼界，開拓咗我好多不可能。
Kate，註冊社工；2022年協助籌辦社群活動，正式成為PrideLab實現員。